ମୁମ୍ବାଇ,୨୨।୧ : ସୁପ୍ରିମକୋର୍ଟଙ୍କ ଫଇସଲାଗୁଡ଼ିକର ନକଲ ଖୁବ ଶୀଘ୍ର ହିନ୍ଦୀ ସହିତ ଅନ୍ୟ ଭାରତୀୟ ଭାଷାରେ ଉପଲବ୍ଧ ହେବ। ଏହା ଦ୍ୱାରା ଲୋକମାନଙ୍କୁ ନିଜ ଭାଷାରେ କୋର୍ଟର ଫଇସଲା ବିଷୟରେ ସୂଚନା ପାଇପାରିବେ। ମୁମ୍ବାଇର ଦାଦର ଯୋଗୀ ଅଡିଟୋରିୟମରେ ମହାରାଷ୍ଟ୍ର ଏବଂ ଗୋଆ (ବିସିଏମଜି) ବାର୍ କାଉନସିଲ ଦ୍ୱାରା ଆୟୋଜିତ ଏକ କାର୍ଯ୍ୟକ୍ରମରେ ପ୍ରଧାନ ବିଚାରପତି ଡି.ଓ୍ବାଇ. ଚନ୍ଦ୍ରଚୂଡ଼ ଯୋଗଦେଇ ଏହି ଘୋଷଣା କରିଛନ୍ତି।
ପ୍ରଧାନ ବିଚାରପତି କହିଛନ୍ତି ଯେ ଦେଶର ପ୍ରତି ବ୍ୟକ୍ତିଙ୍କୁ ଶସ୍ତା ଏବଂ ଶୀଘ୍ର ନ୍ୟାୟ ପାଇବାକୁ ନିଶ୍ଚିତ କରିବାକୁ ସମସ୍ତ ପ୍ରକାର ପ୍ରୟାସ କରାଯିବ। ଯେପର୍ଯ୍ୟନ୍ତ ଆମ ଦେଶର ନାଗରିକ ସେମାନେ ବୁଝୁଥିବା ଭାଷାରେ କୋର୍ଟର ଫଇସଲା ବିଷୟରେ ସୂଚନା ନ ପାଇଛନ୍ତି, ସେପର୍ଯ୍ୟନ୍ତ ନ୍ୟାୟ ବ୍ୟବସ୍ଥା ଅର୍ଥପୂର୍ଣ୍ଣ ହେବ ନାହିଁ।
ସେ କହିଛନ୍ତି ଯେ ଟେକ୍ନୋଲୋଜି ସାହାଯ୍ୟରେ କୋର୍ଟରେ ଏକ ବ୍ୟାପକ ପରିବର୍ତ୍ତନ କରାଯାଇପାରିବ। କୃତ୍ରିମ ବୁଦ୍ଧିମତା ସାହାଯ୍ୟରେ ସୁପ୍ରିମକୋର୍ଟଙ୍କ ରାୟ ପ୍ରତ୍ୟେକ ଭାଷାରେ ଉପଲବ୍ଧ କରାଇବାକୁ କାର୍ଯ୍ୟ ଚାଲିଛି। ବ୍ୟକ୍ତିବିଶେଷଙ୍କ ପାଇଁ ଆଇନ ପ୍ରସ୍ତୁତ କରାଯାଇଛି। ସେଥିପାଇଁ ବ୍ୟବସ୍ଥା କେବେ ମଧ୍ୟ ବ୍ୟକ୍ତିଙ୍କ ଉପରେ ରହିପାରିବ ନାହିଁ।
ପ୍ରଧାନ ବିଚାରପତି କୋର୍ଟ ପ୍ରକ୍ରିୟାର ଲାଇଭ ଟେଲିକାଷ୍ଟ ଉପରେ ଗୁରୁତ୍ୱାରୋପ କରି କହିଛନ୍ତି ଯେ କୋର୍ଟକୁ କାଗଜହୀନ ଏବଂ ପ୍ରଯୁକ୍ତିବିଦ୍ୟା ସକ୍ଷମ କରିବା ମୋର ମିଶନ । ନ୍ୟାୟପାଳିକାରେ ମହିଳାଙ୍କ ସଂଖ୍ୟା ବୃଦ୍ଧିକୁ ପ୍ରଶଂସା କରି ସେ ଯୁବବର୍ଗ ଏବଂ ନୂତନ ଆଇନଜୀବୀଙ୍କୁ ଅଧିକ ସୁଯୋଗ ଦେବା ଉପରେ ଗୁରୁତ୍ୱାରୋପ କରିଥିଲେ। ସେ କହିଥିଲେ ମୁଁ ପ୍ରତିଦିନ ଅଧ ଘଣ୍ଟା ପାଇଁ ଯୁବ ଆଇନଜୀବୀଙ୍କ କଥା ଶୁଣେ। ଏହା ଦ୍ୱାରା ଦେଶ ବିଷୟରେ ସୂଚନା ମିଳିଥାଏ।
