ବୌଦ୍ଧ,୧ା୭(ଅଜିତ କୁମାର ବାରିକ): ବୌଦ୍ଧ ଜିଲା ଦୌରାଜଜ୍ ତଥା ସ୍ପେଶାଲ ଜଜ୍ ବିକ୍ରମ କୁମାର ପ୍ରଧାନ ଶୁକ୍ରବାର ଏକ ଗଞ୍ଜେଇ ଚୋରା ଚାଲାଣ ମାମଲାର ବିଚାରକରି ୨ଜଣ ଅଭିଯୁକ୍ତଙ୍କୁ ୧୦ ବର୍ଷ ଲେଖାଏ କାରାଦଣ୍ଡ ସହ ୧ ଲକ୍ଷ ଟଙ୍କା ଜରିମାନା ଆଦେଶ ପ୍ରଦାନ କରିଛନ୍ତି। ଏହାଛଡ଼ା ଜଣେ ଅଭିଯୁକ୍ତଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି।
ମାମଲାରୁ ପ୍ରକାଶ, ବୌଦ୍ଧ ଜିଲାର ପେନାବାଲି ଜଙ୍ଗଲ ମଧ୍ୟରେ ଏକ ଖୋଲା ପଡ଼ିଆରେ ବିପୁଳ ପରିମାଣର ଗଞ୍ଜେଇ ବସ୍ତାରେ ଭର୍ତ୍ତି କରାଯାଇ ବାହାରକୁ ଚାଲାଣ କରିବାକୁ ଉଦ୍ୟମ କରାଯାଉଥିବା ପୋଲିସକୁ ସୂଚନା ମିଳିଥିଲା। ଫଳରେ ଗତ ୧୪ା୩ା୨୦୧୯ରେ ବୌଦ୍ଧ ଥାନାର ଏସ୍ଆଇ ସସ୍ମିତା ମଗର ଓ ଅନ୍ୟ ପୋଲିସ କର୍ମଚାରୀ ଉକ୍ତ ଜଙ୍ଗଲରେ ଚଢ଼ାଉ କରିଥିଲେ। ପୋଲିସକୁ ଦେଖି ଅଭିଯୁକ୍ତମାନେ ଫେରାରହେବା ପାଇଁ ଉଦ୍ୟମ କରିବା ବେଳେ ପୋଲିସ ୨ଅଭିଯୁକ୍ତ ପେନାବାଲି ଗ୍ରାମର ଯୋଗୀନ୍ଦ୍ର କହଁର (୬୫) ଓ ସିନ୍ଧୁ କହଁର (୪୮)ଙ୍କୁ ଧରିବାରେ ସଫଳ ହୋଇଥିଲା। ତେବେ ଅନ୍ୟ ଅଭିଯୁକ୍ତ ପେନାବାଲି ଗ୍ରାମର ଶିବ କହଁର, ରେଙ୍ଗୁଟୁ କହଁର, ଭଞ୍ଜ କହଁର ଓ ମଳିକପଡ଼ା ଗ୍ରାମର ଅଜିତ ମଲିକ ଫେରାର ହୋଇଯାଇଥିଲେ। ପୋଲିସ ଘଟଣାସ୍ଥଳରୁ ୯ ଗୋଟି ଜରିବସ୍ତାରୁ ୨ କୁଇଣ୍ଟାଲ ୬୯ କେଜି ଗଞ୍ଜେଇ ଜବତ କରିବା ସହ ଏକ ମାମଲା ବୌଦ୍ଧ ଥାନା କେସ୍ ନଂ. ୫୯/୧୯ରେ ରୁଜୁକରି ୨ ଅଭିଯୁକ୍ତ ଯୋଗୀନ୍ଦ୍ର ଓ ସିନ୍ଧୁଙ୍କୁ ଗିରଫକରି କୋର୍ଟ ଚାଲାଣ କରିଥିଲା ା ଏହି ମାମଲାରେ ପୋଲିସ ଅଭିଯୁକ୍ତ ଅଜିତ ମଲିକଙ୍କୁ ପରେ ଗିରଫ କରିବାରେ ସଫଳ ହୋଇଥିବା ବେଳେ ଅନ୍ୟ ୩ ଅଭିଯୁକ୍ତ ଏବେ ବି ଫେରାର ଅଛନ୍ତି ା ପରବର୍ତ୍ତୀ ସମୟରେ ମାମଲାଟି ବୌଦ୍ଧ ଜିଲା ଦୌରାଜଜ୍ଙ୍କ ଅଦାଲତରେ (ସ୍ପେଶାଲ କେସ୍ ନଂ. ୩୦/୧୯ ) ୩ ଅଭିଯୁକ୍ତ ଯୋଗୀନ୍ଦ୍ର, ସିନ୍ଧୁ ଓ ଅଜିତଙ୍କ ପାଇଁ ବିଚାର ହୋଇଥିଲା ା ସରକାରଙ୍କ ପକ୍ଷରୁ ୧୩ ଜଣ ସାକ୍ଷୀଙ୍କ ବୟାନକୁ ଭିତ୍ତିକରି ପ୍ରମାଣ ଥିବା ନେଇ ଅଦାଲତ ଅଭିଯୁକ୍ତ ଯୋଗୀନ୍ଦ୍ର ଓ ସିନ୍ଧୁଙ୍କୁ ୧୦ ବର୍ଷ ଲେଖାଏ କାରାଦଣ୍ଡ ଦେବା ସହ ୧ ଲକ୍ଷ ଟଙ୍କା ଜରିମାନା ଆଦେଶ ପ୍ରଦାନ କରିଛନ୍ତି। ପ୍ରମାଣ ଅଭାବରୁ ଅଭିଯୁକ୍ତ ଅଜିତ ମଲିକଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି। ସରକାରଙ୍କ ପକ୍ଷରୁ ମାମଲାକୁ ସରକାରୀ ଓକିଲ ସବିତା କୁମାରୀ ପଣ୍ଡା ପରିଚାଳନା କରିଥିଲେ।
