ନୂଆଦିଲ୍ଲୀ,୪।୬ : ଆମେରିକାରେ ପୂର୍ବତନ କଂଗ୍ରେସ ରାଷ୍ଟ୍ରୀୟ ଅଧ୍ୟକ୍ଷ ରାହୁଲ ଗାନ୍ଧୀଙ୍କ ବିବାଦୀୟ ବିବୃତ୍ତି ଉପରେ କେନ୍ଦ୍ର ବହିର୍ବ୍ୟାପାର ମନ୍ତ୍ରୀ ଏସ ଜୟଶଙ୍କର ପ୍ରତିକ୍ରିୟା ଦେଇଛନ୍ତି। ସେ କହିଛନ୍ତି ବେଳେବେଳେ ରାଜନୀତିଠାରୁ କିଛି ଜିନିଷ ବଡ଼ ହୋଇଥାଏ ଏବଂ ବିଶେଷ କରି ଯେତେବେଳେ ଆପଣ ଦେଶ ବାହାରେ ପାଦ ଦିଅନ୍ତି। ସାମୂହିକ ଦାୟିତ୍ୱ ବିଷୟରେ ଜୟଶଙ୍କର କହିଛନ୍ତି ସେ ବିଦେଶ ଯାଇ ସେଠାରେ ରାଜନୀତି କରନ୍ତି ନାହିଁ।
ଆମେରିକୀୟ ଗସ୍ତରେ ଯାଇଥିବା ରାହୁଲ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଭାରତ ସରକାରଙ୍କୁ ଟାର୍ଗେଟ କରୁଛନ୍ତି। ଏଥି ସହିତ ମୁସଲିମ ଲିଗ ପରି ଏକ ପାର୍ଟିକୁ ମଧ୍ୟ ଧର୍ମନିରପେକ୍ଷ କୁହାଯାଉଛି। ମନେରଖନ୍ତୁ, ଏହା ହେଉଛି ସେହି ମୁସଲିମ ଲିଗ, ଯାହା ଦେଶର ପ୍ରଥମ ପ୍ରଧାନମନ୍ତ୍ରୀ ତଥା ରାହୁଲଙ୍କ ଜେଜେବାପା ଜବାହରଲାଲ ନେହେରୁଙ୍କୁ ହିଂସାତ୍ମକ ତଥା ମୌଳବାଦୀ ବୋଲି କହିଥିଲା।
ସୂଚନାଯୋଗ୍ୟ, ବର୍ତ୍ତମାନ ଜୟଶଙ୍କର ବ୍ରିକ୍ସ ଦେଶର ବୈଦେଶିକ ମନ୍ତ୍ରୀଙ୍କ ବୈଠକରେ ଯୋଗଦେବା ପାଇଁ ଦକ୍ଷିଣ ଆଫ୍ରିକା ଯାଇଛନ୍ତି। ସେଠାରେ ଭାରତୀୟ ସମ୍ପ୍ରଦାୟର ଲୋକଙ୍କ ସହ କଥାବାର୍ତ୍ତା ବେଳେ ଜଣେ ବ୍ୟକ୍ତି ରାହୁଲ ଗାନ୍ଧୀଙ୍କୁ ତାଙ୍କ ନାମ ନ ନେଇ ତାଙ୍କ ବିବୃତ୍ତି ବିଷୟରେ ପଚାରିଥିଲେ। ଏହା ଉପରେ ଜୟଶଙ୍କର କହିଥିଲେ, ମୁଁ ମୋର ମନ କଥା କହିପାରେ। ମୁଁ ବିଦେଶ ଗଲାବେଳେ ରାଜନୀତି ନ କରିବାକୁ ଚେଷ୍ଟା କରେ। ଯଦି ମୋତେ ଯୁକ୍ତି କରିବାକୁ ପଡିବ, ମୁଁ ମୋ ଦେଶ ଭାରତରେ ଏହା କରିବି। ଏକ ଗଣତାନ୍ତ୍ରିକ ଦେଶରେ ସମସ୍ତ ଲୋକଙ୍କ ସାମୂହିକ ଦାୟିତ୍ୱ, ଜାତୀୟ ସ୍ବାର୍ଥ ଏବଂ ସାମୂହିକ ଭାବମୂର୍ତ୍ତି ରହିଛି। କିଛି ଜିନିଷ ରାଜନୀତିଠାରୁ ବଡ଼। ଯେତେବେଳେ ଆପଣ ଦେଶ ବାହାରେ ପାଦ ଦିଅନ୍ତି, ସେତେବେଳେ ଆପଣ ଏହି ଜିନିଷଗୁଡ଼ିକୁ ଧ୍ୟାନରେ ରଖିବା ଉଚିତ।
