କୁକୁର କିଭଳି ସ୍ବାସ୍ଥ୍ୟକର ଖାଦ୍ୟ ଖାଇବେ ସେଭଳି ଏକ ଭିନ୍ନ ଚିନ୍ତା କରିଛନ୍ତି ରାଜସ୍ଥାନ ଜୟପୁରର ଗଜରାଜ ସିଂ। ଗଜରାଜ କୁକୁରଙ୍କ ପାଇଁ ସ୍ବତନ୍ତ୍ର ପୁଷ୍ଟିକର ଖାଦ୍ୟ ପ୍ୟାକେଟ କରି ତାହାକୁ ମାତ୍ର ୫ଟଙ୍କାରେ ଯୋଗାଇ ଦେଉଛନ୍ତି। ସେ ରୁଟି ସହିତ ଅଣ୍ଡା, ପନିର, ସୋୟା ଆଦି ମିଶାଇ ୪୦୦ ଗ୍ରାମର ଛୋଟ ପ୍ୟାକେଟ କରୁଛନ୍ତି। ଏହି ପ୍ୟାକେଟ ପ୍ରସ୍ତୁତ କରିବା ପାଇଁ ସେ ‘କିଚେନ ଫର୍ ଡଗ୍’ ନାମକ ଏକ ଷ୍ଟଲ୍ ଜୟପୁରରେ ଖୋଲିଛନ୍ତି। ଏହା ଦ୍ୱାରା ଏବେ ପ୍ରତିଦିନ ୩୦୦୦ କୁକୁରଙ୍କୁ ପୁଷ୍ଟିକର ଖାଦ୍ୟ ମିଳିପାରୁଛି। ଯେଉଁମାନେ ପ୍ରତିଦିନ ବୁଲା କୁକୁରଙ୍କୁ ଖାଇବାକୁ ଦେଉଛନ୍ତି ସେମାନେ ଏହି ଷ୍ଟଲ୍ରୁ ୫ଟଙ୍କାରେ ଖାଦ୍ୟ ପ୍ୟାକେଟ କିଣୁଛନ୍ତି। କିଛି ବର୍ଷ ପୂର୍ବେ ଗଜରାଜ ଏକ ଦୋକାନ ନିକଟରେ ଠିଆ ହୋଇଥିବା ସମୟରେ ଜଣେ ବ୍ୟକ୍ତି ବିସ୍କୁଟ ପ୍ୟାକେଟ କିଣି କୁକୁରକୁ ଖାଇବାକୁ ଦେବା ଦେଖିଲେ। ପରେ ସେହି ବିସ୍କୁଟ ମଇଦା ଓ ଚିନିରେ ହେଉଥିବାରୁ ତାହା କୁକୁରଙ୍କ ସ୍ବାସ୍ଥ୍ୟ ପାଇଁ କ୍ଷତିକାରକ ବୋଲି ସେହି ବ୍ୟକ୍ତିଙ୍କୁ କହିଥିଲେ। ବ୍ୟକ୍ତି ଜଣକ କମ୍ ଟଙ୍କାରେ କୁକୁରଙ୍କ ପାଇଁ ଖାଦ୍ୟ ମିଳୁନାହିଁ ବୋଲି କହିବାରୁ ଗଜରାଜ ଏଭଳି ପ୍ୟାକେଟ ପ୍ରସ୍ତୁତ କରିବା ଲାଗି ନିଷ୍ପତ୍ତି ନେଇଥିଲେ। ସେହି ନିଷ୍ପତ୍ତି ଏବେ ସଫଳତାର ସହ କାର୍ଯ୍ୟକାରୀ ହୋଇଥିବାରୁ ସେ ଖୁସି ବୋଲି କହନ୍ତି ଗଜରାଜ।
