ଗୁଆହାଟୀ,୩।୨: ଆସାମ ସରକାର ବାଲ୍ୟ ବିବାହ ବିରୋଧରେ କଠୋର ଆଭିମୁଖ୍ୟ ଗ୍ରହଣ କରୁଛନ୍ତି। ହିମନ୍ତ ସରକାର ଏହି କୁପ୍ରଥା ବିରୋଧରେ ଅଭିଯାନକୁ ଜୋରଦାର କରିଛନ୍ତି। ଶୁକ୍ରବାର ଆସାମ ପୋଲିସ ବାଲ୍ୟ ବିବାହ ମାମଲାରେ ୧୮୦୦ ଲୋକଙ୍କୁ ଗିରଫ କରିଥିବା ଜଣାପଡ଼ିଛି।
ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ସରମା ଟୁଇଟ୍ କରି କହିଛନ୍ତି, ରାଜ୍ୟରେ ବାଲ୍ୟ ବିବାହ ନିଷେଧ ଅଧିନିୟମର ଉଲ୍ଲଂଘନ କରୁଥିବା ବ୍ୟକ୍ତିଙ୍କୁ ଗିରଫ କରାଯାଉଛି। ଏପର୍ଯ୍ୟନ୍ତ ୧,୮୦୦ରୁ ଅଧିକ ଲୋକଙ୍କୁ ଗିରଫ କରାଯାଇଛି। ଶୁକ୍ରବାର ସକାଳେ ଏହି ଅପରେଶନ ଆରମ୍ଭ ହୋଇଥିଲା। ଏହା ଆଗାମୀ କିଛି ଦିନ ଧରି ଚାଲିବ। ତେବେ ଏହି ମାମଲାରେ ପୋଲିସକୁ ‘ଶୂନ୍ୟ ସହନଶୀଳତା‘ ନୀତି ଆପଣାଇବାକୁ ସେ ନିର୍ଦ୍ଦେଶ ଦେଇଥିବା କହିଛନ୍ତି।
ଆଇନ କଣ?
ଆସାମ ସରକାର ୧୪ ବର୍ଷରୁ କମ ବାଳିକାଙ୍କୁ ବିବାହ କରୁଥିବା ପୁରୁଷମାନଙ୍କୁ ଯୌନ ଅପରାଧରୁ ସୁରକ୍ଷା ଦେବା ଏବଂ କିମ୍ବା POCSO ଅଧିନିୟମ ଅନୁଯାୟୀ କାର୍ଯ୍ୟାନୁଷ୍ଠାନ ନେବାକୁ ନିଷ୍ପତ୍ତି ନେଇଛନ୍ତି। ଯେଉଁ ପୁରୁଷମାନେ ୧୪-୧୮ ବର୍ଷ ବୟସର ବାଳିକାଙ୍କୁ ବିବାହ କରିଛନ୍ତି, ସେମାନଙ୍କୁ ବାଲ୍ୟ ବିବାହ ନିଷେଧ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ସରକାର କାହିଁକି କଠୋର ହେଲେ?
ଆସାମରେ ବାଲ୍ୟ ବିବାହ ହେତୁ ମାତୃ ଓ ଶିଶୁ ମୃତ୍ୟୁହାର ଅଧିକ ରହିଛି। ଶିଶୁଙ୍କ ମୃତ୍ୟୁ ହାର ଏବଂ ମାତୃ ମୃତ୍ୟୁହାରର ମୁଖ୍ୟ କାରଣ ବାଲ୍ୟ ବିବାହ ରହିଛି। ଏହାକୁ ରୋକିବା ପାଇଁ ସରକାର ବର୍ତ୍ତମାନ ପଦକ୍ଷେପ ନେଉଛନ୍ତି।
