ଗୋପ,୭।୨(ଡି.ଏନ୍.ଏ.):ପୁରୀ ଜିଲା ଗୋପ ବ୍ଲକ ଅଞ୍ଚଳରେ ଅଏଲ ଇଣ୍ଡିଆ କମ୍ପାନୀ ପକ୍ଷରୁ ଚାଲିଥିବା ତୈଳ, ଇନ୍ଧନ ସନ୍ଧାନ କାର୍ଯ୍ୟ ଜୋର୍ସୋରରେ ଚାଲିଥିବା ବେଳେ ଏବେ ପ୍ରାୟ ଶେଷ ପର୍ଯ୍ୟାୟରେ ପହଞ୍ଚତ୍ଗଲାଣି। ଆଉ ସପ୍ତାହ ପରେ କମ୍ପାନୀ ପକ୍ଷରୁ ଆରମ୍ଭ ହେବ ବୋରିଂ କାର୍ଯ୍ୟ। ଏଥିପାଇଁ ସମସ୍ତ ବ୍ୟବସ୍ଥା ହୋଇସାରିଥିବା ବେଳେ ପ୍ରାୟ ୫୦ରୁ ଊଦ୍ଧର୍ବ ଅତ୍ୟାଧୁନିକ ମେଶିନ ବସାଯାଇଛି। ବିଭିନ୍ନ ରାଜ୍ୟ ଓ ବିଦେଶରୁ ଆସିଥିବା ଏହିସବୁ ଯନ୍ତ୍ରାଂଶ ମାଧ୍ୟମରେ ବୋରିଂ କାର୍ଯ୍ୟ କରାଯିବ ବୋଲି ସୂଚନା ମିଳିଛି। ଉଜ୍ଜ୍ବଳ ଆଲୋକ ବ୍ୟବସ୍ଥା ପାଇଁ ୫ଟି ପାଓ୍ବାରବିଶିଷ୍ଟ ଜେନେରେଟର ମଧ୍ୟ ବସାଯାଇଛି। ଏହି ବୋରିଂ କାର୍ଯ୍ୟ ଲାଗି ୩୫ରୁ ଊଦ୍ଧର୍ବ ଇଞ୍ଜିନିୟର, ୨୦ରୁ ଊଦ୍ଧର୍ବ ଅଭିଜ୍ଞ କର୍ମଚାରୀଙ୍କ ସହିତ ଡାକ୍ତର ଓ ମ୍ୟାନେଜର ଆସିଥିବା ଅଏଲ୍ ଇଣ୍ତିଆ କମ୍ପାନୀ ପକ୍ଷରୁ ଜଣାପଡିଛି। ଏମାନଙ୍କ ରହିବା ପାଇଁ ମଧ୍ୟ ସ୍ବତନ୍ତ୍ର କଣ୍ଟେନର ବ୍ୟବସ୍ଥା କରାଯାଇଛି।
ପ୍ରକାଶ ଯେ, ୨୦୨୦ ମସିହାରୁ ଅଏଲ ଇଣ୍ତିଆ କମ୍ପାନୀ ପକ୍ଷରୁ ପୁରୀ ଜିଲାର ବିଭିନ୍ନ ବ୍ଲକରେ ଖନନ କାର୍ଯ୍ୟ ଜାରି ରହିଥିବା ବେଳେ ଗୋପ ବ୍ଲକର କୁଶୁପୁର ମୌଜାର କୁଶୁପୁର ଓ ମହଲପଡ଼ା ପଞ୍ଚାୟତର ଚିତ୍ରା ଗ୍ରାମ ନିକଟରେ ପ୍ରଚୁର ପ୍ରାକୃତିକ ଗ୍ୟାସ୍ ସହିତ ପେଟ୍ରୋଲ, ଡିଜେଲର ସନ୍ଧାନ ମିଳିଥିଲା। ଏହାପରେ ଅଏଲ ଇଣ୍ତିଆ କମ୍ପାନୀ ପକ୍ଷରୁ ଖନନ କାର୍ଯ୍ୟ ଚାଲୁରହିଥିଲା। ଶେଷରେ ସାଟେଲାଇଟ ଚିତ୍ର ମାଧ୍ୟମରେ ବି ମାଟିତଳେ ପ୍ରାକୃତିକ ଗ୍ୟାସ୍, ପେଟ୍ରୋଲ, ଡିଜେଲ ଭଳି ପଦାର୍ଥ ଥିବା ସୂଚନା ଆସିଥିଲା। ତେବେ କମ୍ପାନୀ ପକ୍ଷରୁ ବାରମ୍ବାର ବିଭିନ୍ନ ଉଚ୍ଚପଦସ୍ଥ ଅଧିକାରୀମାନେ ଗୋପର ଏହି ଦୁଇ ଅଞ୍ଚଳ ଗସ୍ତ କରିବା ପରେ ଆବଶ୍ୟକ ଜମି ଅଧିଗ୍ରହଣ କାର୍ଯ୍ୟ ଆରମ୍ଭ କରିଥିଲେ। ପ୍ରଥମ ଓ ଦ୍ବିତୀୟ ପର୍ଯ୍ୟାୟରେ କୁଶୁପୁର ମୌଜାରେ ୮ ଏକର ଜମି ଚିହ୍ନଟ କରି ୩୭ ଜଣ ଚାଷୀଙ୍କୁ ବ୍ୟାଙ୍କ ମାଧ୍ୟମରେ ଚୁକ୍ତିପତ୍ର ସ୍ବାକ୍ଷରିତ କରାଯାଇ ୯୭ ଲକ୍ଷ ଟଙ୍କା ଦିଆଯାଇଥିବା ବେଳେ ଅନୁରୂପ ଭାବେ ମହଲପଡା ପଞ୍ଚାୟତର ଚିତ୍ରାରେ ମଧ୍ୟ ଜମି ଅଧିଗ୍ରହଣ କରାଯାଇଥିଲା। ଏହାପରେ କମ୍ପାନୀ ପକ୍ଷରୁ ୩ଟି ଅସ୍ଥାୟୀ ପୋଖରୀ କରାଯିବା ବେଳେ କେମିକାଲ ଷ୍ଟକ୍ ଗୃହ ସହିତ ମେଶିନ ପିଣ୍ଡି କାର୍ଯ୍ୟ ଶେଷ ହୋଇଥିଲା।
ଯୁଦ୍ଧକାଳୀନ ଭିତ୍ତିରେ ଆନ୍ଧ୍ରପ୍ରଦେଶ, କର୍ନାଟକ, ମହାରାଷ୍ଟ୍ର ସହ ଅନ୍ୟାନ୍ୟ ରାଜ୍ୟରୁ ଅତ୍ୟାଧୁନିକ ମେଶିନ ଆସିଥିଲା ରି-ଫାଇନ ଲାଗି। ଏବେ ସପ୍ତାହ ପରେ ପ୍ରଥମେ ୩ ହଜାର ଫୁଟ ବୋରିଂ କରାଯାଇ ମାଟିତଳୁ ମାଟି, ପାଣି ସହିତ ଅନ୍ୟାନ୍ୟ ଜିନିଷକୁ ପରୀକ୍ଷା ନିରୀକ୍ଷା କରାଯିବ। ଏହାପରେ ରି-ଫାଇନ ଲାଗି ପଠାଯିବାର ବ୍ୟବସ୍ଥା କରାଯିବ। ଅଏଲ ଇଣ୍ତିଆ କମ୍ପାନୀ କିପା ନାମକ ଗୋଟିଏ କମ୍ପାନୀକୁ ଏହିସବୁ କାର୍ଯ୍ୟ କରିବାକୁ ଦାୟିତ୍ୱ ଦେଇଥିବା ବେଳେ ଆଉ କେତେକ ନାମୀଦାମୀ କମ୍ପାନୀ ମଧ୍ୟ ଅନ୍ୟାନ୍ୟ କାମ କରୁଛନ୍ତି ବୋଲି ଅଏଲ ଇଣ୍ତିଆ କମ୍ପାନୀର ଜଣେ ଇଞ୍ଜିନିୟର ସୂଚନା ଦେଇଛନ୍ତି।
