ଅନୁଗୋଳ,୧।୪(ମାନସ ବିଶ୍ୱାଳ): ଅନୁଗୋଳ ସହର ହନୁମାନ ବଜାରରେ ଏକ ଟ୍ରଲର ଦୁର୍ଘଟଣା ଘଟି ୨୦ ଘଣ୍ଟା ରାସ୍ତା ଜାମ ହୋଇଛି। ଫଳରେ ଲୋକଙ୍କ ଯାତାୟତରେ ନାହିଁ ନ ଥିବା ଅସୁବିଧା ହୋଇଛି। ଅନ୍ୟପକ୍ଷେ ଟଲରକୁ ରାସ୍ତାରୁ ହଟାଇବା ବ୍ୟବସ୍ଥା ନ ହେବାରୁ କଂଗ୍ରେସ କର୍ମୀମାନେ ଏହାର ପ୍ରତିବାଦ କରିଥିଲେ। ସୋମବାର ବିଳମ୍ବିତ ରାତିରେ ଏଭଳି ଅଭାବନୀୟ ସ୍ଥିତି ଦେଖିବାକୁ ମିଳିଛି।
ଆଇରନ୍ କଏଲ ନେଇ ଏକ ଟ୍ରଲର କର୍ନାଟକ ଯାଉଥିଲା। ହେଲେ ହନୁମାନ ବଜାରଠାରେ ଥିବା ହମ୍ପସରେ ଟ୍ରଲର ଡ୍ରାଇଭର ବ୍ରେକ ଦେବାରୁ ଆଇରନ୍ କଏଲ ଭାରସ୍ୟାମ ହରାଇ ଟ୍ରଲରର କ୍ୟାବିନ ଉପରେ ଚଢି ଯାଇଥିଲା। ଫଳରେ କ୍ୟାବିନ ସମ୍ପୂର୍ଣ୍ଣ ଭାଙ୍ଗି ଯାଇଥିଲା। ସୌଭାଗ୍ୟବଶତଃ କ୍ୟାବିନ ଭିତରେ ଥିବା ଡ୍ରାଇଭର ସୁରକ୍ଷିତ ଭାବେ ବାହାରକୁ ବାହାରି ଆସିଥିଲେ।
ହେଲେ ଟ୍ରଲର୍ ମୁଖ୍ୟ ରାସ୍ତା ଉପରେ ପଡ଼ିରହିଥିଲା। ଫଳରେ ପାଖାପାଖ ୨୦ ଘଣ୍ଟା ରାସ୍ତା ଜାମ ରହି ଗାଡି ଚଳାଚଳ ବାଧାପ୍ରାପ୍ତ ହୋଇଥିଲା। ଖବର ପାଇ ରାତିରେ ସ୍ଥାନୀୟ କଂଗ୍ରେସ ନେତା ଘଟଣାସ୍ଥଳରେ ପହଞ୍ଚି ତୁରନ୍ତ ରାସ୍ତା ଉପରୁ ଟ୍ରଲର୍କୁ ଉଠାଇବାକୁ ଦାବି କରିଥିଲେ। ହେଲେ ରାସ୍ତା ଉପରୁ ଟ୍ରଲର୍ ଉଠାଇବାରେ ବିଳମ୍ବ ହୋଇଥିବାରୁ କର୍ମମାନେ ତୀବ୍ର ଅସନ୍ତୋଷ ପ୍ରକାଶ କରିଥିଲେ।
ଏଥିରେ ଜିଲା କଂଗ୍ରେସର ବରିଷ୍ଠ ନେତା ବଲବୀର ସିଂ, ଲୁଲୁ ପାଣିଗ୍ରାହୀ, ପ୍ରଦ୍ୟୁମ୍ନ ସାହୁ, ଶଙ୍କର୍ଷଣ ସାହୁ, ସଂଗ୍ରାମ ବେହେରା, ବିଶ୍ବଜିତ୍ ବିଶ୍ବାଳଙ୍କ ସମେତ ବହୁ କଂଗ୍ରେସ କର୍ମୀ ଘଟଣାସ୍ଥଳରେ ଉପସ୍ଥିତ ରହି ରାସ୍ତା ଜାମ ହଟାଇବାକୁ ପ୍ରଶାସନ ଉପରେ ଚାପ ପକାଇଥିଲେ।
