କୁଆଲାଲମ୍ପୁର,୬ା୧୨(ପି.ଟି.):ମାଲେସିଆରେ ଆରମ୍ଭ ହୋଇଥିବା ପୁରୁଷ ଜୁନିୟର ହକି ବିଶ୍ୱକପ୍ରେ ବିଜୟରୁ ଅଭିଯାନ ଆରମ୍ଭ କରିଛି ଭାରତ। ଫରଓ୍ବାର୍ଡ ଅରାଇଜିତ୍ ସିଂ ହୁଣ୍ଡାଲଙ୍କ ହ୍ୟାଟ୍ରିକ୍ ବଳରେ ଭାରତ ୪-୨ରେ କୋରିଆକୁ ପରାସ୍ତ କରିଛି। ଅରାଇଜିତ୍ ୧୧, ୧୬ ଓ ୪୧ ମିନିଟରେ ୩ ଗୋଲ ଦେଇଥିବା ବେଳେ ଅମନଦୀପ୍ ୩୦ ମିନିଟରେ ଅନ୍ୟ ଗୋଲଟି ଦେଇଥିଲେ। କୋରିଆ ପକ୍ଷରୁ ଡୋୟୁନ୍ ଲିମ୍(୩୮) ଓ ମିଙ୍କଓନ୍ କିମ୍ ୪୫ ମିନିଟରେ ଗୋଟିଏ ଲେଖାଏ ଗୋଲ ଦେଇଥିଲେ। ବୁକିତ୍ ଜଲିଲର ନ୍ୟାଶନାଲ ଷ୍ଟାଡିୟମରେ ଖେଳାଯାଇଥିବା ମ୍ୟାଚରେ ଭାରତ ପକ୍ଷରୁ ଅରାଇଜିତ ଚମତ୍କାର ପ୍ରଦର୍ଶନ କରିଥିଲେ।
ଆରମ୍ଭରୁ ମ୍ୟାଚ୍ଟି ସଂଘର୍ଷପୂର୍ଣ୍ଣ ରହିଥିଲା। ଉଭୟ ଦଳ ସ୍କୋର କରିବା ପାଇଁ ଉଦ୍ୟମ କରିଥିବା ବେଳେ ୧୧ତମ ମିନିଟରେ ଅରାଇଜିତ ପ୍ରଥମ ଗୋଲ ଦେଇଥିଲେ। ପେନାଲ୍ଟି କର୍ନରରୁ ସେ ଭାରତକୁ ୧-୦ରେ ଆଗୁଆ କରିଥିଲେ। ପ୍ରଥମ କ୍ୱାର୍ଟରରେ ୧-୦ରେ ଆଗୁଆ ରହିବା ପରେ ଦ୍ୱିତୀୟ କ୍ୱାର୍ଟରର ପ୍ରଥମ ମିନିଟରେ ଅରାଇଜିତ ବ୍ୟକ୍ତିଗତ ଦ୍ୱିତୀୟ ଗୋଲ ଦେଇଥିଲେ। ବବିଙ୍କ ଆଟାକିଂ ରନ୍ର ଫାଇଦା ଉଠାଇ ଅରାଇଜିତ ଗୋଲ ଦେଇଥିଲେ। ଦ୍ୱିତୀୟ କ୍ୱାର୍ଟର ଶେଷ ହେବାର ଠିକ୍ ପୂର୍ବରୁ ଅମନଦୀପ୍ ଭାରତ ପାଇଁ ତୃତୀୟ ଗୋଲ ଦେଇଥିଲେ। ୨୯ ତମ ମିନିଟରେ ପେନାଲ୍ଟି କର୍ନରରୁ ଗୋଲ ରୋକିବାରେ ସମର୍ଥ ହୋଇଥିଲା କୋରିଆ। ତେବେ ଏହାର ୧ ମିନିଟ ମଧ୍ୟରେ ଅମନଦୀପ ଭାରତକୁ ୩-୦ରେ ଆଗୁଆ କରିଥିଲେ।
ତୃତୀୟ କ୍ୱାର୍ଟରରେ କୋରିଆ ଆକ୍ରମଣାତ୍ମକ ପ୍ରଦର୍ଶନ କରିବା ସହିତ ୩୮ ତମ ମିନିଟରେ କୋରିଆ ପକ୍ଷରୁ ଡୋୟୁନ୍ ଲିମ୍ ଏକ ଗୋଲ ପରିଶୋଧ କରିଥିଲେ। ଏହାର ୩ ମିନିଟରେ ଅରାଇଜିତ ନିଜର ହ୍ୟାଟ୍ରିକ୍ ପୂରଣ କରିଥିଲେ। ତେବେ ୪୧ ତମ ମିନିଟରେ ଅଧିନାୟକ ଉତ୍ତମ ସିଂଙ୍କୁ ଗ୍ରୀନ୍ କାର୍ଡ ଓ ରୋହିତଙ୍କୁ ୟେଲୋ କାର୍ଡ ମିଳିଥିଲା। ଉଭୟ ଖେଳାଳିଙ୍କୁ ୫ ମିନିଟରେ ପଡିଆ ଛାଡିବାକୁ ପଡିଥିଲା। ଏହାର ଫାଇଦା ଉଠାଇ ମିଙ୍କଓନ୍ କିମ୍ କୋରିଆ ପକ୍ଷରୁ ଦ୍ୱିତୀୟ ଗୋଲ ଦେଇଥିଲେ। ଅନ୍ତିମ କ୍ୱାର୍ଟର ଗୋଲଶୂନ୍ୟ ରହିବା ସହ ଭାରତ ୪-୨ରେ ମ୍ୟାଚ୍କୁ ଜିତି ନେଇଥିଲା। ଭାରତ ଗୁରୁବାର ଦ୍ୱିତୀୟ ମ୍ୟାଚ୍ରେ ସ୍ପେନ୍କୁ ଭେଟିବ।
