ମହାକାଳପଡ଼ା,୧୬ା୧ (ପ୍ରତାପ ଚନ୍ଦ୍ର ସ୍ବାଇଁ): ରାଜ୍ୟରେ ରାସ୍ତାଘାଟ ଓ ପୋଲ ନିର୍ମାଣ ପାଇଁ ଅର୍ଥ ଖର୍ଚ୍ଚ ହେଉଛି। ହେଲେ ଆଜି ବି ପକ୍କା ରାସ୍ତା ଖଣ୍ଡେ ଅଭାବରୁ ଆମ୍ବୁଲାନ୍ସ ଗାଁରେ ପହଞ୍ଚି ପାରୁନାହିଁ। କେଉଁଠି ଡାକ୍ତରଖାନା ଯିବାକୁ ରୋଗୀଟିକୁ ଅଧାରାସ୍ତା ଖଟିଆ ହେଉ କି ବାଉଁଶ ଭାରରେ ବୁହା ହେଉଛି। ସରକାରଙ୍କ ବିକାଶର ନଗ୍ନଚିତ୍ର କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ପେଟ୍ଛେଲା ପଞ୍ଚାୟତ ଜଙ୍ଗଲ ଘେରି ଶବରପଡ଼ା ଗ୍ରାମରୁ ସାମ୍ନାକୁ ଆସିଛି। ଗ୍ରାମର ମଙ୍ଗଳା ଭକ୍ତା (୪୦) ଝାଡ଼ାବାନ୍ତିରେ ଗୁରୁତର ହୋଇପଡ଼ିବାରୁ ଡାକ୍ତରଖାନା ନେବା ପାଇଁ ଦୀର୍ଘ ୧ କି.ମି ବାଉଁଶ ଭାରରେ ବୋହିବାକୁ ପଡ଼ିଛି।
ଶବରପଡ଼ା ଗ୍ରାମର ମଙ୍ଗଳା ଗୁରୁବାର ଝାଡ଼ାବାନ୍ତି ହୋଇ ଗୁରୁତର ହୋଇପଡ଼ିଥିଲେ। ତାଙ୍କ ପରିବାର ଲୋକେ ଡାକ୍ତରଖାନା ନେବାକୁ ୧୦୮ ଆମ୍ବୁଲାନ୍ସ ସହ ଯୋଗାଯୋଗ କରିଥିଲେ। କିନ୍ତୁ ଗାଁ କୁ ରାସ୍ତା ନ ଥିବାରୁ ଆମ୍ବୁଲାନ୍ସ ଅଧାବାଟରେ ଅଟକି ରହିଥିଲା। ଫଳରେ ଅନ୍ୟ ଉପାୟ ନ ପାଇ ପରିବାର ଲୋକେ ଏବଂ ଗ୍ରାମବାସୀ ଗୁରୁତର ଅବସ୍ଥାରେ ମଙ୍ଗଳଙ୍କୁ ଏକ ଭାରରେ ୧ କି.ମି. ବୋହି ନେଇ ଆମ୍ବୁଲାନ୍ସ ପାଖରେ ପହଞ୍ଚାଇଥିଲେ। ସେଠାରୁ ତାଙ୍କୁ ଚିକିତ୍ସା ପାଇଁ ମହାକାଳପଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନିଆଯାଇଥିଲା। ରାସ୍ତା ଖଣ୍ଡିଏ ନ ଥିବାରୁ ଉପାନ୍ତ ଅଞ୍ଚଳ ଶବରପଡ଼ା ଲୋକେ ଏଭଳି ସମସ୍ୟାର ଶିକାର ହେଉଥିବା ବେଳେ ବାରମ୍ବାର ଦାବି ଓ ଅଭିଯୋଗ ସତ୍ତ୍ୱେ କୌଣସି ଫଳ ମିଳୁନାହିଁ। ଗାଁକୁ ଭଲ ରାସ୍ତା ଖଣ୍ଡିଏ ନ ଥିବାରୁ ଲୋକେ ଆମ୍ବୁଲାନ୍ସ ସେବାରୁ ବଞ୍ଚିତ ହେଉଛନ୍ତି। ଏନେଇ ଦୀର୍ଘଦିନ ଧରି ସ୍ଥାନୀୟ ଲୋକେ ପ୍ରଶାସନ, ଜନପ୍ରତିନିଧିଙ୍କୁ ଅଭିଯୋଗ କରିଆସୁଛନ୍ତି। ଏପରିକି ବ୍ଲକ ମିଳିତ ଜନଶୁଣାଣିରେ ଲିଖିତ ଅଭିଯୋଗ ପତ୍ର ଗ୍ରାମବାସୀ ଦେଇଥିଲେ। ରାଜ୍ୟ ବିଧାନସଭା ବାଚସ୍ପତି ସୁରମା ପାଢ଼ୀଙ୍କୁ ଗ୍ରାମବାସୀ ଭେଟି ଦୁଃଖ ଜଣାଇଥିଲେ ମଧ୍ୟ କୌଣସି ସୁଫଳ ମିଳୁନାହିଁ। ଯାହା ବୁଦ୍ଧିଜୀବୀମାନେ ଆମ ବ୍ୟବସ୍ଥା ଉପରେ ପ୍ରଶ୍ନ ଉଠାଇବା ସହ ଏହା ହିଁ ହେଉଛି ଆମ ବିକାଶର ଅସଲ ଚିତ୍ର ବୋଲି କହି ଅସନ୍ତୋଷ ପ୍ରକାଶ କରିଛନ୍ତି।
