ଲଣ୍ଡନ: ବିଶ୍ୱର ୨୦କୋଟି ଲୋକ ଦିବାସ୍ବପ୍ନରେ ବୁଡ଼ିରହୁଛନ୍ତି। ଫଳରେ ସେମାନଙ୍କର ଦୈନିକ ୩୦% ସମୟ ନଷ୍ଟ ହେଉଛି। ବ୍ରିଟେନର ସସେକ୍ସ ୟୁନିଭର୍ସିଟି ବିଶେଷଜ୍ଞଙ୍କ ଦ୍ୱାରା କରାଯାଇଥିବା ରିସର୍ଚ୍ଚରୁ ଏହା ଜଣାପଡ଼ିଛି। ଏହି ପ୍ରବୃତ୍ତିର ବ୍ୟକ୍ତିମାନେ ଭାବନାରେ ବୁଡ଼ି ରହିବା ଦ୍ୱାରା ସେମାନେ ବାସ୍ତବିକତାଠାରୁ ନିଜକୁ ବହୁ ଦୂରରେ ରଖୁଛନ୍ତି। ଦିବାସ୍ବପ୍ନ ଦେଖିବା ଦ୍ୱାରା ସେମାନଙ୍କ ଚାରିପାଖରେ ଏକ କାଳ୍ପନିକ ଜଗତ ତିଆରି ହୋଇଥାଏ। ଏହାଫଳରେ ସେମାନଙ୍କୁ ଏକ ମିଛ ଖୁସି ମିଳିଥାଏ, ଯାହା ସେମାନଙ୍କ ପାଇଁ ବିପଜ୍ଜନକ ସାବ୍ୟସ୍ତ ହୋଇଥାଏ।
ରାଇଜରେ ବୁଡ଼ି ରହିଥିବା ବ୍ୟକ୍ତି କୌଣସି କାମ ଠିକ୍ ଭାବେ ସମ୍ପାଦନ କରିପାରନ୍ତି ନାହିଁ। କାରଣ କାମରେ ସେମାନଙ୍କ ମନ ଲାଗେ ନାହିଁ। ଲୋକଙ୍କଠାରେ ଦେଖିବାକୁ ମିଳୁଥିବା ଏହି ବ୍ୟତିକ୍ରମ ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଫଳରେ ସେମାନଙ୍କ ମାନସିକତାରେ ପରିବର୍ତ୍ତନ ହେଉଛି। ଛୋଟ ଛୋଟ କଥାରେ ବିବ୍ରତ ହୋଇପଡ଼ୁଥିବା ଲୋକଙ୍କ ଚିନ୍ତାଧାରା ଦୁର୍ବଳ ହେବାରେ ଲାଗିଥିବା ୟୁନିଭର୍ସିଟି ଆସୋସିଏଟ୍ ଅଧ୍ୟାପିକା ଜୁଲିଆ ପୋରିଓ କହିଛନ୍ତି। ବିଶ୍ୱରେ ୨.୫% ଲୋକ ଅତ୍ୟଧିକ ମାତ୍ରାରେ ଦିବାସ୍ବପ୍ନ ଦେଖୁଥିବାବେଳେ ସେମାନଙ୍କର ଏ ପ୍ରକାର ସ୍ଥିତିକୁ ମାଲାଡାପ୍ଟିଭ ଡେଡ୍ରିମିଙ୍ଗ୍ ବୋଲି କୁହାଯାଏ। ଘଣ୍ଟା ଘଣ୍ଟା ଧରି ନିଜ କଳ୍ପନା ଜଗତରେ ବୁଡ଼ି ରହିବା ଫଳରେ ତାଙ୍କ ଜରୁରୀ କାମ ସବୁ ଅଧା ରହିଯାଏ। ଏ ପ୍ରକାର ଚିନ୍ତାଧାରା ସକାଶେ ନିଜ ଦାୟିତ୍ୱ ସେମାନେ ଝୁଲିଯାନ୍ତି। ପରିବାର ଲୋକଙ୍କ ସହ ସେମାନଙ୍କ ସମ୍ପର୍କ ତୁଟିଯାଏ। ଏହି ବ୍ୟକ୍ତିମାନଙ୍କ ନିଦ ମଧ୍ୟ ସମ୍ପୂର୍ଣ୍ଣ ହୋଇ ନ ଥାଏ। ଦିବାସ୍ବପ୍ନ କାରଣରୁ ମଣିଷ ଶରୀରକୁ ଅନେକ ରୋଗ ଯେମିତି ଡିପ୍ରେଶନ୍, ଡର ଏବଂ ଅବ୍ସେସିଭ୍ କମ୍ପଲସିଭ ଡିଜ୍ଅର୍ଡର (ଓସିଡି) ଭଳି ରୋଗ ସହଜରେ ଗ୍ରାସ କରିନିଏ। ଏଥିରୁ ବର୍ତ୍ତିବା ଲାଗି ନିଜ ଉପରେ ନିୟନ୍ତ୍ରଣ ଆଣିବା ଜରୁରୀ। କାମର ପ୍ରାଧାନ୍ୟକୁ ବୁଝି ସେ ଗୁଡ଼ିକୁ ସମ୍ପାଦନ କରିବା ଲାଗି ପ୍ରଥମେ ମନକୁ ସ୍ଥିର କରିବା ଆବଶ୍ୟକ।
