ନୂଆଦିଲ୍ଲୀ, ୨୭।୮ : ଭେଟେରାନ ନେତା ଗୁଲାମ ନବୀ ଆଜାଦ ଶୁକ୍ରବାର କଂଗ୍ରେସର ସମସ୍ତ ପଦରୁ ଇସ୍ତଫା ଦେଇ ଦଳକୁ ଏକ ବଡ ଝଟକା ଦେଇଛନ୍ତି। ଏହାକୁ ନେଇ କଂଗ୍ରେସ ଛାଡି ଭାଜପାରେ ଯୋଗ ଦେଇଥିବା କେନ୍ଦ୍ର ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ଶନିବାର ଦେଶର ସର୍ବ ପୁରାତନ ପାର୍ଟି କଂଗ୍ରେସକୁ କଡ଼ା ସମାଲୋଚନା କରିଛନ୍ତି। ସେ କହିଛନ୍ତି ଏହି ରାଜନୈତିକ ଅସ୍ଥିରତା ପୂର୍ବରୁ ହେବାର ଥିଲା।
ପୂର୍ବତନ କେନ୍ଦ୍ର ମନ୍ତ୍ରୀ ଗୁଲାମ ନବୀ ଆଜାଦ କଂଗ୍ରେସ ଦଳ ସହିତ ତାଙ୍କର ପାଞ୍ଚ ଦଶନ୍ଧି ପୁରୁଣା ସମ୍ପର୍କ ସମାପ୍ତ କରିବାର ଗୋଟିଏ ଦିନ ପରେ କେନ୍ଦ୍ର ମନ୍ତ୍ରୀ ତଥା ଭାରତୀୟ ଜନତା ପାର୍ଟି ନେତା ଜ୍ୟୋତିରାଦିତ୍ୟ କହିଛନ୍ତି ଯାହା ହେଉ ଶେଷରେ ଗୁଲାମ ନବୀ ମଧ୍ୟ ନିଜକୁ ଆଜାଦ କରିଛନ୍ତି।
୨୦୨୦ ରେ କଂଗ୍ରେସକୁ ବିଦାୟ ଦେବା ପରେ ଭାଜପାରେ ଯୋଗ ଦେଇଥିବା ସିନ୍ଧିଆ ଶନିବାର ଗ୍ବାଲିୟରରେ ଗଣମାଧ୍ୟମ ପ୍ରତିନିଧିମାନଙ୍କୁ କହିଛନ୍ତି, କଂଗ୍ରେସର ଆଭ୍ୟନ୍ତରୀଣ ସ୍ଥିତି କ’ଣ ତାହା ପୂର୍ବରୁ ଜଣାପଡୁଥିଲା ଏବଂ ଏବେ ମଧ୍ୟ ଏହି ଧାରା ଜାରି ରହିଛି। ମୁଁ ଭାରତୀୟ ଜନତା ପାର୍ଟିର ଜଣେ କର୍ମୀ ଏବଂ ମୁଁ ସକରାତ୍ମକ ଚିନ୍ତାଧାରା ଓ ଆଦର୍ଶ ସହିତ ବିକାଶ ତଥା ପ୍ରଗତି ସହିତ ଜଡିତ ଅଛି। କିନ୍ତୁ ନିଶ୍ଚିତ ଭାବରେ ଗୁଲାମ ନବୀ କଂଗ୍ରେସରୁ ନିଜକୁ ମୁକ୍ତ କରି ପାରିଛନ୍ତି। ଏହା ବେଶ୍ ଖୁସିର ବିଷୟ।
