ଭବାନୀପାଟଣା,୩।୭(ଉତ୍ତମ କୁମାର ଦାଶ): କଥାରେ ଅଛି ଏକତାର ବଳ ଆଗରେ ସବୁ କିଛି କାମ ସମ୍ଭବ ହୋଇପାରେ। ଏହା କଥାରେ ନୁହେଁ ବଂର କାମରେ କରି ଦେଖାଇଛନ୍ତି କଳାହାଣ୍ଡି ଜିଲା ଜୁନାଗଡ ବ୍ଲକ ବକ୍ସିତୁଲସୀପାଲି ପଞ୍ଚୟତ ରଣପୁର ଗ୍ରାମର ୨ ପଡାବାସୀ। ଦୀର୍ଘ ବର୍ଷ ହେଲା ଏଠାରେ ଥିବା ମୁଖ୍ୟ କେନାଲରେ ପୋଲ ନିର୍ମାଣ ପାଇଁ ସ୍ଥାନୀୟ ନେତା ଓ ଇନ୍ଦ୍ରାବତୀ ବିଭାଗୀୟ ଅଧିକାରୀଙ୍କୁ ରଣପୁର ଗ୍ରାମର ଯୋଜନାପଡା ଓ ଝାଙ୍କରପଡାବାସୀ ଗୁହାରୀ କରିଥିଲେ। ହେଲେ ସେମାନଙ୍କ ଏହି ସମସ୍ୟା ପ୍ରତି କେହି କର୍ଣ୍ଣପାତ କରି ନ ଥିଲେ। ଶେଷରେ ବାଧ୍ୟ ହୋଇ କେନାଲରେ ପୋଲ ନିର୍ମାଣ ପାଇଁ ୨ ପଡାବାସୀ ଅଣ୍ଟା ଭିଡିଥିଲେ। ୩ ଦିନ ୨ ପଡାବାସୀଙ୍କ ଅକ୍ଲାନ୍ତ ପରିଶ୍ରମ କରି କେନାଲ ଉପରେ ଗୋଟିଏ ନୁହେଁ ବଂର ୨ଟି କାଠ ପୋଲ ନିର୍ମାଣ କରି ନେତା ଓ ବିଭାଗୀୟ ଅଧିକାରୀଙ୍କୁ ମୁହଁତୋଡ ଜବାବ ଦେଇଛନ୍ତି। ପ୍ରକାଶ ଯେ, ରଣୁପର ଗ୍ରାମକୁ ଲାଗି ଇନ୍ଦ୍ରାବତୀ ବାମ ଦକ୍ଷିଣ ମୁଖ୍ୟ କେନାଲ ଯାଇଛି। ଏହି କେନାଲର ଗୋଟିଏ ପଟରେ ଯୋଜନା ପଡା ରହିଥିବାବେଳେ ଅନ୍ୟପଟେ ଝାଙ୍କରପଡା ରହିଛି। ଯୋଜନାପଡାରେ ପ୍ରାୟ ୫ଶହ ଲୋକ ବାସ କରୁଥିବାବେଳେ କେନାଲ ଆରପାଟରେ ସେମାନଙ୍କ ୨ଶହରୁ ଊର୍ଦ୍ଧ୍ୱ ଏକର ଚାଷ ଜମି ରହିଛି। ଫଳରେ ପଡାବାସୀଙ୍କୁ ଚାଷ ପାଇଁ ମୁଖ୍ୟ କେନାଲ ଡେଇଁ ଯିବାକୁ ପଡିଥାଏ। ଖରାଦିନ ପଡାବାସୀଙ୍କୁ କୌଣସି ସମସ୍ୟା ହେଉ ନ ଥିବାବେଳେ ବର୍ଷା ଋତୁରେ ବିପଦ ସଙ୍କୁଳ ଭାବେ କେନାଲ ପାର ହୋଇ ଚାଷ ଜମିକୁ ଯାଇଥାନ୍ତି ପଡବାସୀ। ଏଠାକାର ଗରିବ ଲୋକମାନେ ସ୍ଥାନୀୟ ଘନା ଜଙ୍ଗଲ ଉପରେ ମଧ୍ୟ ନିର୍ଭର କରି ନିଜ ପରିବାର ପ୍ରତିପୋଷଣ କରିଥାନ୍ତି। ସେହିପରି କେନାଲ ଆରପଟରେ ଥିବା ଝାକରପଡାରେ ୨୦ଟି ଆଦିବାସୀ ପରିବାର ରହୁଥିବାବେଳେ ସେମାନେ ମଧ୍ୟ ପଡାକୁ ମୁଖ୍ୟ କେନାଲ ଡେଇଁ ବିଭିନ୍ନ କାମ ପାଇଁ ଆସିଥାନ୍ତି। ତେବେ ବର୍ଷା ସମୟରେ ସେମାନେ ନାହଁି ନ ଥିବା ଅସୁବିଧାର ସମ୍ମୁଖୀନ ହୋଇଥାନ୍ତି। ବିଶେଷ କରି ଏଠାରେ ପଢୁଥିବା ସ୍କୁଲ ଓ ଅଙ୍ଗନୱାଡି ଛାତ୍ରୀଛାତ୍ର, ରୋଗୀ ଅସୁବିଧାର ସମ୍ମୁଖୀନ ହୋଇଥାନ୍ତି। ସେମାନେ ବିପଦସଙ୍କୁଳ ଭାବେ କେନାଲ ପାର ହୋଇ ଆରପଟକୁ ଯାଇଥାନ୍ତି। କେନାଲର ଉପର ମୁଣ୍ଡରେ ଏକ ପୋଲ ରହିଛି। ତେବେ ଦୂରତା ହେତୁ ୨ ପଡାବାସୀ ଜରୁରୀ କାମ ନ ଥିଲେ ଏହି ପୋଲକୁ ବ୍ୟବହାର କରନ୍ତି ନାହଁି। ତେଣୁ ଯୋଜନାପଡା ଓ ଝାଙ୍କରପଡା ମଧ୍ୟରେ ଏକ ପୋଲ କରାଗଲେ ଏହି ୨ ପଡାବାସୀ ଉପକୃତ ହୋଇପାରନ୍ତେ ବୋଲି ସାଧାରଣରେ ମତ ପ୍ରକାଶ ପାଇଛି।
