ବନ୍ତ,୩୧। ୧(କିଶୋର କୁମାର ସେଠୀ): ଭଦ୍ରକ ଜିଲା ବନ୍ତ ଥାନା ଅଞ୍ଚଳରେ କଥାକଟାକଟିରୁ ଛୁରା ମାଡ଼ । ପୋଲିସ ଅଭିଯୋଗ ପାଇବା ପରେ ତଦନ୍ତ ଆରମ୍ଭ କରିଥିବା ବେଳେ ଘଟଣାରେ ସମ୍ପୃକ୍ତ ଦୁଇ ଜଣଙ୍କୁ ଅଟକ ରଖିଛି । ଛୁରା ମାଡ଼ରେ ଗୁରୁତର ବ୍ୟକ୍ତି କଟକ ମେଡିକାଲରେ ମୃତ୍ୟୁ ସହ ସଂଗ୍ରାମ କରୁଛନ୍ତି।
ଅଭିଯୋଗ ଅନୁଯାୟୀ, ଗତ ସୋମବାର ଧନିଓଝା ଗ୍ରାମର ବାଦଲ ଯେନା, ଆପଣ୍ଡା ଗ୍ରାମର ଶୁଭଙ୍କର ମୁଖି ଏବଂ ବରକୋଣା ଗ୍ରାମର ଶକ୍ତି ରଞ୍ଜନ ଯେନା ମିଳିମିଶି ନିକଟସ୍ଥ ଅଞ୍ଚଳକୁ ଟେଣ୍ଟ କାର୍ଯ୍ୟ କରିବାକୁ ଯାଇଥିଲେ । କାର୍ଯ୍ୟ କରୁଥିବା ସମୟରେ ବାଦଲ ଏବଂ ଶୁଭଙ୍କର ସହିତ ଶକ୍ତି ରଞ୍ଜନଙ୍କର କୌଣସି କାରଣକୁ ନେଇ ଝଗଡା ହୋଇଥିଲା l କାର୍ଯ୍ୟ ସାରି ଘରକୁ ଫେରୁଥିବା ବେଳେ ରାତି ପ୍ରାୟ ୧୦ଟା ସମୟରେ ବାଦଲ ଏବଂ ଶୁଭଙ୍କରଙ୍କୁ ବରକୋଣା ସ୍କୁଲ ନିକଟରେ ଶକ୍ତି ରଞ୍ଜନ ଏବଂ ତାଙ୍କ ଗ୍ରାମର ଚନ୍ଦ୍ରକାନ୍ତ ଯେନା ମିଳିମିଶି ଛୁରିରେ ଆକ୍ରମଣ କରିଥିଲେ l ଉଭୟଙ୍କୁ ଗୁରୁତର ଅବସ୍ଥାରେ ସ୍ଥାନୀୟ କୋଳିପଦି ଗ୍ରାମବାସୀ ଉଦ୍ଧାର କରି ପ୍ରଥମେ ବରପଦା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ l ପରେ ତାଙ୍କୁ ଭଦ୍ରକ ଜିଲା ମୁଖ୍ୟ ଚିକିତ୍ସାଳୟ ନିଆଯାଇଥିଲା l କିନ୍ତୁ ବାଦଲଙ୍କ ସ୍ବାସ୍ଥ୍ୟ ଅବସ୍ଥା ଗୁରୁତର ହେବାରୁ ତାଙ୍କୁ କଟକ ମେଡିକାଲ ସ୍ଥାନାନ୍ତର କରାଯାଇଛି l ମଙ୍ଗଳବାର ବାଦଲଙ୍କ କକା ସୁବାଷ ଯେନାଙ୍କ ଲିଖିତ ଅଭିଯୋଗ ଆଧାରରେ ପୋଲିସ ୧୧୮/୨୦୨୬ ରେ ଏକ ମାମଲା ରୁଜୁ କରିଛି l ଅଭିଯୁକ୍ତ ଶକ୍ତି ରଞ୍ଜନ ଏବଂ ଚନ୍ଦ୍ରକାନ୍ତକୁ ପୋଲିସ ଅଟକ ରଖିଥିବା ବେଳେ ଆକ୍ରମଣରେ ବ୍ୟବହୃତ ଛୁରିକୁ ଜବତ କରାଯାଇଥିବା ଭାରପ୍ରାପ୍ତ ଥାନା ଅଧିକାରିଣୀ ଅସ୍ମିତା ପ୍ରଧାନ କହିଛନ୍ତି । ତଦନ୍ତ ପରେ ଆକ୍ରମଣର ପ୍ରକୃତ କାରଣ ଜଣାପଡିବ ବୋଲି ଥାନା ଅଧିକାରିଣୀ ପ୍ରଧାନ ସୂଚନା ଦେଇଛନ୍ତି l ମଙ୍ଗଳବାର ଅପରାହ୍ନରେ ଭଦ୍ରକରୁ ସାଇଣ୍ଟିଫିକ ଟିମ୍ ବରକୋଣା ଗ୍ରାମରେ ପହଞ୍ଚି ତଦନ୍ତ ଆରମ୍ଭକରିଛନ୍ତି।
