ଦିଗପହଣ୍ଡି,୨୩ା୮(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡିଠାରେ ଶନିବାର ଆଧ୍ୟାତ୍ମିକ ଜ୍ଞାନ ପ୍ରଚାର ସଭା ଅନୁଷ୍ଠିତ ହୋଇଯାଇଛି। ପ୍ରମୋଦ ପଣ୍ଡାଙ୍କ ବାସଭବନରେ ଆୟୋଜିତ ସଭାରେ ପୁରୀ ଗୋବର୍ଦ୍ଧନ ପୀଠର ଜଗଦ୍ଗୁରୁ ଶଙ୍କରାଚାର୍ଯ୍ୟ ସ୍ବାମୀ ନିଶ୍ଚଳାନନ୍ଦ ସରସ୍ବତୀ ମହାରାଜଙ୍କ କାର୍ଯ୍ୟକ୍ରମ ପ୍ରମୁଖ ପ୍ରେମଚନ୍ଦ୍ର ଝା, ଗଜପତି ଜିଲା ମହେନ୍ଦ୍ରଗିରି ପାହାଡ଼ ପର୍ଶୁରାମ ଧାମର ସନ୍ଥ ଭାସ୍କର ତୀର୍ଥ ଲକ୍ଷ୍ମୀ ବାବା ଅତିଥି ଭାବେ ଯୋଗଦେଇ ସନାତନ ସଂସ୍କୃତିର ସୁରକ୍ଷା, ହିନ୍ଦୁଧର୍ମର ପ୍ରଚାର ପ୍ରସାର ଓ ଜାଗରଣ ନେଇ ବିସ୍ତୃତ ଆଲୋଚନା କରିବା ସହ ସନାତନ ଧର୍ମର ମହତ୍ତ୍ୱ ଓ ଆଧ୍ୟାତ୍ମିକ ଚେତନା ସମ୍ପର୍କରେ ମାର୍ଗଦର୍ଶନ କରିଥିଲେ। ସଂସ୍କୃତ ଭାଷାର ପୁନରୁଦ୍ଧାର, ସଂସ୍କୃତ ଭାଷାର ବିକାଶ ଓ ପ୍ରସାର ପାଇଁ ଗାଁ ଗାଁରେ ବନ୍ଦ ହୋଇଯାଇଥିବା ସଂସ୍କୃତ ବିଦ୍ୟାଳୟଗୁଡ଼ିକୁ ପୁନଃ ଖୋଲାଯିବା ସହ ସେଗୁଡିକୁ ସକ୍ରିୟ କରିବା ଆବଶ୍ୟକ ବୋଲି ସଭାରେ ଗୁରୁତ୍ୱାରୋପ କରାଯାଇଥିଲା। ଏହାସହିତ ଗ୍ରାମାଞ୍ଚଳରେ ନିରୀହ ଲୋକଙ୍କୁ ବିଭିନ୍ନ ପ୍ରଲୋଭନ ଦେଖାଇ କରାଯାଉଥିବା ବେଆଇନ ଧର୍ମାନ୍ତରୀକରଣ ପ୍ରକ୍ରିୟା ଉପରେ ଗଭୀର ଚିନ୍ତା ପ୍ରକଟ କରାଯାଇଥିଲା। ଗ୍ରାମୀଣ ସମସ୍ୟାର ସମାଧାନ ପାଇଁ ସମାଜରେ ବ୍ୟାପକ ଜନ ସଚେତନତା ସୃଷ୍ଟି କରିବା ସହ ପ୍ରତ୍ୟେକ ସନାତନୀ ଭଉଣୀ ଭାଇ ଏକଜୁଟ୍ ହୋଇ କାର୍ଯ୍ୟ କରିବାକୁ ଆହ୍ବାନ ଦିଆଯାଇଥିଲା। ସଭାରେ ବହୁ ସଂଖ୍ୟାରେ ସନାତନପ୍ରେମୀ ଓ ମା ’ ଚାମୁଣ୍ଡାଙ୍କ ଭକ୍ତ ବୃନ୍ଦ ଯୋଗଦେଇଥିଲେ। ସଭା ପୂର୍ବରୁ ଅତିଥି ଦ୍ବୟ ଦିଗପହଣ୍ଡିସ୍ଥିତ ଚାଙ୍ଗୁଡି ଦେଇ ପର୍ବତ ଶିଖରରେ ପୂଜିତ ମା’ ଚାମୁଣ୍ଡା ଦେବୀଙ୍କ ମନ୍ଦିର ପରିଦର୍ଶନ କରିବା ସହ ଦେବୀଙ୍କ ପୂଜାର୍ଚ୍ଚନା କରିଥିଲେ।
