ପାଣି ଘେରରେ ୫୦ ଗ୍ରାମ
8:36 amAugust 6, 2023August 6, 2023 / 08

ନିମାପଡ଼ା,୬।୮(ବିଚିତ୍ରାନନ୍ଦ ସାହୁ)କୁଶଭଦ୍ରାନଦୀରେ ବନ୍ୟାଜଳ କ୍ରମଶଃ ହ୍ରାସ ପାଇଥିବାବେଳେ ଧନୁଅଁା ନଦୀରେ ବନ୍ୟା ତାଣ୍ଡବ ରଚିଛି। ଧନୁଅଁାନଦୀରେ ନିମାପଡ଼ା ବ୍ଲକର ଧନୁଅଁା, ଅଲଣ୍ଡା, ଶଗଡ଼ା, ବଡ଼ମାଛପୁର, ଶାଇଁସଶାସନ, ବଡ଼ଶିରୁଳା, ବାମନାଳ, କାଟକୋସାଙ୍ଗ ଆଦି ୮ ପଞ୍ଚାୟତର ୫୦ ଗ୍ରାମ ପାଣିଘେରରେ ରହିଛି। ବନ୍ୟାଜଳ ପ୍ରବାହିତ ଯୋଗୁ ହଜାର ହଜାର ହେକ୍ଟର ଚାଷଜମି ଜଳମଗ୍ନ ହୋଇପଡ଼ିଛି। ବନ୍ୟାପାଣିରେ ଚାଷଜମି ସବୁ ବୁଡ଼ିଯାଇଥିବାରୁ ଧାନ ପନିପରିବା ଚାଷ ବହୁଳ ଭାବେ କ୍ଷତିଗ୍ରସ୍ତ ହୋଇଛି। ଚାଷ ଓ ଫସଲ ହରାଇ ହଜାର ହଜାର ଚାଷୀ ଏବେ ମୁଣ୍ଡରେ ହାତ ଦେଇ ବସିଛନ୍ତି। ଧନୁଅଁା ବନ୍ୟାର ବିଭୀଷିକା ଯୋଗୁ ବ୍ଲକର ଚାଷ ଜମି, ପଡ଼ିଆ ଜମି, ଗୋଚରଭୂଇଁ ଆଦି ବନ୍ୟାପାଣିରେ ବୁଡ଼ି ଜଳାର୍ଣ୍ଣବ ହୋଇପଡ଼ିଛି। ଫଳରେ ଗୃହପାଳିତ ପଶୁ ବାହାରକୁ ବାହାରି ପାରୁ ନାହାନ୍ତି। ଧନୁଅଁା, ଅଲଣ୍ଡା, କୋଟକୋସାଙ୍ଗ, ବାମନାଳ ଆଦି ପଞ୍ଚାୟତରେ ବହୁ ଗ୍ରାମ୍ୟ ରାସ୍ତା ସମେତ ବହୁ ଗଁାଗଣ୍ଡା ରାସ୍ତା ବନ୍ୟାପାଣିରେ ବୁଡ଼ିଯିବାରୁ ସାଧାରଣ ଯାତାୟାତ ବହୁଳ ବାଧାପ୍ରାପ୍ତ ହୋଇଛି। ବିଡିଓ ବସନ୍ତ ମଲ୍ଲିକ ଶନିବାର ଧନୁଅଁା, ଅଲଣ୍ଡା, ବଡ଼ଶିରୁଳା, ଶଗଡ଼ା ଆଦି ପଞ୍ଚାୟତର ବନ୍ୟା କ୍ଷତିଗ୍ରସ୍ତ ଅଞ୍ଚଳ ପରିଦର୍ଶନ କରି କ୍ଷୟକ୍ଷତିର ଅନୁଧ୍ୟାନ କରିଛନ୍ତି। ଏହି ବନ୍ୟାରେ କୌଣସି ଧନଜୀବନ ହାନି ଘଟି ନ ଥିବାବେଳେ ଚାଷଜମି ଜଳମଗ୍ନ ହୋଇପଡ଼ିଥିବାରୁ ହଜାର ହଜାର ଚାଷୀ, ଗୃହପାଳିତ ପଶୁ ପ୍ରଭାବିତ ହୋଇଥିବା ବିଡିଓ ମଲ୍ଲିକ କହିଛନ୍ତି। ଏ ସମ୍ପର୍କରେ ଜଳ ସମ୍ପଦ ବିଭାଗର ସୁପରିଣ୍ଟେଣ୍ଡେଣ୍ଟ ଇଂ. ବୈକୁଣ୍ଠନାଥ ଦଳେଇ, ସହକାରୀ ନିର୍ବାହୀ ଯନ୍ତ୍ରୀ ପ୍ରଭାତ ଦାଶଙ୍କୁ ପଚାରିବାରେ, କୁଶଭଦ୍ରା ଓ ଧନୁଅଁା ନଦୀରେ ବନ୍ୟାଜଳ କମିବାରେ ଲାଗିଛି। ବିପଦର ଆଶଙ୍କା ନାହିଁ। ଲୋକେ ଆଦୌ ଆତଙ୍କିତ ହୁଅନ୍ତୁ ନାହିଁ। ବନ୍ୟା ପରିସ୍ଥିତି ପ୍ରତି ଜଳସମ୍ପଦ ବିଭାଗ ସତର୍କ ଦୃଷ୍ଟି ରହିଛି ଓ ସଜାଗ ରହିଥିବା ଦଳେଇ ଓ ସହକାରୀ ନିର୍ବାହୀ ଯନ୍ତ୍ରୀ ଦାଶ କହିଛନ୍ତି। ବନ୍ୟା ପରିସ୍ଥିତିର ମୁକାବିଲା ପାଇଁ ଜଳସମ୍ପଦ ବିଭାଗ ସଦା ପ୍ରସ୍ତୁତ ରହିଛି ବୋଲି ବିଭାଗୀୟ ଅଧିକାରୀମାନେ କହିଛନ୍ତି।