ଓ୍ବାଶିଂଟନ୍,୬।୧୧: ରିପବ୍ଲିକାନ ପ୍ରାର୍ଥୀ ଡୋନାଲ୍ଡ ଟ୍ରମ୍ପ ଆମେରିକା ନିର୍ବାଚନରେ ବାଜି ମାରି ନେଇଛନ୍ତି। ସେ ଦେଶର ୪୭ତମ ରାଷ୍ଟ୍ରପତି ମୁକୁଟ ପିନ୍ଧିବାକୁ ଯାଉଛନ୍ତି। ଟ୍ରମ୍ପ ଡେମୋକ୍ରାଟିକ ପାର୍ଟିର ପ୍ରାର୍ଥୀ କମଲା ହାରିସଙ୍କୁ ଶୋଚନୀୟ ଭାବେ ପରାଜିତ କରିଛନ୍ତି। ତେବେ ଟ୍ରମ୍ପଙ୍କ ଏହା ଦ୍ୱିତୀୟ ବିଜୟ ଅଟେ। ସେ ୨୦୧୬ରୁ ୨୦୨୦ ଯାଏ ଦେଶର ୪୫ତମ ରାଷ୍ଟ୍ରପତି ହୋଇ ସାରିଛନ୍ତି। ଏବେ ଏହା ତାଙ୍କର ଦ୍ୱିତୀୟ ପାଳି। କହିରଖୁଛୁ କି, ରେଜଲ୍ଟ ଅନୁଯାୟୀ, ଟ୍ରମ୍ପଙ୍କୁ ୨୭୦ ଇଲୋକ୍ଟରଲ ଭୋଟ ମିଳିଛି। ଅର୍ଥାତ୍ ସେ ମ୍ୟାଜିକ ନମ୍ବର ଛୁଇଁ ସାରିଛନ୍ତି। ତେବେ ଟ୍ରମ୍ପଙ୍କ ଐତିହାସିକ ବିଜୟକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁଭେଚ୍ଛା ଜଣାଇଥିବାବେଳେ ପଡୋଶୀ ଦେଶ ଚାଇନାର ମୁଣ୍ଡବିନ୍ଧା ଆରମ୍ଭ ହୋଇଛି। ଚାଇନା ଏବେ ବାଣିଜ୍ୟବ୍ୟାପାର, ଉଦ୍ୟୋଗ ଓ ପ୍ରତିରକ୍ଷା ପ୍ରସଙ୍ଗକୁ ନେଇ ଆମେରିକା ସହ ଆହୁରି ୪ବର୍ଷ ଯାଏ ସୁସମ୍ପର୍କ ରଖିବାକୁ ଅଣ୍ଟା ଭିଡିଛିି।
ଏହାର କାରଣ ଟ୍ରମ୍ପ ନିଜ ନିର୍ବାଚନୀ ପ୍ରଚାର ସମୟରେ କହିସାରିଛନ୍ତି ଯେ, ସେ ଚାଇନାରୁ ଆମଦାନୀ କରାଯାଉଥିବା ଦ୍ରବ୍ୟ ଉପରେ ବଡ଼ ପରିମାଣର ଟ୍ୟାକ୍ସ ଲଗାଇବେ। କହିରଖୁଛୁ କି, ଟ୍ରମ୍ପ ଆଣ୍ଟି ଚାଇନା ପଲିସି ଭାବରେ ଲୋକପ୍ରିୟ ଅଟନ୍ତି। ଦେଶରେ ଉତ୍ପାଦନ ବଢାଇବା ସହ ଅର୍ଥବ୍ୟବସ୍ଥାକୁ ମଜବୁତ କରିବା ପାଇଁ ଚାଇନାରୁ ଆମଦାନୀ କରାଯାଉଥିବା ଦ୍ରବ୍ୟ ଉପରେ ୬୦ ପ୍ରତିଶତ ଟ୍ୟାକ୍ସ ଲଗାଇବେ ବୋଲି ଘୋଷଣା କରିଛନ୍ତି। ଯେତେବେଳେ କି ଅନ୍ୟଦେଶ ଉପରେ ଏହା ମାତ୍ର ୧୦ ପ୍ରତିଶତ ବୋଲି କହିଛନ୍ତି। ଏପରି ହେଲେ ଚାଇନାରୁ ଆମେରିକା ଆସୁଥିବା ମାଲ୍ ଉପରେ ରୋକ୍ ଲାଗିପାରେ। ତେବେ ଏହାକୁ ନେଇ ଚାଇନାର ରଣନୀତିଜ୍ଞମାନେ କହିଛନ୍ତି କି, ଟ୍ରମ୍ପ ଜିତିବା ଦ୍ୱାରା ଚାଇନାକୁ ଆଗକୁ ବଡ଼ ଝଟ୍କା ଲାଗିପାରେ।
ଏହା ବ୍ୟତୀତ ଟ୍ରମ୍ପ ଚାଇନାକୁ ସର୍ବାଧିକ ପସନ୍ଦର ରାଷ୍ଟ୍ରର ମାନ୍ୟତା ଶେଷ କରିବା ପାଇଁ ପ୍ରସ୍ତାବ ଆଣିଛନ୍ତି। ବିଶେଷଜ୍ଞନୁସାରେ, ଚାଇନା ପ୍ରତିବର୍ଷ ଆମେରିକାକୁ ୪୦୦ ବିଲିୟନ ଡଲାରରୁ ଅଧିକ ମୂଲ୍ୟର ସାମଗ୍ରୀ ବିକ୍ରି କରିଥାଏ। ତେବେ ଚଳିତ ଟ୍ରମ୍ପ ଶାସନରେ ଆମେରିକା ଓ ଚାଇନା ମଧ୍ୟରେ ପୁଣିଥରେ ବାଣିଜ୍ୟ ଯୁଦ୍ଧ ଆରମ୍ଭ ହେବାର ଆଶଙ୍କା ରହିଛି।
