ପୁରୁଷୋତ୍ତମପୁର,୧୮।୧୨(ଡି.ଏନ୍.ଏ.): ଗଞ୍ଜାମ ଜିଲା ପୁରୁଷୋତ୍ତମପୁରବାସୀଙ୍କ ଦୀର୍ଘଦିନର ସ୍ବପ୍ନ ପୁରଣ ହେବାକୁ ଯାଉଛି। ସହରର ମୁଖ୍ୟରାସ୍ତାରେ ଷ୍ଟ୍ରିଟଲାଇଟ ଲଗାଇବା, ନୂତନ ବସ୍ଷ୍ଟାଣ୍ଡ ନିର୍ମାଣ, ପୁରୁଷୋତ୍ତମପୁର-ବ୍ରହ୍ମପୁର ରାସ୍ତାର କାଳୀ ମନ୍ଦିର ଛକଠାରୁ ପାଣ୍ଡିଆ ଛକ ମଧ୍ୟରେ ଥିବା ବିଭିନ୍ନ ସାହି ବସ୍ତି ରାସ୍ତା ସଂକୀର୍ଣ୍ଣ ହେତୁ ପାଣ୍ଡିଆ ଛକରୁ ସ୍ବପ୍ନେଶ୍ବର ମନ୍ଦିର ଛକକୁ ଏକ ବାଇପାସ୍ ରାସ୍ତା ଲାଗି ସହରବାସୀ ପୂର୍ବରୁ ଦାବି କରିଆସୁଥିଲେ। ଏହି ସବୁ ସମସ୍ୟା ନେଇ ଖଲ୍ଲିକୋଟ ବିଧାୟିକା ସୂର୍ଯ୍ୟମଣି ବୈଦ୍ୟ ସମାଧାନ ଲାଗି ଶନିବାର ଶକ୍ତି ମନ୍ତ୍ରୀ ପ୍ରତାପ କେଶରୀ ଦେବଙ୍କ ସମେତ ରାଜସ୍ବ ବିଭାଗ, ପରିବହନ ବିଭାଗ ଏବଂ ପୂର୍ତ୍ତ ବିଭାଗ ସହ କାର୍ଯ୍ୟକାରୀ ସକାଶେ ଆଲୋଚନା କରିଛନ୍ତି। ଏଥିନେଇ ସରକାରଙ୍କ ପକ୍ଷରୁ ଗ୍ରୀନ୍ ସିଗ୍ନାଲ ମିଳିଛି। ଫଳରେ ଜନସାଧାରଣଙ୍କ ବହୁ ଦିନର ସ୍ବପ୍ନ ପୂରଣ ହେବା ଏକ ପ୍ରକାର ସ୍ପଷ୍ଟ ହୋଇଛି।
ଏପରି କି ସହର ମଧ୍ୟ ଦେଇ ଯାଇଥିବା ପୂର୍ତ୍ତ ବିଭାଗ ଆସିକା-ହୁମ୍ମା ମୁଖ୍ୟ ରାସ୍ତାର କୁମାରୀଠାରୁ ସ୍ବପ୍ନେଶ୍ବର ମନ୍ଦିର ଛକ ପର୍ଯ୍ୟନ୍ତ ପ୍ରାୟ ୨କିମି ରାସ୍ତା ୪ ଲେନ୍ ହେବାର ପ୍ରାୟ ଦୁଇ ବର୍ଷ ବିତିଥିଲେ ସୁଦ୍ଧା ରାସ୍ତା ମଝିରେ ଥିବା ଡିଭାଇଡରରେ ଷ୍ଟ୍ରିଟ୍ଲାଇଟ ଲାଗି ନ ଥିବା ହେତୁ ସହରଟି ଅନ୍ଧାର ମଧ୍ୟରେ ରହିବା ସହ ବାରମ୍ବାର ଦୁର୍ଘଟଣା ଘଟୁଛି। ଏହାକୁ ନେଇ ଜନସାଧାରଣଙ୍କ ଅସନ୍ତୋଷ ଓ ଅଭିଯୋଗକୁ ଗୁରୁତ୍ୱ ଦେଇ ଖଲ୍ଲିକୋଟ ବିଧାୟିକା ମୁଖ୍ୟ ଯନ୍ତ୍ରୀ ଓ ନିର୍ବାହୀ ଯନ୍ତ୍ରୀଙ୍କ ସହ ଆଲୋଚନା କରିଛନ୍ତି। ଏନେଇ ନିର୍ବାହୀ ଯନ୍ତ୍ରୀ ତପନ କୁମାର ପାଣିଗ୍ରାହୀ ଜାନୁୟାରୀ ସୁଦ୍ଧା ପ୍ରାୟ ୭୦ ଲକ୍ଷ ଟଙ୍କା ବ୍ୟୟରେ ୧୭୪ଟି ଷ୍ଟ୍ରିଟଲାଇଟ ଲଗାଇବା ଲାଗି ପ୍ରତିଶ୍ରୁତି ଦେଇଛନ୍ତି।
ସେହିପରି ପାଣ୍ଡିଆ ଛକଠାରୁ ସ୍ବପ୍ନେଶ୍ବର ମନ୍ଦିର ଛକ ପର୍ଯ୍ୟନ୍ତ ବାଇପାସ ରାସ୍ତା ନିର୍ମାଣ ପ୍ରସ୍ତାବ ଉପରେ ଆଲୋଚନା ହୋଇଛି। ଏହାର ସର୍ଭେ ଆରମ୍ଭ କରି ଜମି ଅଧିଗ୍ରହଣ ଲାଗି ପଦକ୍ଷେପ ନିଆଯିବ ବୋଲି ଯନ୍ତ୍ରୀ କହିଛନ୍ତି। ଦଲିବିଲଠାରେ ୨ ଏକର ୫୦୦ ଡିସିମିଲ ଜମିରେ ବସ୍ଷ୍ଟାଣ୍ଡ ନିର୍ମାଣ ଲାଗି ପରିବହନ ମନ୍ତ୍ରୀ ଓ ସଚିବ ପ୍ରତିଶ୍ରୁତି ଦେଇଥିବା ଜଣାପଡିଛି। ପୁରୁଷୋତ୍ତମପୁର ଏବଂ ଖଲ୍ଲିକୋଟ ବ୍ଲକ, ଏନ୍ଏସି ଅଞ୍ଚଳର ଜନସାଧାରଣ ଓ ଚାଷୀଙ୍କ ଜମିକୁ ବିଦ୍ୟୁତ୍ ଯୋଗାଣ ସହ ଜଳଯୋଗାଣ ଲାଗି ବ୍ୟବସ୍ଥା କରିବାକୁ ଶକ୍ତି ମନ୍ତ୍ରୀ ଏବଂ ଅଧିକାରୀଙ୍କ ସହ ବିଧାୟିକା ଆଲୋଚନା କରିଛନ୍ତି। ଖଲ୍ଲିକୋଟ ରେଳ ଲାଇନ ଓଭରବ୍ରିଜ ନିର୍ମାଣ ଲାଗି ଗ୍ରାମ୍ୟ ଉନ୍ନୟନ ବିଭାଗୀୟ ମୁଖ୍ୟ ଯନ୍ତ୍ରୀଙ୍କ ସହ କଥାହୋଇ ତୁରନ୍ତ ପଦକ୍ଷେପ ନେବା ଲାଗି ସେ ଦାବି କରିଛନ୍ତି।
