ବ୍ରହ୍ମପୁର,୬ା୧୦(ସୁବାସ ଚନ୍ଦ୍ର ପାଢ଼ୀ): ଛାତ୍ର ସଂସଦ ନିର୍ବାଚନ ପାଇଁ ରାଜ୍ୟ ସରକାରଙ୍କ ପକ୍ଷରୁ ସୋମବାର ଘୋଷଣା କରାଯିବା ପରେ ମହାବିଦ୍ୟାଳୟ ଓ ବିଶ୍ୱ ବିଦ୍ୟାଳୟଗୁଡ଼ିକରେ ରାଜନୈତିକ ମାହୋଲ ସରଗରମ ହୋଇଉଠିଛି । ୯ ବର୍ଷ ପରେ କ୍ୟାମ୍ପସରେ ନିର୍ବାଚନ ହେବାକୁ ଯାଉଥିବାରୁ ବ୍ରହ୍ମପୁର ବିଶ୍ୱବିଦ୍ୟାଳୟ ନାଲକୋ ଗେଟ ସମ୍ମୁଖରେ ଛାତ୍ର ସଙ୍ଗଠନ ମୁଖ୍ୟମନ୍ତ୍ରୀ, ଉଚ୍ଚଶିକ୍ଷା ମନ୍ତ୍ରୀଙ୍କୁ ସାଧୁବାଦ ଜଣାଇବା ସହ ବାଣ ଫୁଟାଇ, ମିଠା ବଣ୍ଟନ କରିଥିଲେ।
ଏ ନେଇ ପିଜି କାଉନସିଲ ଅଧ୍ୟକ୍ଷ ପ୍ରଫେସର ସୁକାନ୍ତ କୁମାର ତ୍ରିପାଠୀଙ୍କ ସହ ଯୋଗାଯୋଗ ବେଳେ ସେ କହିଛନ୍ତି, ବୁଧବାର ନିର୍ବାଚନ ବିଜ୍ଞପ୍ତି ପ୍ରକାଶ ପାଇବ । ଆସନ୍ତା ୯ ତାରିଖରେ ନାମାଙ୍କନ ଦାଖଲ, ନଥିପତ୍ର ଯାଞ୍ଚ ଓ ଯୋଗ୍ୟ ତାଲିକା ପ୍ରକାଶ ପାଇବ । ୧୦ରେ ନାମାଙ୍କନ ପ୍ରତ୍ୟାହାର ଓ ଯୋଗ୍ୟ ତାଲିକା ପ୍ରସ୍ତୁତି ହେବ । ୧୪ରେ ହ୍ବାଏ ଆଇ ଷ୍ଟାଣ୍ଡ ଫର ମିଟିଙ୍ଗ ହେବ l ୧୫ ତାରିଖ ସକାଳ ୮ଟାରୁ ଅପରାହ୍ନ ୨ଟା ପର୍ଯ୍ୟନ୍ତ ଭୋଟଦାନ ଓ ପରେ ଭୋଟ ଗଣତି ହେବ। ୧୬ରେ ବିଜେତା ପ୍ରାର୍ଥୀମାନଙ୍କ ଶପଥ ଗ୍ରହଣ କାର୍ଯ୍ୟକ୍ରମ ରହିଛି ।
ଛାତ୍ରୀଛାତ୍ରଙ୍କ ସୁରକ୍ଷା ନିମନ୍ତେ କଡ଼ାକଡ଼ି ପାଟ୍ରୋଲିଂ କରାଯିବ । କ୍ୟାମ୍ପସ ଓ ହଷ୍ଟେଲକୁ ଅଣ ଛାତ୍ର ପ୍ରବେଶ ଉପରେ ଦୃଷ୍ଟି ଦିଆଯିବ । କମିଟି ଗଠନ କରାଯାଇ କିଭଳି ଶାନ୍ତିଶୃଙ୍ଖଳା ସହିତ ନିର୍ବାଚନ ପରିଚାଳନା କରାଯିବ ସେଥିପ୍ରତି ଦୃଷ୍ଟି ଦିଆଯିବ । ନାମଲେଖା ଚାଲୁ ରହିଛି । ଭୋଟ ଦାନ ପର୍ଯ୍ୟନ୍ତ ଯେଉଁମାନେ ନାମ ଲେଖାଇଛନ୍ତି, ସେମାନେ ଭୋଟ ଦେଇପାରିବେ । ଏଥିସହ ପ୍ରତ୍ୟେକ ଛାତ୍ରୀଛାତ୍ରଙ୍କୁ ଟେମ୍ପରାରୀ ଆଇ କାର୍ଡ ପ୍ରଦାନ କରାଯିବ। ଏ ନେଇ ଅନଲାଇନ ମାଧ୍ୟମରେ କୁଳସଚିବ ଚିନ୍ମୟୀ କହଁର, ୱାଡେନ ପ୍ରଫେସର ଗଣେଶ ସେଠୀ, ସମସ୍ତ ବିଭାଗର ଶିକ୍ଷକ,ଅଣ ଶିକ୍ଷକଙ୍କୁ ନେଇ ଆଲୋଚନା କରାଯାଇଥିବା ପିଜି କାଉନସିଲ ଅଧ୍ୟକ୍ଷ କହିଛନ୍ତି ।
