କେସିଙ୍ଗା,୧୮ା୪(ତୁମେଶ୍ୱର ସାହୁ)- ଗ୍ରୀଷ୍ମତାତିକୁ ଦୃଷ୍ଟିରେ ରଖି କେସିଙ୍ଗା ଗୋଷ୍ଠୀ ପ୍ରାଣୀ ଚିକିତ୍ସା ଅଧିକାରୀଙ୍କ କାର୍ଯ୍ୟାଳୟ ଅନ୍ତର୍ଗତ ବିଭିନ୍ନ ପ୍ରାଣୀ ଚିକିତ୍ସାଳୟ ଓ ପ୍ରାଣୀସମ୍ପଦ ସହାୟକ କେନ୍ଦ୍ରରେ ଗୃହପାଳିତ ପ୍ରାଣୀଙ୍କ ପାଇଁ ପାନୀୟଜଳ କୁଣ୍ଡ ନିର୍ମାଣ ପାଇଁ ଚାଷୀମାନେ ଦାବି କରିଛନ୍ତି।
ସୂଚନା ମୁତାବକ ଏହି ବ୍ଲକରେ ତୁଣ୍ଡଳା, ପାଷ୍ଟିକୁଡି, କେସିଙ୍ଗା ପ୍ରାଣୀ ଚିକିତ୍ସାଳୟ ସହ ୧୩ଟି ପ୍ରାଣୀସମ୍ପଦ ସହାୟକ କେନ୍ଦ୍ର ରହିଛି। ଗାଷ୍ଠୀ ପ୍ରାଣୀ ଚକିତ୍ସା ଅଧିକାରୀଙ୍କ ସୂଚନାକ୍ରମେ ବ୍ଲକରେ ୧୮,୧୪୬ ଗାଈ ବଳଦ, ୧୯୬ ମଇଁଷି, ୨୫,୯୭୬ଟି ଛେଳି, ୫୩୦୧ ମେଣ୍ଢା ଓ ୨୫୦୦ଟି ବତକ ରହିଛନ୍ତି। ବର୍ତ୍ତମାନ ବ୍ଲକ ଅଞ୍ଚଳରେ ତାପମାତ୍ରା ୪୨ଡିଗ୍ରୀ ଉପରେ ରହୁଥିବାରୁ ପୋଖରୀ, ନଈ, ନାଳ, ଚେକ୍ଡ୍ୟାମ୍, କୂଅରେ ପାଣି ଶୁଖିବାକୁ ବସିଛି।
ଗୃହପାଳିତ ପ୍ରାଣୀଙ୍କ ଗାଧୋଇବା ଓ ପିଇବା ପାଇଁ ଜଳ ବ୍ୟବସ୍ଥା ନ ଥିବାରୁ ଚାଷୀମାନେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଏ ନେଇ ସେମାନେ ଗୋଷ୍ଠୀ ପ୍ରାଣୀ ଚକିତ୍ସାଧିକାରୀଙ୍କୁ ଲିଖିତ ଅଭିଯୋଗ କରିଥିଲେ ସୁଦ୍ଧା ସୁଫଳ ମିଳିନାହିଁ। ତୁରନ୍ତ ପ୍ରତି ପଞ୍ଚାୟତରେ ପାନୀୟଜଳ ଓ ଜଳକୁଣ୍ଡ ନିର୍ମାଣ ପାଇଁ ଚାଷୀମାନେ ଦାବି କରିଛନ୍ତି।
ଏ ସଂକ୍ରାନ୍ତରେ କେସିଙ୍ଗା ଗୋଷ୍ଠୀ ପ୍ରାଣୀ ଚିକିତ୍ସାଳୟର ସହ ପ୍ରାଣୀସମ୍ପଦ ସହାୟକ ଡା. ସୌମ୍ୟ ରଞ୍ଜନ ଦାଶଙ୍କୁ ପଚାରୁବାରୁ ଗୃହପାଳିତ ପ୍ରାଣୀଙ୍କ ପାଇଁ ପାନୀୟଜଳ ଓ ଜଳକୁଣ୍ଡ ନିର୍ମାଣ ପାଇଁ ବିଭାଗ ପକ୍ଷରୁ କୌଣସି ଆର୍ଥିକ ସହାୟତା ସୁବିଧା ନାହିଁ, ଆମେ ଏ ନେଇ କେସିଙ୍ଗା ବିଡିଓଙ୍କୁ ଲିଖିତ ଆକାରରେ ଜଣାଇଛୁ ବୋଲି ପ୍ରକାଶ କରିଥିଲେ।
