ନୂଆଦିଲ୍ଲୀ,୭।୧୧ : ଭାରତର ପ୍ରଧାନ ବିଚାରପତି ଜଷ୍ଟିସ ୟୁୟୁ ଲଲିତ ନଭେମ୍ବର ୮ରେ ଅବସର ନେଉଛନ୍ତି। ପ୍ରକାଶ ଥାଉକି, ନଭେମ୍ବର ୮ ଗୁରୁ ନାନକ ଜୟନ୍ତୀ ହୋଇ୍ଥିବରୁ କୋର୍ଟ ଛୁଟି ରହିବ। ତେଣୁ ସୋମବାର ସୁପ୍ରିମକୋର୍ଟରେ ଜଷ୍ଟିସ ଲଲିତଙ୍କ ଶେଷ କାର୍ଯ୍ୟ ଦିବସ। ତାଙ୍କର ଶେଷ କାର୍ଯ୍ୟ ଦିବସରେ, ସୁପ୍ରିମକୋର୍ଟଙ୍କ ତରଫରୁ ତାଙ୍କ ଦ୍ୱାରା ପରିଚାଳିତ ଆନୁଷ୍ଠାନିକ ସମାରୋହ ବେଞ୍ଚର ପ୍ରକ୍ରିୟା ସିଧା ପ୍ରସାରଣ ହେବ।
ସୂଚନା ଅନୁଯାୟୀ, ସମାରୋହ ବେଞ୍ଚର ପ୍ରକ୍ରିୟା ଅପରାହ୍ନ ୨ ଟାରୁ ଆରମ୍ଭ ହେବ। ଏଥିରେ ଜଷ୍ଟିସ ଡିଓ୍ବାଇ ଚନ୍ଦ୍ରଚୂଡ଼ ଏବଂ ଜଷ୍ଟିସ ବେଲା ଏମ ତ୍ରିବେଦୀ ରହିବେ। ଭାରତର ପ୍ରଧାନ ବିଚାରପତି ତାଙ୍କ ଉତ୍ତରାଧିକାରୀଙ୍କ ସହ ଏହି ଅବସରରେ ଉପସ୍ଥିତ ରହିବାର ପରମ୍ପରା ଅଛି। ଏହି ଉତ୍ସବରେ ବାରର ଅନ୍ୟ ସଦସ୍ୟ ଏବଂ ଅଧିକାରୀମାନେ ତାଙ୍କୁ ବିଦାୟ ଦେବେ।
ତାଙ୍କର ଶେଷ କାର୍ଯ୍ୟ ଦିବସରେ ଜଷ୍ଟିସ ୟୁୟୁ ଲଲିତ ୬ଟି ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଏହି ରାୟ ପ୍ରକାଶ କରିବେ। ଏଥିରେ ସବୁଠାରୁ ବଡ ମାମଲା ହେଉଛି ସାଧାରଣ ବର୍ଗର ଅର୍ଥନୈତିକ ଗରିବ (ଇଡବ୍ଲୁଏସ)ଙ୍କ ପାଇଁ ୧୦ ପ୍ରତିଶତ ସଂରକ୍ଷଣ। ଏହି ସଂରକ୍ଷଣର ସାମ୍ବିଧାନିକ ବୈଧତାକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରାଯାଇଥିଲା। ଅନ୍ୟପକ୍ଷରେ, ଦ୍ୱିତୀୟ ମାମଲା ଅମ୍ରାପାଲି ଗୃହ ଯୋଜନା ସହିତ ଜଡିତ। ଏଥିରେ ସୁପ୍ରିମକୋର୍ଟ ବଣ୍ଟନକାରୀଙ୍କୁ ଫ୍ଲାଟ ପାଇବା କିମ୍ବା ଏହାର ପ୍ରତିବଦଳରେ ଟଙ୍କା ପାଇବା ନେଇ ଏକ ବଡ ନିଷ୍ପତ୍ତି ଦେବାକୁ ଯାଉଛନ୍ତି। ଅନ୍ୟ ଚାରିଟି ମାମଲା ସାଧାରଣ ଶ୍ରେଣୀର ରହିଛି।
ଜଷ୍ଟିସ ୟୁୟୁ ଲଲିତ ୨୭ ଅଗଷ୍ଟରେ ଦେଶର ୪୯ ତମ ପ୍ରଧାନ ବିଚାରପତି ଭାବରେ ଶପଥ ଗ୍ରହଣ କରିଥିଲେ। ତାଙ୍କର କାର୍ଯ୍ୟକାଳ ୭୪ ଦିନର ଥିଲା। ଜଷ୍ଟିସ ୟୁୟୁ ଲଲିତଙ୍କ ପରିବାର ପିଢ଼ି ପରେ ପିଢ଼ିି ଧରି ନ୍ୟାୟିକ ପ୍ରକ୍ରିୟା ସହିତ ଜଡିତ ରହିଆସିଛନ୍ତି। ଜଷ୍ଟିସ ଲଲିତଙ୍କ ଦାଦା ରଙ୍ଗନାଥ ଲଲିତ ସ୍ବାଧୀନତା ପୂର୍ବରୁ ସୋଲାପୁରରେ ଜଣେ ଓକିଲ ଥିଲେ। ଜଷ୍ଟିସ ୟୁୟୁ ଲଲିତଙ୍କ ୯୦ ବର୍ଷିୟ ପିତା ଉମେଶ ରଙ୍ଗନାଥ ଲଲିତ ମଧ୍ୟ ଜଣେ ପେସାଦାର ଓକିଲ ଭାବରେ କାର୍ଯ୍ୟ କରିଛନ୍ତି। ପରେ ସେ ହାଇକୋର୍ଟର ବିଚାରପତି ଭାବେ କାର୍ଯ୍ୟ କରିଥିଲେ। ଏହା ବ୍ୟତୀତ ଜଷ୍ଟିସ ଲଲିତଙ୍କର ଦୁଇ ପୁଅ ହର୍ଷଦ ଏବଂ ଶ୍ରେୟଶ ଅଛନ୍ତି, ଯେଉଁମାନେ ଇଞ୍ଜିନିୟରିଂ ଅଧ୍ୟୟନ କରିଥିଲେ। ତେବେ ପରେ ଶ୍ରେୟଶ ଲଲିତ ମଧ୍ୟ ଆଇନ ଆଡକୁ ମୁହାଁଇଥିଲେ। ତାଙ୍କ ପତ୍ନୀ ରବିନା ମଧ୍ୟ ଜଣେ ଓକିଲ।
