ପ୍ୟାରିସ, ୩।୬: ଆରିନା ସାବାଲେଙ୍କା, ଆନାସ୍ତାସିଆ ପାଭଲ୍ୟୁଚେଙ୍କୋଭା, ଏଲିସ ମେର୍ଟେନ୍ସ, ଡାରିଆ କାସାଟ୍କିନା ପ୍ରମୁଖ ଚଳିତ ଫ୍ରେଞ୍ଚ୍ ଓପନ ଗ୍ରାଣ୍ଡସ୍ଲାମ ଟେନିସ ମହିଳା ସିଙ୍ଗଲ୍ସ ଚତୁର୍ଥ ରାଉଣ୍ଡରେ ପ୍ରବେଶ କରିଛନ୍ତି। ଶୁକ୍ରବାର ଅନୁଷ୍ଠିତ ତୃତୀୟ ରାଉଣ୍ଡ ମ୍ୟାଚରେ ସାବାଲେଙ୍କା ୬-୨, ୬-୨ ସେଟ୍ରେ କାମିଲା ରାଖିମୋଭା, ପାଭ୍ଲ୍ୟୁଚେଙ୍କୋଭା ୪-୬, ୬-୩, ୬-୦ରେ ଆନାସ୍ତାସିଆ ପୋଟାପୋଭାଙ୍କୁ ପରାସ୍ତ କରିଛନ୍ତି। ସେହିପରି ମେର୍ଟେନ୍ସ ୬-୧, ୬-୩ରେ ଜେସିକା ପେଗୁଲା, କାସାଟକିନା ୬-୦, ୬-୧ରେ ପେଟନ ଷ୍ଟିଅନର୍ସଙ୍କୁ ହରାଇ ଦେଇଛନ୍ତି। ଅନ୍ୟଏକ ମ୍ୟାଚରେ ଏଲିନା ସ୍ବିତୋଲିନା ୨-୬, ୬-୨, ୭-୫ ସେଟ୍ରେ ଆନା ବ୍ଲିଙ୍କୋଭାଙ୍କୁ ପରାସ୍ତ କରିଛନ୍ତି। ପରାଜିତ ହୋଇଥିବା ଖେଳାଳିଙ୍କ ମଧ୍ୟରେ ଆମେରିକାର ପେଗୁଲା ବିଶ୍ୱ ର଼୍ୟାଙ୍କିଙ୍ଗ୍ର ତୃତୀୟ ସ୍ଥାନରେ ରହିଛନ୍ତି। ତାଙ୍କୁ ହରାଇଥିବା ମେର୍ଟେନ୍ସ ୨୮ତମ ର଼୍ୟାଙ୍କ୍ରେ ଅଛନ୍ତି। ଗତ ୫ଟି ବଡ଼ ଟୁର୍ନାମେଣ୍ଟ ମଧ୍ୟରୁ ୪ଟିରେ ସେ କ୍ୱାର୍ଟର ଫାଇନାଲରେ ପ୍ରବେଶ କରିଥିଲେ। ଏହା ମଧ୍ୟରେ ଗତବର୍ଷର ଫ୍ରେଞ୍ଚ୍ ଓପନ ସାମିଲ। ଏହା ପୂର୍ବରୁ ୫ମ ସିଡ୍ କାରୋଲିନା ଗାର୍ସିଆ, ୮ମ ସିଡ୍ ମାରିଆ ସାକାରି ଓ ୧୦ମ ସିଡ୍ ପେଟ୍ରା କ୍ୱିଟୋଭା ମଧ୍ୟ ଶୀଘ୍ର ବିଦାୟ ନେଇଛନ୍ତି।
ଜୋକୋଭିଚ୍ ବିଜୟୀ
ପୁରୁଷ ସିଙ୍ଗଲ୍ସର ଏକ ତୃତୀୟ ରାଉଣ୍ଡ ମ୍ୟାଚରେ ନୋଭାକ୍ ଜୋକୋଭିଚ୍ ୭-୬ (୭/୪), ୭-୬ (୭/୫), ୬-୨ ସେଟ୍ରେ ଆଲେଜାଣ୍ଡ୍ରୋ ଡାଭିଡୋଭିଚ୍ ଫୋକିନାଙ୍କୁ ପରାସ୍ତ କରିଛନ୍ତି। ୭ମ ସିଡ୍ ଆନ୍ଦ୍ରେ ରୁବ୍ଲେଭ୍ଙ୍କୁ ବିଦାୟ ପଥ ଦେଖାଇଛନ୍ତି ଲୋରେଞ୍ଜୋ ସୋନେଗୋ। ୫ ସେଟ୍ ବିଶିଷ୍ଟ ସଂଘର୍ଷପୂର୍ଣ୍ଣ ଫାଇନାଲରେ ସୋନେଗୋ ୫-୭, ୦-୬, ୬-୩, ୭-୬ (୭/୫), ୬-୩ ସେଟ୍ରେ ରୁବଲେଭଙ୍କୁ ପରାସ୍ତ କରିଛନ୍ତି। ଅନ୍ୟ ଏକ ମ୍ୟାଚରେ ୧୧ତମ ସିଡ୍ କରେନ ଖାଚାନୋଭ ୬-୪, ୬-୧, ୩-୬, ୭-୬ (୭/୫) ସେଟ୍ରେ ଥାନାସି କୋକିନାକିସ୍ଙ୍କୁ ହରାଇ ଚତୁର୍ଥ ରାଉଣ୍ଡରେ ପ୍ରବେଶ କରିଛନ୍ତି।
