ଭାବନଗର,୧୯।୧୧ : ଗୁଜରାଟ ବିଧାନସଭା ନିର୍ବାଚନ ତ୍ରିକୋଣୀୟ ଆଡ଼କୁ ମୁହାଁଇଛି। ଭାଜପା କଂଗ୍ରେସ ମଧ୍ୟରେ ପ୍ରତିଦ୍ୱନ୍ଦ୍ୱିତା ହେବ ବୋଲି ପୂର୍ବରୁ କୁହାଯାଉଥିବା ବେଳେ ଏବେ ଏଏପି ମଧ୍ୟ ନିର୍ବାଚନୀ ମଇଦାନରେ ଲଢ଼େଇ କରିବାକୁ ଅଣ୍ଟା ଭିଡ଼ିଛି। ଏଏପି ସଂଯୋଜକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲ ଗୁଜରାଟରେ ଦଳର ବିଜୟ ନିଶ୍ଚିତ ବୋଲି କହିଛନ୍ତି।
ଏହାକୁ ନେଇ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ଼ନାଭିସ ଏଏପିକୁ କଟାକ୍ଷ କରିଛନ୍ତି। ସେ କହିଛନ୍ତି ଏଏପି ବିବାହରେ ଆମନ୍ତ୍ରିତ ହୋଇ ନ ଥିବା ଡ୍ୟାନ୍ସର ଭଳି ଗୁଜରାଟକୁ ଆସି ନିର୍ବାଚନ ଲଢୁଛି। ବିନା ଆତିଥେୟତାରେ ଦଳ ରାଜ୍ୟକୁ ଆସିଛି। ଆମନ୍ତ୍ରିତ ହୋଇ ନ ଥିବା ଡ୍ୟାନ୍ସର ବିବାହରେ ଯୋଗଦେଇ ପୁଣି ଫେରି ଯାଇଥାନ୍ତି। ସେହିପରି ଏଏପି ଗୁଜରାଟକୁ ଆସିଛି, ଦଳ ପୁଣି ଫେରିଯିବ। ରାଜ୍ୟରେ ସଫଳ ନ ହୋଇ ଏଏପି ବିଫଳତା ନେଇ ଫେରିବା ନିଶ୍ଚିତ।
ଏଏପି ଗୋଆକୁ ଯାଇଥିଲା କିନ୍ତୁ କିଛି କରି ନପାରି ଫେରିଥିଲା। ସେଠାରେ ଦଳକୁ ମାତ୍ର ୨ଟି ଆସନ ମିଳିଥିଲା। ଗୁଜରାଟରେ ମଧ୍ୟ ସମାନ ସ୍ଥିତି ସୃଷ୍ଟି ହେବ।
ମିଥ୍ୟା ପ୍ରତିଶ୍ରୁତି ଦେବା ଏବଂ ମିଛ କହିବାରେ ଏଏପିକୁ କେହି ପାରିବେ ନାହିଁ। ଏକ୍ଷେତ୍ରରେ ଦଳ ଦେଶବ୍ୟାପି ଆଗୁଆ ରହିଛି। ଏନେଇ ଦଳକୁ ଅଲିମ୍ପିକ୍ ପୁରସ୍କାର ମିଳିବା କଥା ବୋଲି କହି ଫଡ଼ନାଭିସ ଭାବନଗରରେ ଏକ ରାଲିରେ ଯୋଗଦେଇ କଟାକ୍ଷ କରିଛନ୍ତି।
