ଛତ୍ରପୁର,୧୮ା୪(ଦିଲ୍ଲୀପ ସାମଲ): ଗଞ୍ଜାମ ଜିଲାରେ ସାମାଜିକ ଭିତିଭୂମିର ଉନ୍ନତି ପାଇଁ ସରକାରୀସ୍ତରରେ ବିଭିନ୍ନ ଯୋଜନାକୁ ତ୍ୱରାନ୍ବିତ କରାଯାଉଛି । ସ୍ବାସ୍ଥ୍ୟ ସେବା, ଶିକ୍ଷା ଏବଂ ପାନୀୟ ଜଳ ବ୍ୟବସ୍ଥାରେ ବ୍ୟାପକ ସଂସ୍କାର ଆଣିବାକୁ ପଦକ୍ଷେପ ଗ୍ରହଣ କରାଯାଉଥିବା ଶନିବାର ଗଞ୍ଜାମ ଜିଲାପାଳଙ୍କ ସମ୍ମିଳନୀ କକ୍ଷରେ ରାଜ୍ୟ ଖଣି, ବାଣିଜ୍ୟ ଓ ପରିବହନ ମନ୍ତ୍ରୀ ବିଭୂତି ଭୂଷଣ ଜେନା କହିଛନ୍ତି।
ମନ୍ତ୍ରୀ ଜେନାଙ୍କ ଅଧ୍ୟକ୍ଷତାରେ ହୋଇଥିବା ବୈଠକରେ ସେ ସୂଚନା ଦେଇ କହିଛନ୍ତି, ଗଞ୍ଜାମ ଜିଲାକୁ ସବୁ କ୍ଷେତ୍ରରେ ଆଗୁଆ ରଖିବା ଏବଂ ବିଭିନ୍ନ ବିଭାଗର କାର୍ଯ୍ୟଗୁଡିକ ଠିକ ଭାବେ ପରିଚାଳନା କରି ଜିଲାକୁ ରାଜ୍ୟର ଶ୍ରେଷ୍ଠ ଜିଲାରେ ପରିଗଣିତ କରିବାକୁ ପ୍ରୟାସ କରାଯାଉଛି।
ଶିକ୍ଷା,ସ୍ବାସ୍ଥ୍ୟ ଓ ପାନୀୟ ଜଳ ବିଭାଗର ସୁବନ୍ଦୋବସ୍ତ ନେଇ ଏକ ରୋଡ ମ୍ୟାପ ଆରମ୍ଭ କରାଯାଉଛି। ଜିଲାରେ ବହୁ ସ୍ଥାନରେ ଠିକ ଭାବେ ଶିକ୍ଷକ ଆସୁନାହାନ୍ତି, କେଉଁଠି ଆବଶ୍ୟକଠାରୁ ଅଧିକ ଶିକ୍ଷକ ରହୁଛନ୍ତି, କେଉଁଠି କମ ରହିଛନ୍ତି, କେଉଁଠି ପାଳି କରି ଶିକ୍ଷକ ଆସୁଥିବା ବୈଠକରେ ଉପସ୍ଥିତ ଥିବା ସୋରଡା ବିଧାୟକ ନିଳମଣି ବିଷୋୟୀ କହିଥିଲେ।
ଜିଲାରେ ୬୦ ପ୍ରତିଶତ ଡାକ୍ତର ଅଭାବ ରହିଛି । ଆଗାମୀ ଦିନରେ ଶିକ୍ଷା କ୍ଷେତ୍ରରେ ଏକ ନୂଆ ବ୍ୟବସ୍ଥା ଆରମ୍ଭ ହେବ । ହ୍ୟାଣ୍ଡ ହୋଲିଡିଂ ଓ ଜାତୀୟ ଶିକ୍ଷା ନୀତି ପଦ୍ଧତିରେ ଶିକ୍ଷା ବ୍ୟବସ୍ଥା ଦୃଢ କରାଯିବ। କଲେଜର ପ୍ରିନ୍ସପାଲ ଏବେ କିଛି ସ୍କୁଲର ଦାୟିତ୍ୱ ନେବେ। ସେଠାରେ ସେ ଶିକ୍ଷା ବ୍ୟବସ୍ଥା ଏବଂ ମାର୍ଗଦର୍ଶନ କରିବେ। ବଡ ଶିକ୍ଷାନୁଷ୍ଠାନ ଛୋଟ ଶିକ୍ଷାନୁଷ୍ଟାନ ପ୍ରତି ଉତ୍ତର ଦାୟିତ୍ୱ ଓ ମାର୍ଗଦର୍ଶନ ସାଜିବେ। ଏହାଦ୍ୱାରା ଡ୍ରପ ଆଉଟ ହ୍ରାସ ହେବ। ଆଗାମୀ ଦିନରେ ପ୍ରତ୍ୟେକ ବିଦ୍ୟାଳୟ ଡିଜିଟାଲ ହେବ। ଶିକ୍ଷକ ଓ ଛାତ୍ରମାନଙ୍କୁ ଆର୍ଏଫ୍ଆଇଡି ପରିଚୟ ପତ୍ର ପ୍ରଦାନ କରାଯିବ। ସିସିଟିଭି କ୍ୟାମେରା ଲାଗିବ। ଏହାଦ୍ୱାରା ବିଦ୍ୟାଳୟର ସମସ୍ତ ତଥ୍ୟ ମିଳିପାରିବ। ଜିଲାରେ ମାଧ୍ୟମିକସ୍ତରରେ ୧୩ ରୁ ୧୫ ପ୍ରତିଶତ ଡ୍ରପଆଉଟ ହାର ରହିଛି। ୩୦ ପ୍ରତିଶତ ଶିକ୍ଷକ ପଦବୀ ଖାଲି ରହିଥିବା ନେଇ ବୈଠକରେ ଆଲୋଚନା ହୋଇଥିଲା।
ସେହିପରି ସ୍ବାସ୍ଥ୍ୟସେବା ବ୍ୟବସ୍ଥା ପାଇଁ ସମସ୍ତ ସ୍ବାସ୍ଥ୍ୟକେନ୍ଦ୍ରରେ ସିସି ଟିଭି କ୍ୟାମେରା ଲାଗିବ। ସମସ୍ତଙ୍କୁ ଆରଏଫଆଇଡି ପରିଚୟ ପତ୍ର ପ୍ରଦାନ, ପିଏଚସିରେ ଇସିଜି, ବ୍ଲଡ ଟେଷ୍ଟ ବ୍ୟବସ୍ଥା ହେବ। ପ୍ରାଣୀ ଚିକିତ୍ସାଳୟଗୁଡିକରେ ଆମ୍ବୁଲାନ୍ସ ବ୍ୟବସ୍ଥା କରାଯିବ। ସେହିପରି ପାନୀୟ ଜଳ ବ୍ୟବସ୍ଥାରେ ମଧ୍ୟ ସୁଧାର ଆସିବା ପାଇଁ ଆଲୋଚନା ହୋଇଥିଲା। ଜିଲାରେ ୩୦ଟି ସ୍ଥାନରେ ପାଣି ପାଇଁ କିଡିନି ରୋଗ ହେଉଥିବା କୁହାଯାଇଛି। କାଳିପଲ୍ଲୀ,ହରିପୁର ଆଦି ସ୍ଥାନରେ ଏପରି ଦେଖାଦେଉଛି । ସେଠାରେ ଆରଓ ପ୍ଲାଟ ଏବଂ ୱାଟର ଏଟିଏମ ଲଗାଯିବ । ଆସନ୍ତା ୧୦ ତାରିଖ ମଧ୍ୟରେ ଏହା ଲାଗିବ। ଯେଉଁଠି ପାଣି ସମସ୍ୟା ରହିଛି ତୁରନ୍ତ ବିକଳ୍ପ ବ୍ୟବସ୍ଥା କରିବାକୁ କୁହାଯାଇଛି । ଏନେଇ ୭ ଦିନ ମଧ୍ୟରେ ଏକ ଆକ୍ସନ ପ୍ଲାନ ପ୍ରଦାନ କରିବାକୁ ମନ୍ତ୍ରୀ ଜେନା ଜିଲାପାଳ ଭି.କୀର୍ତ୍ତି ଭାସନଙ୍କୁ ନିର୍ଦ୍ଦେଶ ଦେଇଛନ୍ତି। ଏସବୁକୁ ପ୍ରଶାସନିକ ଅଧିକାରୀମାନେ ମନିଟରିଂ କରିବେ। ଚଳିତ ମାସ ଶେଷ ସପ୍ତାହରେ ସ୍ବାସ୍ଥ୍ୟ ବ୍ୟବସ୍ଥା ନେଇ ଏକ କନକ୍ଲେଭ କରାଯିବ । ଶିକ୍ଷା ଓ ପାନୀୟ ବ୍ୟବସ୍ଥାକୁ ନେଇ ମଧ୍ୟ ମେ ପ୍ରଥମ ସପ୍ତାହରେ ଏକ କନକ୍ଲେଭ ହେବ। ବୈଠରେ ଗଞ୍ଜାମ ଅତିରିକ୍ତ ଜିଲାପାଳ ଦେବଦତ୍ତ ପଣ୍ଡା, ବ୍ରହ୍ମପୁର ବିଶ୍ୱବିଦ୍ୟାଳୟ ଭିସି, ଆଇଜର ଡିନ, ଜିଲା ଶିକ୍ଷାଧିକାରୀ ଅଜୟ ପାତ୍ର, ଜିଲା ସ୍ବାସ୍ଥ୍ୟ ଅଧିକାରୀଙ୍କ ସମେତ ବିଭାଗୀୟ ଅଧିକାରୀମାନେ ଉପସ୍ଥିତ ଥିଲେ।
