ଭୁବନେଶ୍ୱର, ୨୧।୧୨(ବ୍ୟୁରୋ): ଦୁଇଟି ପର୍ଯ୍ୟାୟରେ ୧୩ ଦିନର ରିମାଣ୍ଡ ସରିବା ପରେ ସୋମବାରଠାରୁ ଝାରପଡ଼ା ଜେଲକୁ ଫେରିଯାଇଛନ୍ତି ରହସ୍ୟମୟୀ ବ୍ଲାକମେଲର ଅର୍ଚ୍ଚନା ନାଗ। ଏପରି ସ୍ଥିତିରେ ମଙ୍ଗଳବାର ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)କୁ ଅର୍ଚ୍ଚନାଙ୍କ ଡିଜିଟାଲ ଦସ୍ତାବିଜ୍ର ଫୋରେନ୍ସିକ୍ ରିପୋର୍ଟ ମିଳିଛି। ଷ୍ଟେଟ୍ ଫୋରେନ୍ସିକ୍ ଲ୍ୟାବ୍ ପକ୍ଷରୁ ଇଡିକୁ ଏହା ଦିଆଯାଇଛି। ଏହି ପ୍ରଥମ ପର୍ଯ୍ୟାୟର ରିପୋର୍ଟରେ ୧୨ଟି ସାମ୍ପଲ ରିପୋର୍ଟ ରହିଛି। ଏଥିମଧ୍ୟରେ ଅର୍ଚ୍ଚନାଙ୍କ ମୋବାଇଲ, ଲାପଟପ୍, ପେନ୍ଡ୍ରାଇଭ ଓ ଟ୍ୟାବ୍ର ତଥ୍ୟ ରହିଛି। ତେବେ ରିମାଣ୍ଡ ସମୟରେ ଅର୍ଚ୍ଚନା ଏହି ମାମଲା ସଂକ୍ରାନ୍ତରେ ମୁହଁ ଖୋଲୁ ନ ଥିବାରୁ ଇଡି ଡିଜିଟାଲ ଦସ୍ତାବିଜ୍ ମାଗିଥିଲା। ହେଲେ ଫରେନ୍ସିକ୍ ଲ୍ୟାବ୍ ପକ୍ଷରୁ ଏହା ଦେବାକୁ ବିଳମ୍ବ କରାଯାଇଥିଲା। ଏ ନେଇ ଇଡି କୋର୍ଟଙ୍କ ଦ୍ୱାରସ୍ଥ ହୋଇଥିଲା। ହେଲେ ଏବେ ଅର୍ଚ୍ଚନାଙ୍କ ରିମାଣ୍ଡ ସରିବା ପରେ ଏହି ରିପୋର୍ଟ ମିଳିଥିବାରୁ ଏହାକୁ ନେଇ ଚର୍ଚ୍ଚା ହେଉଛି। ଜାଣି ଜାଣି ଫୋରେନ୍ସିକ୍ ଲ୍ୟାବ୍ ପକ୍ଷରୁ ଏହି ରିପୋର୍ଟ ଦିଆଯାଉଥିବା କୁହାଯାଉଛି।
ସେହିପରି ଖଣ୍ଡଗିରି ଥାନା ପୋଲିସ ମଧ୍ୟ ଏହି ଡିଜିଟାଲ ଦସ୍ତାବିଜ୍ ରିପୋର୍ଟ ଆଣିଛି। ଏହି ରିପୋର୍ଟ ଆଧାରରେ ମାମଲାର ତଦନ୍ତ କରାଯିବ ବୋଲି ଥାନାଧିକାରୀ ଦୟାନିଧି ନାୟକ କହିଛନ୍ତି। ତେବେ ଦୀର୍ଘଦିନର ଜେରା ଓ ଚଢ଼ାଉ ସତ୍ତ୍ୱେ ଏଯାଏ ବ୍ଲାକ୍ମେଲର ଅର୍ଚ୍ଚନାଙ୍କ କଳା ସାମ୍ରାଜ୍ୟର କାଣିଚାଏ ଗୁମର ଖୋଲିପାରି ନାହିଁ ପ୍ରବର୍ତ୍ତନ ନିର୍ଦ୍ଦେଶାଳୟ। ମାତ୍ର କିଛି ଲକ୍ଷ ଟଙ୍କାର ବେଆଇନ କାରବାର ଧରିଥିଲେ ମଧ୍ୟ ରାଜ୍ୟର ଏହି ବଡ଼ ହନିଟ୍ରାପ୍, ବ୍ଲାକ୍ମେଲିଂ ଓ ଠକେଇ ଘଟଣାରେ ପ୍ରଭାବଶାଳୀ ନେତା, ଅଫିସର, ପୋଲିସ ଓ ବ୍ୟବସାୟୀଙ୍କ ସମ୍ପୃକ୍ତିର ପ୍ରମାଣ ପାଇପାରି ନାହିଁ। ଅନ୍ୟପକ୍ଷରେ ଅର୍ଚ୍ଚନାଙ୍କ ସ୍ବାମୀ ଜଗବନ୍ଧୁ ଚାନ୍ଦଙ୍କ ୯ ଦିନିଆ ରିମାଣ୍ଡରୁ ଆଉ ୨ଦିନ ବାକି ଅଛି। ସେ ଗତ ୧୪ ତାରିଖରୁ ରିମାଣ୍ଡରେ ଆସି ଜେରାର ସମ୍ମୁଖୀନ ହେଉଛନ୍ତି। ଆଗାମୀ ୨୨ ତାରିଖରେ ତାଙ୍କର ରିମାଣ୍ଡ ସରିବାର ଥିବାରୁ ତାଙ୍କଠୁ ଆଉ କିଛି ତଥ୍ୟ ହାସଲ କରିବାକୁ ଇଡି ଆଶା ରଖିଛି। ତେବେ ଏହି ଡିଜିଟାଲ ଦସ୍ତାବିଜ୍ର ରିପୋର୍ଟ ମିଳିବା ପରେ ଇଡି ତା’ର ତଦନ୍ତକୁ ଅଧିକ କ୍ରିୟାଶୀଳ କରିବ ବୋଲି କୁହାଯାଉଛି। ଏପରିକି ଜେଲ ଭିତରେ ଇଡି ଏହି ଡିଜିଟାଲ ଦସ୍ତାବିଜ୍ ଆଧାରରେ ଅର୍ଚ୍ଚନାଙ୍କୁ ଜେରା କରିବାର ଯୋଜନା ରଖିଥିବା ସୂଚନା ମିଳିଛି। ଉଲ୍ଲେଖଯୋଗ୍ୟ, ପ୍ରଥମ ପର୍ଯ୍ୟାୟରେ ୭ଦିନ ଓ ଦ୍ୱିତୀୟ ପର୍ଯ୍ୟାୟରେ ୬ଦିନ ପାଇଁ ରିମାଣ୍ଡରେ ଆସି ଅର୍ଚ୍ଚନା ଚୁପ୍ ରହିଥିଲେ। ତେଣୁ ଆଉ ୨ ଦିନ ରିମାଣ୍ଡରେ ନେଇ କିଛି ପ୍ରମାଣ ପାଇବାକୁ ଇଡି ମଙ୍ଗଳବାର ଆବେଦନ କରିଥିଲା, କିନ୍ତୁ କୋର୍ଟ ଏହି ଆବେଦନକୁ ଖାରଜ କରିଦେଇଥିଲେ।
