ଟୋକିଓ: ଜାପାନରେ ଏକ ମମିଫାଏଡ୍ ମର୍ମେଡ୍ ମମି ଠାବ ହୋଇଛି, ଯାହା ବୈଜ୍ଞାନିକଙ୍କ ପାଇଁ ଶହ ଶହ ବର୍ଷ ଧରି ରହସ୍ୟ ହୋଇ ରହିଥିଲା। ରିପୋର୍ଟ ଅନୁସାରେ, ଏହି ମମିକୁ ଜାପାନର ଆଶାକୁଚି ସହରର ଏନ୍ଜୁଇନ୍ ମନ୍ଦିରରେ ରଖାଯାଇଥିଲା। ତେବେ ୩୦୦ ବର୍ଷ ପରେ ଅନୁସନ୍ଧାନକୁ ଜଣାପଡ଼ିଛି ଯେ ଉକ୍ତ ମମିଟି ମନୁଷ୍ୟକୃତ। ଏହା କାଗଜ, କପଡ଼ା, ସୂତା ଏବଂ ମାଛର ଅଙ୍ଗପ୍ରତ୍ୟଙ୍ଗରେ ତିଆରି। ଜୀବଟିକୁ ପ୍ରଶାନ୍ତ ମହାସାଗରର ଶିକୋକୁ ଦ୍ୱୀପରୁ ୧୭୩୬ରୁ ୧୭୪୧ ମସିହା ମଧ୍ୟରେ ଧରାଯାଇଥିଲା। ଏହି ଜୀବର ଉଚ୍ଚତା ୩୦ ସେ.ମି. ହୋଇଥିବାବେଳେ ତାହାର ୧୨ ଇଞ୍ଚର ଲାଞ୍ଜ, ୨ଟି ହାତ ଏବଂ ବିକୃତ ଚେହେରା ଥିଲା। ତା’ର ତୀକ୍ଷ୍ନ ଦାନ୍ତ ଥିବାବେଳେ ସେ ସମୁଦ୍ର କୂଳରେ ମୃତ ଅବସ୍ଥାରେ ପଡ଼ିଥିଲା। ତା’ର ମୁଣ୍ଡରେ ମଣିଷଙ୍କ ପରି କେଶ ରହିଥିଲା। ଲାଞ୍ଜଟି ମାଛ ଲାଞ୍ଜ ସଦୃଶ ଥିଲା। ସେ ସମୟରେ କୁହାଯାଉଥିଲା ଯେ ଏପରି ମର୍ମେଡ୍ଙ୍କୁ ଖାଇଲେ ମଣିଷ ଅମର ହୋଇଯାନ୍ତି। କୁରାଶିକି ୟୁନିଭର୍ସିଟି ଅଫ୍ ସାଇନ୍ସ ଆଣ୍ଡ ଆର୍ଟସରୁ ଜଣାପଡ଼ିଛି ଯେ, ଏହି ଜୀବ ଦେହରେ ହାଡ଼ ନାହିଁ। ତା’ର କେଶ ଏକ ସ୍ତନ୍ୟପ୍ରାୟୀ ପ୍ରାଣୀ, ଦାନ୍ତ ଏକ ମାଛଠାରୁ, କାନ୍ଧ, ବାହୁ, ବେକ ଏବଂ ଗାଲ ମାଛ ଚମଡ଼ାରୁ ପ୍ରସ୍ତୁତ। ନଖ ପଶୁ କେରାଟିନ୍ରୁ ଏବଂ ଶରୀରର ତଳଭାଗ ସମ୍ପୂର୍ଣ୍ଣ ମାଛ ଲାଞ୍ଜ ପରି ରହିଛି। ଏହି ଜୀବଟି ୧୬୦୩ରୁ ୧୮୬୭ ପର୍ଯ୍ୟନ୍ତ ଜାପାନର ଇତିହାସର ଏକ ଯୁଗ ଇଡୋ ସମୟରେ ତିଆରି ହୋଇଥିବା ଜଣାପଡ଼ିଛି।
