ଢାକା,୧୯।୧୨: ଗତବର୍ଷ ବାଂଲାଦେଶରେ ପୂର୍ବତନ ପ୍ରଧାନମନ୍ତ୍ରୀ ଶେଖ ହାସିନାଙ୍କ ବିରୋଧରେ ହିଂସାତ୍ମକ ଆନ୍ଦୋଳନ ଆରମ୍ଭ କରିଥିବା ବିରୋଧୀ ନେତା ଉସମାନ ହାଦିଙ୍କ ସିଙ୍ଗାପୁରରେ ମୃତ୍ୟୁ ହୋଇଥିଲା। କିଛି ଦିନ ପୂର୍ବରୁ ଉସମାନ ହାଦିଙ୍କୁ ଗୁଳି କରି ଆହତ କରାଯାଇଥିଲା। ବାଂଲାଦେଶର ମଧ୍ୟବର୍ତ୍ତୀକାଳୀନ ସରକାରଙ୍କ ମୁଖ୍ୟ ପରାମର୍ଶଦାତା ମହମ୍ମଦ ୟୁନୁସ ତାଙ୍କ ମୃତ୍ୟୁରେ ଶୋକ ପ୍ରକାଶ କରିଛନ୍ତି।
ମହମ୍ମଦ ୟୁନୁସ ଦେଶ ଉଦ୍ଦେଶ୍ୟରେ ତାଙ୍କ ଅଭିଭାଷଣରେ କହିଛନ୍ତି, ଆଜି ମୁଁ ଆପଣମାନଙ୍କୁ ସମସ୍ତଙ୍କୁ ଏକ ଅତ୍ୟନ୍ତ ଦୁଃଖଦ ଖବର ପ୍ରଦାନ କରୁଛି। ଜୁଲାଇ ବିଦ୍ରୋହର ଜଣେ ନିର୍ଭୀକ ଯୋଦ୍ଧା ଏବଂ ସିଙ୍ଗାପୁରରେ ଚିକିତ୍ସାଧୀନ ଇନକିଲାବ ମଞ୍ଚର ମୁଖପାତ୍ର ଶରିଫ ଉସମାନ ହାଦି ଆଉ ଆମ ମଧ୍ୟରେ ନାହାନ୍ତି। ଆଲ୍ଲା ତାଙ୍କୁ ଶାନ୍ତି ପ୍ରଦାନ କରନ୍ତୁ। କିଛି ମୁହୂର୍ତ୍ତ ପୂର୍ବରୁ, ସିଙ୍ଗାପୁରର ବୈଦେଶିକ ମନ୍ତ୍ରୀ ଭିଭିଆନ ବାଲକ୍ରିଷ୍ଣନ ମୋତେ ଫୋନ ମାଧ୍ୟମରେ ଏହି ଦୁଃଖଦ ଖବର ବିଷୟରେ ଜଣାଇଥିଲେ। ମୁଁ ପ୍ରାର୍ଥନା କରୁଛି, ସର୍ବଶକ୍ତିମାନ ପରମେଶ୍ୱର ଫାସିବାଦ ଏବଂ ସାମ୍ରାଜ୍ୟବାଦ ବିରୋଧରେ ସଂଘର୍ଷର ଏହି ଅମର ସୈନିକଙ୍କୁ ଶହୀଦ ଭାବରେ ଗ୍ରହଣ କରନ୍ତୁ।
ୟୁନୁସ କହିଥିଲେ,ଆସନ୍ତୁ ଆମେ ସମସ୍ତେ ମିଶି ପ୍ରାର୍ଥନା କରିବା। ଶରିଫ ଓସମାନ ହାଦିଙ୍କ ଅକାଳ ବିୟୋଗରେ ମୁଁ ଗଭୀର ସମବେଦନା ପ୍ରକାଶ କରୁଛି। ତାଙ୍କ ମୃତ୍ୟୁ ଦେଶର ରାଜନୈତିକ ଏବଂ ଗଣତାନ୍ତ୍ରିକ ଦୃଶ୍ୟପଟ ପାଇଁ ଏକ ଅପୂରଣୀୟ କ୍ଷତି। ମୁଁ ତାଙ୍କ ଆତ୍ମାର ଶାନ୍ତି ପାଇଁ ପ୍ରାର୍ଥନା କରୁଛି ଏବଂ ତାଙ୍କ ଶୋକସନ୍ତପ୍ତ ପତ୍ନୀ, ପରିବାର ସଦସ୍ୟ, ପ୍ରିୟଜନ ଏବଂ ସହକର୍ମୀଙ୍କ ପ୍ରତି ମୋର ଗଭୀର ସମବେଦନା ପ୍ରକାଶ କରୁଛି। ସରକାର ଶହୀଦ ଓସମାନ ହାଦିଙ୍କ ପତ୍ନୀ ଏବଂ ତାଙ୍କ ଏକମାତ୍ର ସନ୍ତାନର କଲ୍ୟାଣ ପାଇଁ ଦାୟିତ୍ୱ ନେବ। ହାଦିଙ୍କ ଅକାଳ ବିୟୋଗକୁ ଦୃଷ୍ଟିରେ ରଖି, ମୁଁ ଆସନ୍ତା ଶନିବାର ଏକ ଜାତୀୟ ଶୋକ ଦିବସ ଘୋଷଣା କରୁଛି। ଏହି ଅବସରରେ ସମସ୍ତ ସରକାରୀ, ଅର୍ଦ୍ଧ-ସରକାରୀ, ସ୍ବାୟତ୍ତ ପ୍ରତିଷ୍ଠାନ, ଶିକ୍ଷାନୁଷ୍ଠାନ, ସରକାରୀ ଏବଂ ବେସରକାରୀ କୋଠା ଏବଂ ବିଦେଶରେ ଥିବା ବାଂଲାଦେଶୀ ଦୂତାବାସରେ ଜାତୀୟ ପତାକା ଅର୍ଦ୍ଧନମିତ ରହିବ।
ସେ କହିଛନ୍ତି, ଶୁକ୍ରବାର ନମାଜ ପରେ ହାଦିଙ୍କ ଆତ୍ମାର ଶାନ୍ତି ପାଇଁ ଦେଶର ସମସ୍ତ ମସଜିଦରେ ବିଶେଷ ପ୍ରାର୍ଥନା କରାଯିବ। ମୁଁ ଆପଣମାନଙ୍କୁ ଅଂଶଗ୍ରହଣ କରିବାକୁ ଅନୁରୋଧ କରୁଛି। ଅନ୍ୟ ଧର୍ମର ଉପାସନାସ୍ଥଳରେ ମଧ୍ୟ ବିଶେଷ ପ୍ରାର୍ଥନା କରାଯିବ। ମୁଁ ସିଙ୍ଗାପୁର ସରକାରଙ୍କୁ ମୋର ବିଶେଷ କୃତଜ୍ଞତା ଜଣାଉଛି। ହାଦିଙ୍କ ଚିକିତ୍ସାରେ ସେମାନେ ଅତ୍ୟନ୍ତ ଆନ୍ତରିକତା ଏବଂ ବୃତ୍ତିଗତତା ଦେଖାଇଛନ୍ତି। ବିଶେଷକରି, ବୈଦେଶିକ ମନ୍ତ୍ରୀ ଭିଭିଆନ ବାଲକ୍ରିଷ୍ଣନ, ଯିଏକି ଜଣେ ଡାକ୍ତର, ବ୍ୟକ୍ତିଗତ ଭାବରେ ହାଦିଙ୍କ ଯତ୍ନ ନେଇଥିଲେ ଏବଂ ମୋତେ ତାଙ୍କ ସ୍ବାସ୍ଥ୍ୟ ଅବସ୍ଥା ବିଷୟରେ ନିୟମିତ ଭାବରେ ଅବଗତ କରୁଥିଲେ। ଏହି ନୃଶଂସ ହତ୍ୟା ପାଇଁ ଦାୟୀ ସମସ୍ତଙ୍କୁ ଯଥାଶୀଘ୍ର ନ୍ୟାୟ ପ୍ରଦାନ କରାଯିବ ଏବଂ ସେମାନଙ୍କୁ କଠୋରତମ ଦଣ୍ଡ ଦିଆଯିବ। ଏହି ମାମଲାରେ କୌଣସି ପ୍ରକାରର ଅନୁକମ୍ପା କରାଯିବ ନାହିଁ।
Dharitri – Odisha’s No.1 Odia Daily
