ଓ୍ବାଶିଂଟନ୍ , ୫।୬: ଇରାନ ସହିତ ଶାନ୍ତି ଚୁକ୍ତିକୁ ଚୂଡ଼ାନ୍ତ ରୂପ ଦେବାରେ ବ୍ୟସ୍ତ ଥିବା ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିଜର ପରବର୍ତ୍ତୀ ମିଶନ ବିଷୟରେ ମଧ୍ୟ ସୂଚନା ଦେଇଛନ୍ତି। ୟୁଏସ ପ୍ରେସିଡେଣ୍ଟଙ୍କ ପରବର୍ତ୍ତୀ ଟାର୍ଗେଟ୍ରେ କ୍ୟୁବା ରହିଛି। ଗୁରୁବାର ସେ କ୍ୟୁବାକୁ ଏକ ‘ବିଫଳ’ ଦେଶ ବୋଲି ଅଭିହିତ କରିଛନ୍ତି ଏବଂ ରାଷ୍ଟ୍ରପତି ମିଗୁଏଲ ଡିଆଜ କ୍ୟାନେଲ, ତାଙ୍କ ପତ୍ନୀ ଓ ସେମାନଙ୍କ ସହ ଜଡ଼ିତ ଅନ୍ୟ ତିନିଜଣ ବ୍ୟକ୍ତିଙ୍କ ଉପରେ ନୂତନ ପ୍ରତିବନ୍ଧକ ଲଗାଇଛନ୍ତି।
ଯେତେବେଳେ ତାଙ୍କୁ ପଚରାଗଲା କି କ୍ୟୁବା କ’ଣ ପତନର ଅତି ନିକଟତର, ସେତେବେଳେ ଟ୍ରମ୍ପ ସଙ୍କେତ ଦେଇଥିଲେ ଯେ ସେଠାକାର ଆର୍ଥିକ ଏବଂ ରାଜନୈତିକ ବ୍ୟବସ୍ଥା ପୂର୍ବରୁ ହିଁ ଗମ୍ଭୀର ସଙ୍କଟରେ ଗତି କରୁଛି। ସେ କହିଛନ୍ତି, ’ଏହା ପ୍ରାୟତଃ ଭୁଶୁଡ଼ି ପଡ଼ିଛି ଏବଂ ଆମେ ଖୁବ ଶୀଘ୍ର ଏହାକୁ ସମ୍ଭାଳିବୁ।’ ଟ୍ରମ୍ପ କହିଛନ୍ତି ଯେ ସେଠାକାର ସାମ୍ୟବାଦୀ ସରକାର ଉପରେ ଚାପ ବଢ଼ୁଛି ଏବଂ ଇରାନ ସହ ଜଡ଼ିତ ଚଳିତ ବିବାଦର ସମାଧାନ ହେବା ପରେ ତାଙ୍କ ପ୍ରଶାସନ କ୍ୟୁବା ଉପରେ ଅଧିକ ଧ୍ୟାନ ଦେବ।
ଟ୍ରମ୍ପ କହିଛନ୍ତି , ଭେନେଜୁଏଲାରେ ପରିବର୍ତ୍ତନ ଯୋଗୁ କ୍ୟୁବାର ଆର୍ଥିକ ସମସ୍ୟା ଆହୁରି ଖରାପ ହୋଇଛି। ତାଙ୍କ ଅନୁସାରେ, ଭେନେଜୁଏଲା ଦୀର୍ଘ ସମୟ ଧରି ହାଭାନାକୁ ଆର୍ଥିକ ଏବଂ ଶକ୍ତି ସହାୟତା ଯୋଗାଇ ଆସୁଥିଲା। ଟ୍ରମ୍ପ କହିଛନ୍ତି, “ଏହା ଏକ ବିଫଳ ଦେଶ।” “ଭେନେଜୁଏଲା ବର୍ଷ ବର୍ଷ ଧରି ସେମାନଙ୍କୁ ସାହାଯ୍ୟ କରିଥିଲା କାରଣ ଏହାର ମାଟି ତଳେ ପ୍ରଚୁର ସମ୍ପତ୍ତି ଥିଲା,”। କ୍ୟୁବା ଆର୍ଥିକ ସଙ୍କଟର ସମ୍ମୁଖୀନ ହେଉଛି ଏବଂ ନିଜକୁ ବଞ୍ଚାଇବା ପାଇଁ ସମ୍ବଳର ଅଭାବ ରହିଛି। ଦେଶ ଭୋକର ସମ୍ମୁଖୀନ ହେଉଛି। ଏହାର ଶକ୍ତି ନାହିଁ, ତେଲ ନାହିଁ, ଟଙ୍କା ନାହିଁ, କିଛି ନାହିଁ, ହେଲେ ଏହାର ବହୁତ ଭଲ ଜମି ଅଛି।”
