ନର୍ଲା,୧୪ା୩(ସନ୍ତୋଷ ପାତ୍ର): କଳାହାଣ୍ଡି ଜିଲା ନର୍ଲା ବ୍ଲକ ରୂପାରୋଡ୍ ରେଳଷ୍ଟେଶନ ପ୍ଲାଟ୍ଫର୍ମରେ ପାନୀୟ ଜଳର ବ୍ୟବସ୍ଥା ନ ଥିବାରୁ ଯାତ୍ରୀମାନେ ଶୋଷରେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଥିବା ଦେଖିବାକୁ ମିଳୁଛି।
ପ୍ରାପ୍ତ ସୂଚନାନୁଯାୟୀ, ଏହି ପ୍ଲାଟ୍ଫର୍ମରେ ପାଣି ପୋଷ୍ଟରେ ବର୍ଷ ବର୍ଷ ଧରି ପାଣି ଆସୁନାହିଁ। ରେଳ ବିଭାଗ ପକ୍ଷରୁ ମଧ୍ୟ କୌଣସି ପାନୀୟ ଜଳର ବ୍ୟବସ୍ଥା ନ ଥିବା ବେଳେ ଧର୍ମକୁ ଆଖିଠାର ଭଳି ଗୋଟିଏ ମାତ୍ର ନଳକୂପ ଅଚଳ ହୋଇପଡ଼ିରହିଛି। ଏପଟେ ପ୍ରବଳ ଖରା ସାଙ୍ଗକୁ ଝାଞ୍ଜି ପବନରେ କଲବଲ ହେଉଥିବା ଯାତ୍ରୀ ପାଣି ଟୋପାଏ ପାଇଁ ଡହଳବିକଳ ହେଉଛନ୍ତି। ଏଥିପ୍ରତି ରେଳ ବିଭାଗ ଉଚ୍ଚ କର୍ତ୍ତୃପକ୍ଷଙ୍କ କାହାରି ନଜର ନ ଥିବା ଭଳି ମନେ ହୁଏ ଏଭଳି ସମସ୍ୟାକୁ ନେଇ ରୂପ୍ରାରୋଡ୍ ଷ୍ଟେଶନ ମାଷ୍ଟରକୁ ପଚାରିବାରୁ ଆମେ ବିଭାଗକୁ ଲିଖିତ ଭାବରେ ଅଭିଯୋଗ କରିଥିଲେ ମଧ୍ୟ ଏପର୍ଯ୍ୟନ୍ତ କୌଣସି ପ୍ରକାର ସମାଧାନ ହୋଇ ନ ଥିବା ପ୍ରକାଶ କରିଛନ୍ତି। ଏଣୁ ଯାତ୍ରୀମାନଙ୍କ ସ୍ବାର୍ଥକୁ ଆଖି ଆଗରେ ରଖି ଯଥାଶୀଘ୍ର ରୂପ୍ରାରୋଡ୍ ରେଳ ଷ୍ଟେଶନରେ ପାନୀୟ ଜଳର ବ୍ୟବସ୍ଥା କରିବା ପାଇଁ ସାଧାରଣରେ ଦାବି ହେଉଛି।
