କାବୁଲ,୨୧।୧୨: ନିକଟ ଭବିଷ୍ୟତରେ ଆଫଗାନିସ୍ତାନରେ ଅନ୍ତର୍ଜାତୀୟ କ୍ରିକେଟ ମ୍ୟାଚ୍ ଆୟୋଜନ କରିବାକୁ ଆଶା ପ୍ରକଟ କରିଛନ୍ତି ଦେଶର କ୍ରିକେଟ ବୋର୍ଡ ମୁଖ୍ୟ ଫର୍ହାନ ୟୁସେଫଜାଇ। ମୁଖ୍ୟତଃ ଭାରତରେ ଘରୋଇ ମ୍ୟାଚ୍ ଖେଳୁଥିବା ଆଫଗାନିସ୍ତାନକୁ ଦେଶରେ ଷ୍ଟାଡିୟମ ନିର୍ମାଣ ପାଇଁ ଯାଗା ମିଳିଛି।
ଆଫଗାନିସ୍ତାନ ରାଷ୍ଟ୍ରପତି ମହମ୍ମଦ ଅଶ୍ରଫ ଘନି ରବିବାର ଷ୍ଟାଡିୟମ ଲାଗି ଦେଶର ରାଜଧାନୀ କାବୁଲର ଆଲୋଖାଇଲ ଅଞ୍ଚଳରେ ୨ ଏକର ଜମି ଦେଇଛନ୍ତି। ଷ୍ଟାଡିୟମ ନିର୍ମାଣ ହେବା ପରେ ଆମେ ଦେଶରେ ଅନ୍ତର୍ଜାତୀୟ କ୍ରିକେଟ ଆୟୋଜନ କରିପାରିବୁ ବୋଲି ୟୁସେଫଜାଇ କହିଛନ୍ତି। ୩୫ ହଜାର କ୍ଷମତା ବିଶିଷ୍ଟ ଷ୍ଟାଡିୟମରେ ଏକ ପାଞ୍ଚ ତାରକା ଗେଷ୍ଟ ହାଉସ, ଷ୍ଟାଣ୍ଡାର୍ଡ ସୁଇମିଂ ପୁଲ, ଇନଡୋର-ଆଉଟ୍ ଡୋର ଏକାଡେମୀ, ହେଲ୍ଥ କ୍ଲିନିକ, ମସ୍ଜିଦ, କାର ପାର୍କିଂ, ପ୍ରଶାସନିକ ବିଭାଗ ଭଳି ବିଭିନ୍ନ ସୁବିଧା ରହିବ।
ଉଲ୍ଲେଖଥାଉ କି, କିଛି ବର୍ଷ ତଳେ ଆଇସିସିର ସମ୍ପୂର୍ଣ୍ଣ ସଦସ୍ୟତା ପାଇଥିବା ଆଫଗାନିସ୍ତାନ ତା’ର ପ୍ରାୟତଃ ଘରୋଇ ମ୍ୟାଚ୍ ଭାରତରେ ଖେଳୁଛି। ଭାରତର ଡେରାଡୁନ ଓ ଗ୍ରେଟର ନୋଏଡାଠାରେ ଆଫଗାନିସ୍ତାନ ଦଳକୁ ବିସିସିଆଇ ଦୁଇଟି ଷ୍ଟାଡିୟମ ବ୍ୟବହାର ପାଇଁ ଦେଇଛି।
