ଡାକ୍ତରଖାନାରେ ବାହାଘର! ଯେଉଁଠି ସମସ୍ତେ ରୋଗରୁ ମୁକ୍ତି ପାଇବା ପାଇଁ ଆସନ୍ତି ସେଠି ପୁଣି ବିବାହ ଭଳି ଏକ କାର୍ଯ୍ୟ। କଥାଟି ଶୁଣିଲେ ଯେ କେହି ଆଶ୍ଚର୍ଯ୍ୟ ହୋଇପାରେ। ମାତ୍ର ଏଭଳି ଏକ ଘଟଣା ଘଟିଛି ଉତ୍ତରପ୍ରଦେଶର ଲକ୍ଷ୍ନୌରେ। ଏଠାରେ ଏକ ହସ୍ପିଟାଲର ଆଇସିୟୁ ୱାର୍ଡରେ ରୋଗୀଙ୍କ ସାମ୍ନାରେ ହୋଇଛି ବିବାହ।
ଲକ୍ଷ୍ନୌରେ ରହୁଥିବା ୫୧ ବର୍ଷୀୟ ସୟେଦ ଜୁନେଦ ଇକବାଲ୍ ୧୫ ଦିନ ପୂର୍ବରୁ ଅସୁସ୍ଥ ହୋଇ ଡାକ୍ତରଖାନାରେ ଭର୍ତ୍ତି ହୋଇଥିଲେ। ଏହାପରେ ତାଙ୍କ ସ୍ବାସ୍ଥ୍ୟ ଆହୁରି ଅଧିକ ଖରାପ ହୋଇଯାଇଥିଲା ଓ ସେ ଆଇସିୟୁରେ ଭର୍ତ୍ତି ହୋଇଥିଲେ। କିନ୍ତୁ ତାଙ୍କର ଦୁଇ ଝିଅଙ୍କ ବିବାହ ସେହି ମାସରେ ହେବା ପାଇଁ ସ୍ଥିର ହୋଇଥିଲା। ସୟେଦ ଚାହୁଁଥିଲେ ଝିଅଙ୍କ ବିବାହ ନିଜ ଆଖିରେ ଦେଖିବେ। ତାଙ୍କର ଏହି ଇଚ୍ଛା ପୂରଣ କରିବା ପାଇଁ ଘରଲୋକେ ଡାକ୍ତରଙ୍କ ସହ କଥାବାର୍ତ୍ତା କରିଥିଲେ। ଶେଷରେ ଡାକ୍ତରଖାନା ପକ୍ଷରୁ ସମ୍ମତି ମିଳିବା ପରେ ଆଇସିୟୁରେ ଦୁଇଝିଅଙ୍କ ବିବାହ ନିମନ୍ତେ ସମସ୍ତ ଆୟୋଜନ କରାଯାଇଥିଲା। ଆଇସିୟୁର ନିୟମ ଅନୁସାରେ ଉଭୟ ପକ୍ଷର ଲୋକେ ଉପସ୍ଥିତ ହୋଇ ନିକାହ ଶେଷ କରିଥିଲେ। ଡାକ୍ତରଖାନାର ପରିବେଶରେ ଏଭଳି ଏକ ଭିନ୍ନ ଉତ୍ସବ ଦେଖି ସୟଦଙ୍କ ସହିତ ସେଠାରେ ଥିବା ରୋଗୀମାନଙ୍କ ମୁହଁରେ ହସ ଫୁଟି ଉଠିଥିଲା। ତେବେ ଆଇସିୟୁ ଭିତରେ ଅଧିକ ଲୋକଙ୍କ ପ୍ରବେଶ ନେଇ କଟକଣା ଥିବାରୁ ବନ୍ଧୁବାନ୍ଧବ ସମସ୍ତେ ଉପସ୍ଥିତ ହୋଇପାରି ନ ଥିଲେ।
