ବେଙ୍ଗାଲୁରୁ, ୧୧।୬ : ବର୍ତ୍ତମାନ କର୍ନାଟକରେ ହିଜାବ ସଙ୍କଟ ଟିକେ ଶାନ୍ତ ହୋଇଯାଇଥିବାବେଳେ ଏବେ ଟୋପି ବନାମ ଗୈରିକ ଶାଲ୍ ବିବାଦ ରାଜ୍ୟରେ ବୃଦ୍ଧି ପାଇବାରେ ଲାଗିଛି। ରାଷ୍ଟ୍ରାୟତ୍ତ ବେଙ୍ଗାଲୁରୁ ମେଟ୍ରୋପଲିଟାନ ଟ୍ରାନ୍ସପୋର୍ଟ କର୍ପୋରେଶନ (ବିଏମଟିସି) ର ହିନ୍ଦୁ କର୍ମଚାରୀଙ୍କ ଏକ ବର୍ଗ ମୁସଲମାନ ଡ୍ରାଇଭର, କଣ୍ଡକ୍ଟର ଏବଂ କର୍ମଚାରୀଙ୍କ ଟୋପି ପିନ୍ଧିବା ନେଇ ବିରୋଧ କରୁଛନ୍ତି।
ଏହାର ପ୍ରତିବାଦରେ ସେମାନେ ଗୈରିକ ଶାଲ୍ ପିନ୍ଧି ଡ୍ୟୁଟିରେ ଯୋଗ ଦେଉଛନ୍ତି। ହିଜାବ ବିବାଦ କାରଣରୁ ରାଜ୍ୟରେ ଅଶାନ୍ତି ଦେଖାଦେଇଥିବା ବେଳେ ହିନ୍ଦୁ କର୍ମଚାରୀମାନେ ସେମାନଙ୍କ ମୁସଲମାନ ସହକର୍ମୀଙ୍କ ଟୋପି ପିନ୍ଧିବାକୁ ବିରୋଧ କରିଥିଲେ ଏବଂ ଏହା ବିଏମଟିସି ଦ୍ୱାରା ନିର୍ମିତ ୟୁନିଫର୍ମ ନିୟମ ଉଲ୍ଲଂଘନ ବୋଲି କହିଥିଲେ। ବିଏମଟିସି ଏହାର କର୍ମଚାରୀମାନଙ୍କ ପାଇଁ ୟୁନିଫର୍ମ ସ୍ଥିର କରିଛି।
ଅବଶ୍ୟ, କାର୍ଯ୍ୟ ସମୟରେ ଟୋପି ପିନ୍ଧିଥିବା ମୁସଲମାନ କର୍ମଚାରୀମାନେ ଏହାକୁ ହଟାଇବାକୁ ମନା କରିଦେଇଛନ୍ତି। ଏହାଦ୍ୱାରା ହିନ୍ଦୁ କର୍ମଚାରୀମାନେ ଏହାର ଜବାବରେ ଗୈରିକ ଶାଲ୍ ପିନ୍ଧିବା ଆରମ୍ଭ କରିଛନ୍ତି। ସେମାନେ କେଶରୀ କର୍ମିକାରା ସଙ୍ଘ ନାମକ ଏକ ୟୁନିୟନ ମଧ୍ୟ ଗଠନ କରିଛନ୍ତି ଯାହା ବିଏମଟିସିରେ କଡା ୟୁନିଫର୍ମ ନିୟମ ଲାଗୁ କରିବା ଏବଂ ଟୋପି ପିନ୍ଧିବାକୁ ବାରଣ କରୁଛି।
ସୂତ୍ରରୁ ଜଣାପଡିଛି ଯେ ଆସୋସିଏଶନ ଅଧୀନରେ ପ୍ରାୟ ୧,୫୦୦ କର୍ମଚାରୀ ପଞ୍ଜିକୃତ ହୋଇଛନ୍ତି ଏବଂ ଡ୍ୟୁଟିରେ ଥିବାବେଳେ ଟୋପି ପିନ୍ଧିବା ନିଷିଦ୍ଧ ନହେବା ପର୍ଯ୍ୟନ୍ତ ସେମାନେ ଗୈରିକ ଶାଲ୍ ପିନ୍ଧିବାକୁ ନିଷ୍ପତ୍ତି ନେଇଛନ୍ତି।
ବିଏମଟିସି ଉପାଧ୍ୟକ୍ଷ ଏମ.ଆର ଭେଙ୍କଟେଶ କହିଛନ୍ତି ଯେ ସେ ଏହାକୁ ଗଣମାଧ୍ୟମ ନ୍ୟୁଜ୍ ଚ୍ୟାନେଲରେ ଦେଖିବେ ପରେ ଜାଣିପାରିଛନ୍ତି। ସେ କହିଛନ୍ତି, ’ମୁଁ ଏହି ଖବରକୁ ଗୁରୁତ୍ୱ ନଦେବାକୁ ଗଣମାଧ୍ୟମକୁ ଅନୁରୋଧ କରୁଛି। ବିଏମଟିସିରେ ପୋଲିସ ବିଭାଗ ଭଳି ସମାନ ନିୟମ ପାଳନ କରାଯିବା ଲାଗି କୁହାଯାଇଛି। କର୍ମଚାରୀମାନଙ୍କୁ ଏହି ନିୟମକୁ ମାନିବାକୁ ପଡିବ। ସେମାନଙ୍କୁ ଅନୁଶାସିତ ହେବାକୁ ପଡ଼ିବ। କେଶରୀ କର୍ମିକାରା ସଙ୍ଘ ଗଠନ ବିଷୟରେ ପଚରାଯିବାରୁ ସେ କହିଛନ୍ତି ଯେ ଏହାକୁ ପ୍ରୋତ୍ସାହିତ କରାଯିବ ନାହିଁ ଏବଂ ଏନେଇ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
