ମସ୍କୋ,୧୬।୩ : ଆମେରିକାର ଡ୍ରୋନକୁ ରୁଷିଆର ଯୁଦ୍ଧ ବିମାନ ଦ୍ୱାରା ଗୁଳି କରି ଖସାଇ ଦିଆଯିବା ପରେ ଦୁଇ ଦେଶ ମଧ୍ୟରେ ତିକ୍ତତା ବୃଦ୍ଧି ପାଇଛି। ଏନେଇ ରୁଷିଆର ପ୍ରତିରକ୍ଷା ମନ୍ତ୍ରୀ ଏବଂ ଆମେରିକାର ପ୍ରତିରକ୍ଷା ମନ୍ତ୍ରୀଙ୍କ ମଧ୍ୟରେ ଏକ ଫୋନ ବାର୍ତ୍ତାଳାପ ହୋଇଥିଲା। ଗଣମାଧ୍ୟମର ରିପୋର୍ଟ ଅନୁଯାୟୀ, ଏହି ବାର୍ତ୍ତାଳାପ ସମୟରେ ରୁଷିଆର ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ ଆମେରିକା ଦ୍ୱାରା ରୁଷିଆର ଗୁପ୍ତଚରୀ କରାଯାଉଛି। ଯେଉଁଥିପାଇଁ ଡ୍ରୋନ ଘଟଣା ଘଟିଛି। ଆମେରିକା ଅଭିଯୋଗ କରିଛି ଯେ ରୁଷିଆ କୃଷ୍ଣ ସାଗରରେ ଡ୍ରୋନ ଉପରେ ଗୁଳି ଚଳାଇଛି।
ରୁଷିଆର ପ୍ରତିରକ୍ଷା ମନ୍ତ୍ରୀ ସର୍ଗିଇ ସୋଏଗୁ ଆମେରିକାର ପ୍ରତିରକ୍ଷା ମନ୍ତ୍ରୀ ଓଲିଉଡ ଅଷ୍ଟିନଙ୍କ ସହ ଆଲୋଚନା କରିଛନ୍ତି। ଏହି ସମୟ ମଧ୍ୟରେ ରୁଷୀ ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ ଯଦି ଭବିଷ୍ୟତରେ ଆମେରିକା ପକ୍ଷରୁ କୌଣସି ଉତ୍ତେଜନା ଦେଖାଯାଏ, ତେବେ ରୁଷିଆ ମଧ୍ୟ ଏହାର ଏକ ଉପଯୁକ୍ତ ଉତ୍ତର ଦେବ। ]
ରୁଷିଆର ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ କ୍ରିମିୟା ଉପକୂଳରେ ଉଡ଼ୁଥିବା ଆମେରିକାର ରଣନୈତିକ ଡ୍ରୋନ ଏକ ଉତ୍ତେଜନାମୂଳକ କାର୍ଯ୍ୟ। ଏହାଦ୍ୱାରା କୃଷ୍ଣ ସାଗର ଅଞ୍ଚଳରେ ଦୁଇ ଦେଶ ମଧ୍ୟରେ ଯୁଦ୍ଧ ପରିସ୍ଥିତି ସୃଷ୍ଟି ହୋଇପାରେ। ରୁଷିଆ ବର୍ତ୍ତମାନ ଏଭଳି ଉତ୍ତେଜନାରେ ଲିପ୍ତ ରହିବାକୁ ଚାହୁଁନାହିଁ କିନ୍ତୁ ଯଦି ଏହା ଜାରି ରହେ ତେବେ ଏହାର ସମାନ ଅନୁପାତରେ ଉତ୍ତର ଦିଆଯିବ। ଏନେଇ ରୁଷିଆରର ସେନା ମୁଖ୍ୟ ଭାଲେରୀ ଜେରାସିମୋଭ ଏବଂ ଆମେରିକାର ସେନା ମୁଖ୍ୟ ମାର୍କ ମିଲିଙ୍କ ମଧ୍ୟରେ ମଧ୍ୟ ଆଲୋଚନା ହୋଇଛି।
