ନୂଆଦିଲ୍ଲୀ, ୧୭ା୫(ପି.ଟି.): ଭାରତର ପ୍ରତିରକ୍ଷା ଗବେଷଣା ଓ ବିକାଶ ସଂଗଠନ (ଡିଆର୍ଡିଓ) ଏବଂ ସୈନ୍ୟବାହିନୀ ସମ୍ପର୍କିତ ସମ୍ବେଦନଶୀଳ ତଥ୍ୟ ସଂଗ୍ରହ କରି ଏହାକୁ ପାକିସ୍ତାନୀ ଓ ଅନ୍ୟ ବିଦେଶୀ ରାଷ୍ଟ୍ରର ଗୋଇନ୍ଦା ସଂସ୍ଥାକୁ ଯୋଗାଉଥିବା ଅଭିଯୋଗରେ ମୁକ୍ତବୃତ୍ତ ଖବରଦାତାଙ୍କ ବିରୋଧରେ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ମାମଲା ରୁଜୁ କରିଛି। ଏତଲାକୁ ଆଧାର କରି ସିବିଆଇ ମୁକ୍ତବୃତ୍ତ ଖବରଦାତା ବିବେକ ରଘୁବଂଶୀ ଓ ତାଙ୍କର କେତେଜଣ ଘନିଷ୍ଠଙ୍କର ଦିଲ୍ଲୀ ଏବଂ ଜୟପୁରରେ ଥିବା ଘର ଉପରେ ଚଢ଼ାଉ କରିଥିଲା। ଏହି ଚଢ଼ାଉ ବେଳେ ଅନେକ ସମ୍ବେଦନଶୀଳ ଦସ୍ତାବିଜ ଜବତ ହୋଇଛି। ରଘୁବଂଶୀଙ୍କୁ ଗୁପ୍ତଚର ଗିରି ପାଇଁ ଭାରତ ଓ ବିଦେଶରେ କିଏ ସହାୟତା କରୁଥିଲେ, ତାହା ଜାଣିବା ପାଇଁ ସିବିଆଇ ତଦନ୍ତ ଜାରି ରଖିଛି। ସିବିଆଇର ଅଭିଯାଗ ଅନୁଯାୟୀ ରଘୁବଂଶୀ ଜାତୀୟ ସୁରକ୍ଷା ସମ୍ପର୍କିତ ଯୋଗାଯୋଗ ତଥ୍ୟ ସହ ଭାରତର ରଣନୀତି ଓ କୂଟନୈତିକ କଥାବାର୍ତ୍ତାକୁ ତାଙ୍କର ବନ୍ଧୁ ରାଷ୍ଟ୍ରଙ୍କ ସହ ଶେୟାର କରୁଥିଲେ।
