କଲାବର୍ଗୀ(କର୍ନାଟକ),୬।୩: ଏକ ବଡ଼ଧରଣର ବିମାନ ଦୁର୍ଘଟଣାରୁ ବଞ୍ଚିଗଲେ କର୍ନାଟକର ପୂର୍ବତନ ମୁଖ୍ୟମନ୍ତ୍ରୀ ବିଏସ୍ ୟେଦୁରପ୍ପା। କର୍ନାଟକର କଲାବର୍ଗୀର ଜେବରଗୀକୁ ଏକ କାର୍ଯ୍ୟକ୍ରମରେ ଯୋଗଦେବାକୁ ଯାଉଥିବା ବେଳେ ହେଲିକପ୍ଟର ଅବତରଣରେ ସମସ୍ୟା ହୋଇ ଦୁର୍ଘଟଣାର ଆଶଙ୍କା ଦେଖାଦେଇଥିଲା। ମଝି ଆକାଶରେ ୟେଦୁରପ୍ପାଙ୍କ ହେଲିକପ୍ଟର କିଛି ସମୟ ପାଇଁ ଦୋହଲି ଯାଇଥିଲା। ହେଲେ ପାଇଲଟ୍ ସୁରକ୍ଷିତ ଲ୍ୟାଣ୍ଡିଂ କରିବାରୁ ହେଲିକପ୍ଟରରେ ଥିବା ସମସ୍ତେ ସୌଭାଗ୍ୟବଶତଃ ବଞ୍ଚତ୍ ଯାଇଥିଲେ।
ସୋମବାର ୟେଦୁରପ୍ପା ଜେବରଗୀକୁ ଏକ କାର୍ଯ୍ୟକ୍ରମରେ ଯୋଗଦେବାକୁ ଯାଇଥିଲେ। ଏନେଇ ଏକ ଫାର୍ମ ହାଉସ୍ ନିକଟରେ ହେଲିକପ୍ଟର ଅବତରଣ କରିବାକୁ ଜାଗା ଚିହ୍ନଟ ହୋଇଥିଲା। ମାତ୍ର ହେଲିକପ୍ଟର ଅବତରଣ କରିବା ସମୟରେ ଆଖପାଖରେ ଥିବା ପ୍ଲାଷ୍ଟିକ ଏବଂ ପଲିଥିନ, କପଡ଼ା ଉଡ଼ି ବ୍ଲେଡ୍ରେ ଲାଗିଯାଇଥିଲା। ଫଳରେ ହେଲିକପ୍ଟର ଅବତରଣ କରି ନ ପାରି ପୁଣି ଉପରକୁ ଉଠିଯାଇଥିଲା। ସେତିକିବେଳେ ମଝି ଆକାଶରେ ହେଲିକପ୍ଟର ଭାରସାମ୍ୟ ହରାଇ ଦୋହଲିବାରେ ଲାଗିଥିଲା। ଏନେଇ ଅଘଟଣ ଘଟବା ଆଶଙ୍କା କରାଯାଇଥିଲା। ହେଲେ ପାଇଲଟ୍ ଉପସ୍ଥିତ ବୁଦ୍ଧି ଖଟାଇ ହେଲିକପ୍ଟରକୁ ସୁରକ୍ଷିତ ଅବତରଣ କରିଥିଲେ। ଏବେ ଏହାର ଏକ ଭିଡିଓ ଭାଇଲାର ହେବାରେ ଲାଗିଛି।
