ଯାଜପୁର ଅଫିସ,୧୪ ।୮: ବାଣିଜ୍ୟ ଓ ପରିବହନ ବିଭାଗ ପକ୍ଷରୁ ରାଜ୍ୟରେ ୬ଟି ଲେଖାଏ ବିମାନବନ୍ଦର ଏବଂ ରେଳ ପ୍ରକଳ୍ପର ନୂତନ କାର୍ଯ୍ୟ କିମ୍ବା ବିକାଶ ପାଇଁ ପ୍ରସ୍ତାବ ଗୃହୀତ ହୋଇଛି। ଏହାବାଦ୍ ସଡ଼କ ପରିବହନ କ୍ଷେତ୍ରରେ ୬ଟି ପ୍ରକଳ୍ପ ହାତକୁ ନିଆଯାଇଛି। ଏହିସବୁ ପ୍ରକଳ୍ପ ଡ୍ରାଫ୍ଟ ମିଡିୟମ ଟର୍ମ ଷ୍ଟେଟ ଇନ୍ଫ୍ରାଷ୍ଟ୍ରକ୍ଚର ଏକ୍ସପେଣ୍ଡିଚର ଫ୍ରେମୱାର୍କ (ଏମ୍ଆଇଏଫ୍) ମାଧ୍ୟମରେ ୨୦୨୨-୨୩ରୁ ୨୦୨୬-୨୭ ମଧ୍ୟରେ କାର୍ଯ୍ୟକାରୀ ହେବ। ଏଥିପାଇଁ ୬୩୬୭.୩୪ କୋଟି ଟଙ୍କା ବ୍ୟୟ ଅଟକଳ କରାଯାଇଛି। ଏହି ମର୍ମରେ ବାଣିଜ୍ୟ ଓ ପରିବହନ ବିଭାଗର ସ୍ବତନ୍ତ୍ର ସଚିବ ପ୍ରଭାତ କୁମାର ଜେନା ୮ା୮ା୨୦୨୨ରେ ପ୍ଲାନିଂ ଏବଂ କନଭର୍ଜେନ୍ସ ବିଭାଗର ସ୍ବତନ୍ତ୍ର ସଚିବଙ୍କ ନିକଟରେ ଏକ କାର୍ଯ୍ୟାନ୍ବୟନ ଯୋଜନା ଦାଖଲ କରିଛନ୍ତି। ଏହାପରେ ଦୀର୍ଘବର୍ଷ ଧରି ଦାବି କରିଆସୁଥିବା ଅଞ୍ଚଳବାସୀଙ୍କ ସ୍ବପ୍ନ ସାକାର ହେବା ଆଶା ଉଜ୍ଜ୍ୱଳ ହୋଇଛି।
ରାଜ୍ୟରେ ବର୍ତ୍ତମାନ ୨ଟି ବିମାନବନ୍ଦର ରହିଛି। ଭୁବନେଶ୍ୱରସ୍ଥିତ ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦର ଏବଂ ଝାରସୁଗୁଡ଼ାସ୍ଥିତ ବୀର ସୁରେନ୍ଦ୍ର ସାଏ ବିମାନବନ୍ଦରରୁ ବିମାନ ଚଳାଚଳ ହେଉଥିବାବେଳେ ଆଉ ୬ଟି ବିମାନବନ୍ଦର କାର୍ଯ୍ୟକାରୀ କରିବାକୁ ସରକାର ଯୋଜନା କରିଛନ୍ତି। ଏହିକ୍ରମରେ କୋରାପୁଟ ଜିଲାର ଜୟପୁର ବିମାନବନ୍ଦରର ବିକାଶ ପାଇଁ ଆର୍ସିଏସ୍-ଉଡାନ ଯୋଜନାରେ ୨୩୨ କୋଟି ଟଙ୍କାର ପ୍ରସ୍ତାବ ରହିଥିଲା। ଏଥିପାଇଁ ୨୦୪ ଏକର ବେସରକାରୀ ଜମି ଅଧିଗ୍ରହଣ କରିବାକୁ ଅତିରିକ୍ତ ଭାବେ ୧୧୨ କୋଟି ଟଙ୍କା ପ୍ରସ୍ତାବ ଦିଆଯାଇଥିଲା। ଏହାପରେ ୧୮୦୦ ମିଟର ରନ୍ୱେ ସମ୍ପ୍ରସାରଣ କରିବାକୁ ୧୨୦ କୋଟି ଟଙ୍କାର ପ୍ରସ୍ତାବ ଦିଆଯାଇଛି। ଗଞ୍ଜାମ ଜିଲାର ବ୍ରହ୍ମପୁର ନିକଟରେ ନୂତନ ଗ୍ରୀନ ଫିଲ୍ଡ ବିମାନବନ୍ଦର ନିର୍ମାଣ କରିବାକୁ ୨୦୦ କୋଟି ଟଙ୍କାର ପ୍ରସ୍ତାବ ରହିଛି। ଏଥିରୁ ୧୦୦ କୋଟି ଟଙ୍କା ଜମି ଅଧିଗ୍ରହଣ, ୫୦ କୋଟି ଟଙ୍କା ରନୱେ ଓ ଗୃହ ଆଦି ନିର୍ମାଣ ଓ ୫୦ କୋଟି ଟଙ୍କାରେ ପାଚେରି ଓ ଟର୍ମିନାଲ ଗୃହ, ଏଟିସି ଟାୱାର ଆଦି ନିର୍ମାଣ ହେବ। ସେହିପରି କଳାହାଣ୍ଡି ଜିଲାର ଉତକେଳା ବିମାନବନ୍ଦରର ରନୱେ ସମ୍ପ୍ରସାରଣ ଓ ଅନ୍ୟାନ୍ୟ ବିକାଶ କାର୍ଯ୍ୟ ପାଇଁ ୫୫ କୋଟି ଟଙ୍କା ପ୍ରସ୍ତାବ ରହିଛି। ଢେଙ୍କାନାଳ ଜିଲାର ବୀରାଶାଳ ବିମାନବନ୍ଦରର ଉନ୍ନତୀକରଣ ସହ ଅନ୍ତର୍ଜାତୀୟସ୍ତରର ପାଇଲଟ ତାଲିମ କେନ୍ଦ୍ର ନିର୍ମାଣ ଲକ୍ଷ୍ୟ ରଖି ୩୮୦ କୋଟି ଟଙ୍କାର ପ୍ରସ୍ତାବ ରହିଛି। ମାଲକାନଗିରିଠାରେ ଏକ ନୂତନ ବିମାନବନ୍ଦର ନିର୍ମାଣ କରିବାକୁ ୫୦ କୋଟି ଟଙ୍କାର ପ୍ରସ୍ତାବ ରହିଛି। ଏହାସହ ପୁରୀଠାରେ ଏକ ନୂତନ ଗ୍ରୀନ୍ ଫିଲ୍ଡ ବିମାନବନ୍ଦର ନିର୍ମାଣ କରିବାକୁ ୩୦୦ କୋଟି ଟଙ୍କାର ପ୍ରସ୍ତାବ ଯାଇଛି। ଏଥିରେ ୧୫୦ କୋଟି ଟଙ୍କା ବେସରକାରୀ ଜମି ଅଧିଗ୍ରହଣ, ୭୫ କୋଟି ଟଙ୍କା ରନ୍ୱେ ଓ ପାଚେରି ନିର୍ମାଣ ଏବଂ ୭୫ କୋଟି ଟଙ୍କାରେ ଟର୍ମିନାଲ ବିଲ୍ଡିଂ ଓ ଏଟିସି ଟାୱାର ନିର୍ମାଣ ହେବ।
ରେଳପଥ କ୍ଷେତ୍ରରେ ଦୀର୍ଘବର୍ଷର ଅପେକ୍ଷା ପରେ ୧୪୨ କି.ମି. ଦୈର୍ଘ୍ୟବିଶିଷ୍ଟ ବରଗଡ଼-ନୂଆପଡ଼ା ଭାୟା ପଦ୍ମପୁର ନୂତନ ରେଳଲାଇନ ପ୍ରକଳ୍ପ ନିର୍ମାଣ କରିବାକୁ ପ୍ରସ୍ତାବ ରହିଛି। ଏଥିପାଇଁ ୭୦୦ କୋଟି ଟଙ୍କା ବ୍ୟୟ ଅଟକଳ ହୋଇଛି। ଏହି ପ୍ରକଳ୍ପ କାର୍ଯ୍ୟକାରୀ ହେଲେ ସମ୍ବଲପୁରଠାରୁ ରାୟପୁରର ଦୂରତା ପ୍ରାୟ ୮୦ କି.ମି. ହ୍ରାସ ପାଇବ। ସେହିପରି ବ୍ରହ୍ମପୁର-ସମ୍ବଲପୁର, ପୁରୀ-କୋଣାର୍କ ଓ ଗୁଣୁପୁର-ଥେରୁବାଲି ନୂତନ ରେଳ ପ୍ରକଳ୍ପ କାର୍ଯ୍ୟକାରୀ କରିବାକୁ ପ୍ରସ୍ତାବ ଦିଆଯାଇଛି। ତେବେ ଏଥିରୁ ଗୁଣୁପୁର-ଥେରୁବାଲି ପ୍ରକଳ୍ପ ପାଇଁ ୧୬୦୦ କୋଟି ଟଙ୍କାର ପ୍ରସ୍ତାବ ଦିଆଯାଇଛି। ଏହାବାଦ୍ ପାରାଦୀପ-ଧାମରା (୮୦ କିି.ମି.) ରେଳପ୍ରକଳ୍ପ ପାଇଁ ୧୪୭୨ କୋଟି ଟଙ୍କାର ପ୍ରସ୍ତାବ ଦିଆଯାଇଛି। ଏହି ପ୍ରକଳ୍ପ କାର୍ଯ୍ୟକାରୀ ହେଲେ ପାରାଦୀପଠାରୁ ଭଦ୍ରକ ଭାୟା କଟକ ୩୮ କି.ମି. ହ୍ରାସପାଇବ ବୋଲି ଆକ୍ସନ ପ୍ଲାନରେ ଦର୍ଶାଯାଇଛି।
ଏହାବାଦ୍ ଜାତୀୟ ଓ ରାଜ୍ୟ ରାଜପଥରେ ୨୦ଟି ଟ୍ରକ୍ ଟର୍ମିନାଲ, କ୍ୟାମେରା ସର୍ଭିଲାନ୍ସ, ଅଟୋମେଟିକ ଡ୍ରାଇଭିଂ ଟେଷ୍ଟିଂ ସିଷ୍ଟମ୍, ଇଲେକ୍ଟ୍ରି ଭେହିକଲ ପଲିସି, ବ୍ଲକସ୍ତରୀୟ ବସ୍ଷ୍ଟାଣ୍ଡ ନିର୍ମାଣ ଓ ବିକାଶ କରିବାକୁ ପ୍ରସ୍ତାବ ଦିଆଯାଇଛି।
