ଭୁବନେଶ୍ୱର, ୨୦-୭(ବ୍ୟୁରୋ): ଏଣ୍ଟରପ୍ରେନ୍ୟୁରଶିପକୁ ପ୍ରୋତ୍ସାହନ ଲାଗି ରାଜ୍ୟରେ ନୂଆ ସେଣ୍ଟର ଅଫ୍ ଏକ୍ସିଲେନ୍ସ ସ୍ଥାପନ କରାଯିବ। ଏହି ଧାରାକୁ ଆଗେଇ ନେବା ଲାଗି ରାଷ୍ଟ୍ରାୟତ୍ତ ଆଲୁମିନିୟମ କମ୍ପାନୀ ଲିମିଟେଡ୍(ନାଲ୍କୋ), ଏନ୍ଆଇଟି ରାଉରକେଲା ଏବଂ ଏନ୍ଆଇଟି ରାଉରକେଲା ଆଲୁମୁନାଇ ଆସୋସିଏଶନ(ଏନ୍ଆଇଟିଆର୍ଏଏ) ଚୁକ୍ତିରେ ସାମିଲ ହୋଇଛନ୍ତି। ଏହି ପଦକ୍ଷେପ ଅନ୍ତର୍ଗତ ଏକ ଇନ୍କୁବେଶନ ସେଣ୍ଟର ସ୍ଥାନୀୟ ଗୋଠପାଟଣାସ୍ଥିତ ନାଲ୍କୋ ରିସର୍ଚ୍ଚ ଏବଂ ଟ୍ରେନିଂ ସେଣ୍ଟରରେ ସ୍ଥାପନ କରାଯିବ। ଆଲୁମିନିୟମ କ୍ଷେତ୍ରର ବିକାଶ ଲାଗି ଏଠାରେ ନାଲ୍କୋ ଏକ ବିଶ୍ୱ ସ୍ତରୀୟ ଗବେଷଣା ଫାସିଲିଟି ଉନ୍ନତୀକରଣ କରୁଛି।
ଷ୍ଟାର୍ଟଅପ୍ଗୁଡିକର ଉତ୍ପାଦକତା ଏବଂ ସେବା ଯୋଗାଣରେ ପ୍ରତିଦ୍ୱନ୍ଦ୍ୱିତା ବୃଦ୍ଧି ଲକ୍ଷ୍ୟରେ ଏଭଳି ପଦକ୍ଷେପ ସହାୟକ ହେବ। ବୁଝାମଣାପତ୍ର ଦ୍ୱାରା ଆଇଆଇଟି, ଆଇସିଟି ଏବଂ ଡିଏସ୍ଟି ସହଯୋଗରେ ଉଦ୍ୟୋଗ ବିକାଶ ଲାଗି ଅନୁକୂଳ ବାତାବରଣ , ଗବେଷଣା ଅନୁଷ୍ଠାନ ଏବଂ ବିଶ୍ୱବିଦ୍ୟାଳୟ ସହ ସହଭାଗିତା ସୃଷ୍ଟି କରିବ। ଏହାଦ୍ୱାରା ସୃଜନଶୀଳତା, ନବୀନତା ସହ ବିଭିନ୍ନ ଉଦ୍ୟୋଗ ଏବଂ ଶିକ୍ଷାନୁଷ୍ଠାନଗୁଡିକରେ ବୈଷୟିକ ଆବଶ୍ୟକତା କ୍ଷେତ୍ରରେ ପ୍ରତିଦ୍ୱନ୍ଦ୍ୱିତା ବୃଦ୍ଧି ଘଟିବ। ଉକ୍ତ ପଦକ୍ଷେପକୁ କେନ୍ଦ୍ର ଖଣି ମନ୍ତ୍ରଣାଳୟର ଅତିରିକ୍ତ ସଚିବ କେ.ରାଜେଶ୍ୱର ରାଓ ପ୍ରଶଂସା କରିଛନ୍ତି। ନୂତନ ଚିନ୍ତାଧାରା ଏବଂ ଉଦ୍ଭାବନକୁ ପ୍ରୋତ୍ସାହନ ଲାଗି ୩ ଅଂଶୀଦାରଙ୍କୁ ରାଓ ଆହ୍ବାନ ଜଣାଇଛନ୍ତି। ଏହି ଅବସରରେ ନାଲ୍କୋ ପକ୍ଷରୁ ୫୦ କର୍ମଚାରୀଙ୍କୁ ଉତ୍କର୍ଷତା ପୁରସ୍କାର ପ୍ରଦାନ କରାଯାଇଥିଲା। କଠିନ ଅଧ୍ୟବସାୟ ଏବଂ ନିଷ୍ଠା ଯୋଗୁ ନାଲ୍କୋ ଉତ୍ପାଦକତା ଏବଂ ଆର୍ଥତ୍କ ଲାଭ କ୍ଷେତ୍ରରେ ସଫଳତା ହାସଲ କରିଥିବା କମ୍ପାନୀର ଅଧ୍ୟକ୍ଷ ତପନ କୁମାର ଚାନ୍ଦ କହିଛନ୍ତି।
