ନୂଆଦିଲ୍ଲୀ,୮।୧୧ : ଶିକ୍ଷା ଲାଭଜନକ ବ୍ୟବସାୟ ନୁହେଁ ଏବଂ ଟ୍ୟୁସନ ଫି ସର୍ବଦା କମ ହେବା ଉଚିତ ବୋଲି ଆନ୍ଧ୍ରପ୍ରଦେଶ ହାଇକୋର୍ଟଙ୍କ ଆଦେଶକୁ କାଏମ ରଖି ସୁପ୍ରିମକୋର୍ଟ ଏହା କହିଛନ୍ତି। ରାଜ୍ୟ ସରକାର ମେଡିକାଲ କଲେଜଗୁଡ଼ିକରେ ବର୍ଷକୁ ୨୪ ଲକ୍ଷ ଟଙ୍କା ବୃଦ୍ଧି କରିଥିଲେ। ସୁପ୍ରିମକୋର୍ଟ ଏହି ନିଷ୍ପତ୍ତି ଉପରେ ରୋକ ଲଗାଇଛନ୍ତି। ଜଷ୍ଟିସ ଏମ ଆର ଶାହା ଏବଂ ସୁଦର୍ଶନ ଧୁଲିଆଙ୍କ ନେତୃତ୍ୱରେ ଗଠିତ ଏକ ବେଞ୍ଚ ଆବେଦନକାରୀ ନାରାୟଣ ମେଡିକାଲ କଲେଜ ଏବଂ ଆନ୍ଧ୍ରପ୍ରଦେଶ ସରକାରଙ୍କୁ ୫ ଲକ୍ଷ ଟଙ୍କା ଜରିମାନା ଦେବାକୁ ନିର୍ଦ୍ଦେଶ ଦେଇଛନ୍ତି। ୬ ସପ୍ତାହ ମଧ୍ୟରେ କୋର୍ଟର ରେଜିଷ୍ଟ୍ରିରେ ଜମା କରିବାକୁ ନିର୍ଦ୍ଦେଶ ଦେଇଛନ୍ତି।
ଆବେଦନକାରୀଙ୍କୁ ଖଣ୍ଡପୀଠ କହିଛନ୍ତି ଯେ ବାର୍ଷିକ ୨୪ ଲକ୍ଷ ଟଙ୍କାକୁ ବୃଦ୍ଧି କରିବା ଅର୍ଥାତ ପୂର୍ବରୁ ସ୍ଥିର କରାଯାଇଥିବା ଫି’ର ସାତଗୁଣ ବୃଦ୍ଧି ଆଦୌ ଉପଯୁକ୍ତ ନୁହେଁ। ଶିକ୍ଷା ଏକ ଲାଭ ହାସଲ ପାଇଁ ଏକ ବ୍ୟବସାୟ ନୁହେଁ।
ଆନ୍ଧ୍ରପ୍ରଦେଶ ହାଇକୋର୍ଟଙ୍କ ନିର୍ଦ୍ଦେଶ ବିରୋଧରେ କଲେଜ ଦ୍ୱାରା ଦାଖଲ ହୋଇଥିବା ଏକ ଆବେଦନକୁ ଖାରଜ କରି ସର୍ବୋଚ୍ଚ ଅଦାଲତ ଏହି ମନ୍ତବ୍ୟ ଦେଇଛନ୍ତି। ହାଇକୋର୍ଟ କହିଥିଲେ ଯେ ଆନ୍ଧ୍ରପ୍ରଦେଶ ଆଡମିଶନ ଏବଂ ଫି’ ନିୟାମକ କମିଟି ନିୟମ, ୨୦୦୬ ର ବ୍ୟବସ୍ଥାକୁ ବିଚାର କରି କମିଟିର ସୁପାରିଶ / ରିପୋର୍ଟ ବିନା ଫି ବୃଦ୍ଧି / ସ୍ଥିର କରାଯାଇପାରିବ ନାହିଁ। ସର୍ବୋଚ୍ଚ ଅଦାଲତ କହିଛନ୍ତି ଯେ ଟ୍ୟୁସନ ଫି ର୍ନିଣ୍ଣୟ କିମ୍ବା ସମୀକ୍ଷା କରିବାବେଳେ ବୃତ୍ତିଗତ ଅନୁଷ୍ଠାନର ଅବସ୍ଥାନ, ବୃତ୍ତିଗତ ପାଠ୍ୟକ୍ରମର ପ୍ରକୃତି, ଉପଲବ୍ଧ ଭିତ୍ତିଭୂମି ମୂଲ୍ୟ ଭଳି ଅନେକ କାରଣ ଉପରେ ବିଚାର କରିବା ଆବଶ୍ୟକ।
ଏଥିରେ ଦର୍ଶାଯାଇଛି ଯେ ବେଆଇନ ସରକାରୀ ନିର୍ଦ୍ଦେଶ ଅନୁଯାୟୀ ସଂଗ୍ରହ କରାଯାଇଥିବା ଅର୍ଥକୁ କଲେଜ ପରିଚାଳନାକୁ ରଖିବାକୁ ଅନୁମତି ଦିଆଯାଇପାରିବ ନାହିଁ।
