ନୂଆଦିଲ୍ଲୀ,୬।୧: ନିକଟରେ ଏୟାର ଇଣ୍ଡିଆ ବିମାନରେ ଜଣେ ଯାତ୍ରୀ ନିଜ ସହ-ଯାତ୍ରୀଙ୍କ ଉପରେ ପରିସ୍ରା କରିଥିବା ଘଟଣା ସାମ୍ନାକୁ ଆସିବା ଚର୍ଚ୍ଚାର ବିଷୟ ପାଲଟିଥିଲା। ଏହାକୁ ସବୁ ମାହୋଲରେ ନିନ୍ଦା କରାଯାଇଛି। ଏଭଳି ଘଟଣା ପରେ ବର୍ତ୍ତମାନ ଦେଶର ଡାଇରେକ୍ଟୋରେଟ ଜେନେରାଲ ଅଫ୍ ସିଭିଲ ଆଭିଏସନ (ଡିଜିସିଏ) ଅସଦାଚରଣ କରୁଥିବା ଯାତ୍ରୀମାନଙ୍କ ସହ ମୁକାବିଲା କରିବା ପାଇଁ ଏୟାରଲାଇନ୍ସ ପକ୍ଷରୁ ଏକ ଆଡଭାଇଜାରୀ ଜାରି କରାଯାଇଛି। ନିର୍ଦ୍ଧାରିତ ବିମାନ ସେବାଗୁଡିକର ମୁଖ୍ୟଙ୍କୁ ପଠାଯାଇଥିବା ନିର୍ଦ୍ଦେଶାବଳୀରେ କୁହାଯାଇଛି ଯେ, ଆବଶ୍ୟକ ସମୟରେ ପରିସ୍ଥିତିକୁ ଏଡାଇବା ପାଇଁ ଉପକରଣଗୁଡ଼ିକର ବ୍ୟବହାର କରିବା ଉଚିତ୍। ବିମାନରେ ଯାତ୍ରୀଙ୍କ ସୁରକ୍ଷା ଦାୟିତ୍ୱ ପାଇଲଟ୍-ଇନ୍ କମାଣ୍ଡଙ୍କ ଉପରେ ରହିଛି। ସେହିପରି ବିମାନରେ ଶାନ୍ତି ବଜାୟ ରଖିବା ଏବଂ ସମସ୍ତ ଯାତ୍ରୀଙ୍କ ଯତ୍ନ ନେବା ମଧ୍ୟ କ୍ୟାବିନ୍ କ୍ର୍ୟୁ ସଦସ୍ୟଙ୍କ ଦାୟିତ୍ୱ। ଯଦି କୌଣସି ଅଘଟଣ ଘଟେ ତେବେ କାର୍ଯ୍ୟନୁଷ୍ଠାନ ଗ୍ରହଣ ପାଇଁ ସେମାନଙ୍କୁ ଅନୁମତି ଦିଆଯିବ। ଏଥିସହ ଡିଜିସିଏ ଆହୁରି ଅନେକ କଥା ଗାଇଡଲାଇନ୍ସରେ ସାମିଲ କରିଛି। ନିକଟରେ ଘଟିଥିବା ସାମ୍ପ୍ରତିକ ମାମଲାଗୁଡ଼ିକ ବିମାନ ଯାତ୍ରା କରାଉଥିବା ଏୟାରଲାଇନ୍ସର ଭାବମୂର୍ତ୍ତିକୁ କ୍ଷୁର୍ଣ୍ଣ କରିଛି। ବିମାନରେ ଘଟିଥିବା ଅସଦାଚରଣକୁ ରୋକିବାରେ ପୋଷ୍ଟ ହୋଲ୍ଡର୍ସ, ପାଇଲଟ ଓ କ୍ୟାବିନ କ୍ର୍ୟୁ ମେମ୍ବର ଉପଯୁକ୍ତ କାର୍ଯ୍ୟାନୁଷ୍ଠାନ ନେବାରେ ବିଫଳ ହୋଇଛନ୍ତି ବୋଲି ଡିଜିସିଏ ପକ୍ଷରୁ କୁହାଯାଇଛି।
