ଭୁବନେଶ୍ୱର, ୨୫।୪ (ବ୍ୟୁରୋ): ଭୁବନେଶ୍ୱର ମହାନଗର ନିଗମ (ବିଏମ୍ସି)ର ଏକାମ୍ର ହଲରେ ‘ଆମ ପୋଖରୀ’ ସମ୍ପର୍କିତ ଏକ ଦକ୍ଷତା ବୃଦ୍ଧି ତାଲିମ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏଥିରେ ମେୟର ସୁଲୋଚନା ଦାସ ଅଧ୍ୟକ୍ଷତା କରି ‘ଜଳାଶୟ ଆମ ଐତିହ୍ୟର ଅଙ୍ଗ, ଏହାର ସୁରକ୍ଷା ଆମର ଦାୟିତ୍ୱ’ ବୋଲି କହିଥିଲେ। ଜଳାଶୟଗୁଡିକ ଅତୀତରେ ପ୍ରାକୃତିକ କିମ୍ବା ସ୍ଥାନୀୟ ଲୋକ ବା ସରକାରଙ୍କ ଦ୍ୱାରା ଖୋଳା ଯାଇଥିଲା। ଏହି ଜଳାଶୟଗୁଡିକର ଜଳ ଲୋକଙ୍କ ବହୁବିଧ କାର୍ଯ୍ୟରେ ଲାଗୁଥିଲା। ମାତ୍ର ଏବେ ଜଳାଶୟଗୁଡିକ ପୋତିହେବା ସହ ପଙ୍କ ଓ ଦଳରେ ପୂର୍ଣ୍ଣ ହୋଇ ରହିଛି। ସେଥିରୁ ଦୁର୍ଗନ୍ଧ ବାହାରିବା ସହ ମଶା ଓ ମାଛି ବଂଶ ବୃଦ୍ଧିର କାରଣ ପାଲଟିଛି। ଦ୍ରୁତ ସହରୀକରଣ ଯୋଗୁ ଏହି ଜଳାଶୟଗୁଡିକ ଆଜି ବିପଦରେ ଏବଂ ମାନବ ସମାଜ ପାଇଁ ଏହା ଚ୍ୟାଲେଞ୍ଜ ସୃଷ୍ଟି କରିଛି। ସରକାରଙ୍କ ପକ୍ଷରୁ ଏଥିପାଇଁ ବ୍ୟଗ୍ରତା ପ୍ରକାଶ ପାଇବା ସହ ସ୍ବତନ୍ତ୍ର କାର୍ଯ୍ୟକ୍ରମ ‘ଆମ ପୋଖରୀ’ ହାତକୁ ନିଆଯାଇଛି ବୋଲି ମେୟର କହିଥିଲେ। ବିଏମ୍ସି କମିଶନର ବିଜୟ ଅମୃତା କୁଲାଙ୍ଗେ ଯୋଗଦେଇ ଆମ ପୋଖରୀ ଯୋଜନାରେ ସମୁଦାୟ ୩୯ଟି ସ୍ବୟଂ ସହାୟକ ଗୋଷ୍ଠୀଙ୍କୁ ସାମିଲ କରାଯାଇଛି ବୋଲି କହିଥିଲେ। ଏଥିରେ ପ୍ରଥମତଃ ୨ଟି ମୁଖ୍ୟ ପ୍ରକଳ୍ପ ଫିଶେରି ଟ୍ୟାଙ୍କ ଲକ୍ଷ୍ମୀସାଗର ଏବଂ ଝରଣା ପୋଖରୀ (ସ୍ପ୍ରିଙ୍ଗ ଟ୍ୟାଙ୍କ) ଡ୍ରେନ୍ ନମ୍ବର ୭ର କାର୍ଯ୍ୟ କରାଯିବ। ଏହାର ନବୀକରଣ କରାଯାଇ ଏହି ସ୍ଥାନକୁ ସହରର ସୌନ୍ଦର୍ଯ୍ୟକରଣ ଏବଂ ପରିବେଶ ଉତ୍ଥାନକୁ ନିଶ୍ଚିତ କରାଯିବ। ସରକାରୀ ନିୟମ ଏବଂ ପରସ୍ପର ମଧ୍ୟରେ ସମନ୍ବୟ ରକ୍ଷାକରି ଯେପରି ପ୍ରକଳ୍ପ କାର୍ଯ୍ୟ ସମ୍ପୂର୍ଣ୍ଣ କରାଯିବ, ସେ ନେଇ ଗୃହ ଓ ନଗର ଉନ୍ନୟନ ବିଭାଗ ମୁଖ୍ୟଯନ୍ତ୍ରୀ ତଥା ସ୍ବତନ୍ତ୍ର ସଚିବ ଡ. ଭକ୍ତକବି ଦାସ ତାଲିମ ଦେଇଥିଲେ।
ଲକ୍ଷ୍ମୀସାଗର ଅନ୍ତର୍ଗତ ଫିଶେରି ଟ୍ୟାଙ୍କ ପାଇଁ ମୋଟ ୨୪ଟି ସ୍ବୟଂ ସହାୟକ ଗୋଷ୍ଠୀଙ୍କୁ ଚୟନ କରାଯାଇଥିବାବେଳେ ସ୍ପ୍ରିଙ୍ଗ ଟ୍ୟାଙ୍କ ପାଇଁ ୧୫ ଗୋଷ୍ଠୀଙ୍କୁ ଚୟନ କରାଯାଇଛି। ସେମାନେ ଏହି ଦୁଇଟି ପ୍ରକଳ୍ପର ପୁନଃ ନବୀକରଣ ବା ପାଣି ନିଷ୍କାସନ, ଦଳ ଓ ପଙ୍କୋଦ୍ଧାର କରିବା, ନିକଟରେ ଜଗିଙ୍ଗ ଟ୍ରାକ ନିର୍ମାଣ, ପିଲାମାନଙ୍କ ପାର୍କ, ସବୁଜୀକରଣ ପାଇଁ ବୃକ୍ଷ ରୋପଣ, ପାଣି ଯାତାୟାତ ପାଇଁ ବ୍ୟବସ୍ଥା ଆଦି କରିବେ। କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଡେପୁଟି ମେୟର ମଞ୍ଜୁଲତା କଅଁର, ଗୃହ ଓ ନଗର ଉନ୍ନୟନ ବିଭାଗ ସ୍ବତନ୍ତ୍ର ସଚିବ ସାଗରିକା ପଟ୍ଟନାୟକ, ଡେପୁଟି କମିଶନର ମନୋରଞ୍ଜନ ସାହୁ, ସିଟି ଇଂଜିନିୟର ଅରୁଣ କୁମାର ନାୟକ, କର୍ପୋରେଟର ଭରତ କୁମାର ଲେଙ୍କା, ଶ୍ରୀଧର ବେହେରା ପ୍ରମୁଖ ଯୋଗଦେଇଥିଲେ। ଏଥିରେ ୩୯ଟି ଏସ୍ଏଚ୍ଜିର ୧୬୦ ଜଣ ମହିଳା ତାଲିମ ନେଇଥିଲେ।
