ବେଜିଂ,୭ା୧୧: ପ୍ରତିବର୍ଷ ବହୁ ସଂଖ୍ୟକ ଭାରତୀୟ ଛାତ୍ରୀଛାତ୍ର ଡାକ୍ତରୀ ଅଧ୍ୟୟନ ପାଇଁ ଚାଇନା ଯାଇଥାନ୍ତି। ତେବେ କରୋନା ଅବଧି ସମୟରେ ହଜାର ହଜାର ଭାରତୀୟ ଛାତ୍ରୀଛାତ୍ରଙ୍କୁ ଘରକୁ ଫେରିବାକୁ ପଡ଼ିଥିଲା। ଏହି କାରଣରୁ ଅନେକ ପିଲା ସେମାନଙ୍କ ପାଠପଢ଼ା ଶେଷ ବି କରିପାରିନାହାନ୍ତି।
ସେପଟେ ବେଜିଂରେ ଥିବା ଭାରତୀୟ ଦୂତାବାସ ଏକ ବିବୃତ୍ତି ଜାରି କରିଛି। ରାଷ୍ଟ୍ରୀୟ ମେଡିକାଲ କମିଶନ (ଏନ୍ଏମ୍ସି) ଦ୍ୱାରା ଚାଇନାରେ ଚାଲିଥିବା ଯୋଗ୍ୟତା ପରୀକ୍ଷା ସମ୍ପର୍କରେ ଦୂତାବାସ ଛାତ୍ର ଏବଂ ସେମାନଙ୍କ ପରିବାର ପକ୍ଷରୁ ବାରମ୍ବାର ପ୍ରଶ୍ନ ଗ୍ରହଣ କରୁଛି ବୋଲି ବିବୃତ୍ତିରେ କୁହାଯାଇଛି। ଦୂତାବାସ ଏହି ବିବୃତ୍ତିରେ ଏହି ପ୍ରଶ୍ନର ଉତ୍ତର ଦେଇଛି। ଭାରତର ଦୂତାବାସ ଆହୁରି ମଧ୍ୟ କହିଛି, ୧୮ ନଭେମ୍ବର ୨୦୨୧ରେ ଜାରି ହୋଇଥିବା ଏନ୍ଏମ୍ସିର ବିଜ୍ଞପ୍ତି ଦେଖିବାକୁ ଛାତ୍ର ଏବଂ ସେମାନଙ୍କ ପରିବାରବର୍ଗଙ୍କୁ ଅନୁରୋଧ କରାଯାଇଛି।
ଦୂତାବାସ କହିଛି, ଛାତ୍ର ଏବଂ ସେମାନଙ୍କ ପରିବାର ବିଜ୍ଞପ୍ତି ଦେଖିବା ଉଚିତ୍। ଯାହାକି ଏନ୍ଏମ୍ସିର ଧାରା (୪)ରେ ସ୍ପଷ୍ଟ ଭାବରେ ଉଲ୍ଲେଖ ରହିଛି। ବିଦେଶୀ ମେଡିକାଲ ଛାତ୍ରୀଛାତ୍ର ସମ୍ପୃକ୍ତ ବୃତ୍ତିଗତ ନିୟାମକ ସଂସ୍ଥାରେ ପଞ୍ଜୀକୃତ ହେବା ଉଚିତ୍। ଏହି ବିବୃତ୍ତିରେ କୁହାଯାଇଛି, ଯେଉଁ ଦେଶରେ ଛାତ୍ରୀଛାତ୍ରଙ୍କ ଡାକ୍ତରୀ ଡିଗ୍ରୀ ଦିଆଯାଇଛି। ସେଠାରେ ସେମାନେ ଚିକିତ୍ସା ଅଭ୍ୟାସ ପାଇଁ ଏକ ଲାଇସେନ୍ସ ପାଇପାରିବେ।
ଭାରତରେ ଏନ୍ଏମ୍ସି ଦ୍ୱାରା ପରିଚାଳିତ ଯୋଗ୍ୟତା ପରୀକ୍ଷାରେ ଚାଇନାରେ କ୍ଲିନିକାଲ ମେଡିସିନ ପ୍ରୋଗ୍ରାମ ପାଇଁ କରୁଥିବା ଭାରତୀୟ ଛାତ୍ରମାନଙ୍କ ପାଇଁ ଯୋଗ୍ୟତା ବିଷୟରେ ଦୂତାବାସ ପ୍ରଶ୍ନ ଗ୍ରହଣ ଜାରି ରଖିଛି। ଏନ୍ଏମ୍ସି ଦ୍ୱାରା ୧୮ ନଭେମ୍ବର ୨୦୨୧ରେ ଗେଜେଟ ବିଜ୍ଞପ୍ତି ଦେଖିବାକୁ ଛାତ୍ରଙ୍କୁ ଅନୁରୋଧ କରାଯାଇଛି। ବେଜିଂରେ ଭାରତର ଦୂତାବାସ pic.twitter.com/wGqbRkJxXk
ଦୂତାବାସ କହିଛି,ନଭେମ୍ବର ୨୦୨୧ ପରେ ଚାଇନାର କ୍ଲିନିକାଲ ମେଡିସିନ କାର୍ଯ୍ୟକ୍ରମରେ ଯୋଗ ଦେଇଥିବା ତଥା ଚାଇନାରେ ଡାକ୍ତର ଭାବରେ ଅଭ୍ୟାସ କରିବାକୁ ଲାଇସେନ୍ସ ପାଇ ନ ଥିବା କୌଣସି ଛାତ୍ର ବୈଦେଶିକ ମେଡିକାଲ ଗ୍ରାଜୁଏଟ ପରୀକ୍ଷାରେ ଯୋଗଦେବାକୁ ଅଯୋଗ୍ୟ ହେବେ।
