କୁନ୍ଦୁରା,୨୪।୯,(ସନ୍ତୋଷ ପ୍ରହରାଜ): କୋରାପୁଟ ଜିଲା କୁନ୍ଦୁରା ବ୍ଲକ ଫୁପୁଗାଁ ଗ୍ରାମ ପଞ୍ଚାୟତ ଚନ୍ଦ୍ରଶୁଣ୍ଢୀଗୁଡା ଠାରେ ଲଗାଣ ବର୍ଷାରେ ଘର ଭୁଶୁଡି ମହିଳା ଗୁରୁତରହୋଇଛନ୍ତି। ମହିଳା ଜଣକ ହେଲେ ସେହି ଗ୍ରାମର ପର୍ଶୁରାମ ହରିଜନଙ୍କ ସ୍ତ୍ରୀ ରାଧିକା ହରିଜନ। ଶୁକ୍ରବାର ସକାଳ ୮ଟା ସମୟରେ ଘରେ ରୋଷେଇ କରୁଥିବା ବେଳେ ହଠାତ ଜୋରରେ ଶବ୍ଦ ହୋଇଥିଲା। ଯେତେବେଳେ ଘରର ସବୁ ଭାଗ ଭାଙ୍ଗି ରାଧିକାଙ୍କ ଉପରେ ପଡିଥିଲା ସେତେବେଳେ ସେ ଚିତ୍କାର କରିଥିଲେ। ସାହି ପଡିଶା ଆଖ ପାଖ ସମସ୍ତେ ଆସି ରାଧିକାଙ୍କୁ ସେଠାରୁ ଉଦ୍ଦାର କରି ବାହାରକୁ ଆଣିଥିଲେ। ପେଟରେ, ଛାତିରେ ଏବଂ ଗୋଡ ମାଡ଼ ହୋଇଥିବାରୁ ସଙ୍ଗେ ସଙ୍ଗେ 108 ଆମ୍ବୁଲାନ୍ସ ଯୋଗେ ତାଙ୍କୁ କୁନ୍ଦୁରା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ନେଇଥିଲେ। କୁନ୍ଦୁରା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଠାରେ ପ୍ରାୟ ୩ଘଣ୍ଟାରୁ ଅଧିକ ସମୟ ଚିକିତ୍ସା କରିଥିବା ବେଳେ ଦେହର ଅଧିକାଂଶ ସ୍ଥାନରେ ମାଡ଼ ବାଜିଥିବା ଜଣାପଡିଛି। ଫଳରେ ଅସହ୍ୟ ଯନ୍ତ୍ରଣା ହେଉଥିବା ନେଇ ରାଧିକାଙ୍କୁ ଜୟପୁର ଜିଲା ଚିକିତ୍ସାଲୟକୁ ସ୍ଥାନାନ୍ତର କରାଯାଇଛି। ଏଠାରେ ଏକ୍ସରେ ମେଶିନ ନଥିବା ଯୋଗୁ ରାଧିକାଙ୍କ ସ୍ବାସ୍ଥ୍ୟକୁ ନେଇ ବିଶେଷ କିଛି ଜଣାପଡି ନାହିଁ ବୋଲି ଡାକ୍ତର କହିଛନ୍ତି। ଏହି ଘଟଣା ଶୁଣିବା ପରେ ପଞ୍ଚାୟତ ରାଜ ପାନୀୟ ଜଳ ଯୋଗାଣ ମନ୍ତ୍ରୀ ରବିନାରାୟଣ ନାୟକ କୋଟପାଡ଼ ଗସ୍ତ ସମୟ ବଦଳାଇ କୁନ୍ଦୁରା ଗସ୍ତରେ ଆସିଥିଲେ। ଲଗାଣ ବର୍ଷାରେ ସଜାଗ ବ୍ଲକ ପ୍ରଶାସନ କିମ୍ବା ରାଜସ୍ବ ବିଭାଗର କୌଣସି ଅଧିକାରୀ ଗୁରୁତରଙ୍କ ନିକଟରେ ପହଞ୍ଚି ନଥିଲେ। ମନ୍ତ୍ରୀଙ୍କ ସମେତ ଜିଲାପାଳ ମନୋଜ ସତ୍ୟବାନ ମହାଜନ, ଉପଜିଲାପାଳ ଶୁଭ୍ରା ପଣ୍ଡାଙ୍କ କୁନ୍ଦୁରା ଗସ୍ତ ଥିବା ଜାଣି ବିଡ଼ିଓ ପି ମନସ୍ମିତା ତରବରିଆ ଭାବେ ଗୁରୁତରଙ୍କ ନିକଟକୁ ଜୟପୁର ଯିବା ସମୟରେ ସ୍ବାସ୍ଥ୍ୟ କେନ୍ଦ୍ରକୁ ଯାଇ ଆହତଙ୍କୁ ଦେଖିଥିଲେ। ମୁଖ୍ୟତଃ ରାଜସ୍ବ ବିଭାଗ ଏଥିରେ ତତ୍ପରତା ଦେଖାଇବା ପରିବର୍ତ୍ତେ ତହସିଲଦାର ବିନୋଦ ଚନ୍ଦ୍ର ନାୟକ କିମ୍ବା କୌଣସି ରାଜସ୍ବ ନିରୀକ୍ଷକଙ୍କ ଦେଖା ମିଳିନଥିଲା। ମନ୍ତ୍ରୀ କୁନ୍ଦୁରା ପହଞ୍ଚିବା ସମୟରେ ବିଧାୟକ ପ୍ରତିନିଧି ବଦ୍ରିନାରାୟଣ ଆଚାର୍ଯ୍ୟ, ଏମପି ପ୍ରତିନିଧି ଅମ୍ବୁ ପାତ୍ର,ଆଇଟି ସଂଯୋଜକ ସନ୍ତୋଷ ପ୍ରହରାଜ,ମଣ୍ଡଳ ସଭାପତି ପଦ୍ମନାଭ ବିଷୋୟୀ, ସମ୍ପାଦକ ତ୍ରିନାଥ, ତୁଷାର ଭଟ୍ଟ ଏବଂ ଲଛମନ ଭତ୍ରାଙ୍କ ସହ ଭେଟି ଗୁରୁତରଙ୍କ ବିଷୟରେ ଆଲୋଚନା କରିଥିଲେ।
