ବୈପାରିଗୁଡା,୧୭ା୯ (ଡି.ଏନ୍.ଏ.): ବାପା ମା’ ସ୍ନେହରୁ ବଞ୍ଚତ୍ତ ପାର୍ବତୀ ପୂଜାରୀଙ୍କ ମୁହଁରେ ହସ ଫୁଟିଛି। ଆର୍ଥିକ ଅନଟନ ଓ ପାରିବାରିକ ଅସୁବିଧା ଯୋଗୁ ତାଙ୍କ ପାଠପଢା ଅଧାରୁ ଅଟକିଯିବା ନେଇ ସୃଷ୍ଟି ହୋଇଥିବା ସଂସୟ ଦୂର ହୋଇଛି। ବ୍ଲକର ବାଲିଗଁାସ୍ଥିତ ମଙ୍ଗଳ ବିଭାଗ ଦ୍ବାରା ପରିଚାଳିତ କନ୍ୟାଶ୍ରମରେ ରହି ପାର୍ବତୀ ଷଷ୍ଠ ଶ୍ରେଣୀରେ ପଢିବା ବ୍ୟବସ୍ଥା ହୋଇଛି। ଶନିବାରଠାରୁ ସେ ବିଦ୍ୟାଳୟକୁ ଆସିବେ ବୋଲି ବ୍ଲକ ମଙ୍ଗଳ ଅଧିକାରୀ ସୁଜ୍ଞାନ ରଞ୍ଜନ ଜାଲା କହିଛନ୍ତି।
୧୦ ବର୍ଷର ଝିଅ ପାର୍ବତୀଙ୍କ ଘର ବୈପାରିଗୁଡା ବ୍ଲକର ବାଣୁଆଗୁଡା ଗ୍ରାମରେ ା ଅତି ଛୋଟ ବୟସରୁ ସେ କଷ୍ଟରେ ବଢି ଆସିଛନ୍ତି। ସେ ବର୍ଷକର ହୋଇଥିବା ବେଳେ ତାଙ୍କୁ ଛାଡି ଅନ୍ୟତ୍ର ଚାଲିଯାଇ ମାଆ ବିବାହ କରି ଘରସଂସାର କରିଥିଲେ। ୨ ବର୍ଷ ପରେ ବାପା ତ୍ରିନାଥଙ୍କ ପରଲୋକ ହୋଇଥିଲା। ଏପରି ସ୍ଥଳେ ଖୁବ୍ ଅସହାୟ ହୋଇପଡିଥିବା ପାର୍ବତୀ ଜେଜେବାପା ଡମ୍ବରୁ ଓ ଜେଜେ ମା ମଣିମାଙ୍କ ନିକଟରେ ଲାଳିତପାଳିତ ହୋଇ ବଢିଥିଲେ। ଜେଜେ ମା’ ଏବେ ପକ୍ଷାଘାତ ରୋଗରେ ପିଡିତ ା ପୂର୍ବପରି ସେ ମୂଲମଜୁରି ଲାଗିପାରୁନାହାନ୍ତି। ଉଭୟେ ବୃଦ୍ଧାବୃଦ୍ଧ ଯାହା ମାସିକ ଭତ୍ତା ପାଆନ୍ତି ସେଥିରେ ପରିବାର ଚଳେ। ଅର୍ଥାଭାବରୁ ଚଳିତ ବର୍ଷ ପାର୍ବତୀ ମାଠପଡା ବିଦ୍ୟାଳୟରେ ପଞ୍ଚମ ଶ୍ରେଣୀରୁ ଉନ୍ନୀତ ହୋଇଥିଲେ ମଧ୍ୟ ଆଗକୁ ପଢିପାରୁ ନ ଥିଲେ। ନାତୁଣିଙ୍କୁ ତ୍ରିନାଥ ବାଲିଗଁାସ୍ଥିତ କଲ୍ୟାଣ ବିଭାଗ ଦ୍ୱାରା ପରିଚାଳିତ ବାଳିକା ଆବାସିକ ବିଦ୍ୟାଳୟରେ ନାମ ଲେଖାଇବାକୁ ପ୍ରଧାନଶିକ୍ଷକଙ୍କୁ ଅନୁରୋଧ କରିଥିଲେ, ମାତ୍ର ସମୟ ଅତିବାହିତ ହୋଇଯାଇଥିବାରୁ ଆଡିମିଶନ ନେଇ ବିଦ୍ୟାଳୟ କର୍ତ୍ତୃପକ୍ଷ ଗୁରୁତ୍ୱ ଦେଇ ନ ଥିଲେ। ଏ ସଂକ୍ରାନ୍ତରେ ‘ଅର୍ଥ ସାଜିଛି ପ୍ରତିବନ୍ଧକ,ପାର୍ବତୀଙ୍କ ପାଠ ପଢା ଅଧାରୁ ବନ୍ଦ’ ଶୀର୍ଷକ ଖବର ଗୁରୁବାର ଧରିତ୍ରୀରେ ପ୍ରକାଶ ପାଇବା ପରେ ଜିଲା ପରିଷଦ ସଭ୍ୟ ରାଜେଶ ମହୁରିଆ ଏବଂ ମାଠପଡା ସରପଞ୍ଚ ଗଙ୍ଗା ମସିଆ ମଙ୍ଗଳ ସଂପ୍ରସାରଣ ଅଧିକାରୀଙ୍କୁ ଯୋଗାଯୋଗ କରି ପାର୍ବତୀଙ୍କ ନାମ ଲେଖାଇବା ବ୍ୟବସ୍ଥା କରିଛନ୍ତି। ପାର୍ବତୀଙ୍କୁ ପାଠ୍ୟ ଉପକରଣ କିଣି ଦେଇଛନ୍ତି।
