ନୂଆଦିଲ୍ଲୀ,୨୮।୫: ସମଗ୍ର ବିଶ୍ୱରେ ମଙ୍କିପକ୍ସ ମାମଲା ଦ୍ରୁତଗତିରେ ବୃଦ୍ଧି ପାଇବାରେ ଲାଗିଛି। ବର୍ତ୍ତମାନ ପର୍ଯ୍ୟନ୍ତ ଏହି ରୋଗ ୨୦ରୁ ଅଧିକ ଦେଶରେ ବ୍ୟାପସାରିଲାଣି। ବିଶ୍ୱ ସ୍ବାସ୍ଥ୍ୟ ସଂଗଠନ(ହୁ)ଅନୁଯାୟୀ,ବର୍ତ୍ତମାନ ପର୍ଯ୍ୟନ୍ତ ପ୍ରାୟ ୨୦୦ଟି ମଙ୍କିପକ୍ସ ମାମଲା ଚିହ୍ନଟ ହୋଇଛି। ଇତିମଧ୍ୟରେ ଏକ ଖୁସି ଖବର ସାମ୍ନାକୁ ଆସିଛି। ଏକ ଭାରତୀୟ ବେସରକାରୀ ସ୍ବାସ୍ଥ୍ୟ କମ୍ପାନୀ ମଙ୍କିପକ୍ସ ଭାଇରସ୍ ଚିହ୍ନଟ କରିବା ପାଇଁ ଏକ ରିଅଲ-ଟାଇମ୍ ଆରଟି-ପିସିଆର କିଟ୍ ତିଆରି କରିବାକୁ ଘୋଷଣା କରିଛି। ଭାରତୀୟ ବେସରକାରୀ ସ୍ବାସ୍ଥ୍ୟ ଉପକରଣ କମ୍ପାନୀ ଟ୍ରିଭିଟ୍ରନ୍ ହେଲଥ୍କେୟାର ଶୁକ୍ରବାର ମଙ୍କିପକ୍ସ ଅର୍ଥାତ୍ ଆର୍ଥୋପକ୍ସଭାଇରସ ଭାଇରସ୍ ଚିହ୍ନଟ ପାଇଁ ଏକ ରିଅଲ-ଟାଇମ ଆରଟି- ପିସିଆର କିଟ୍ ବିକଶିତ କରିବା ପାଇଁ ଘୋଷଣା କରିଛି। ଟ୍ରିଭିଟ୍ରନ୍ ହେଲଥ୍କେୟାର ପକ୍ଷରୁ କୁହାଯାଇଛି ଯେ, ସେମାନଙ୍କ ରିସର୍ଚ୍ଚ ଆଣ୍ଡ ଡେଭ୍ଲ୍ପମେଣ୍ଟ ଟିମ୍ ମଙ୍କିପକ୍ସ ଭାଇରସ୍ ଚିହ୍ନଟ ପାଇଁ ଏକ ଆରଟି-ପିସିଆର ଆଧାରିତ କିଟ୍ ପ୍ରସ୍ତୁତ କରିଛନ୍ତି। ରିଅଲ-ଟାଇମ ଆରଟି-ପିସିଆର କିଟ୍ ହେଉଛି ୪ଟି ରଙ୍ଗର ଫ୍ଲୋରୋସେନ୍ସ ଉପରେ ଆଧାରିତ କିଟ୍। ଏହି କିଟ୍ ଦ୍ୱାରା ୧ ଘଣ୍ଟାରେ ରିପୋର୍ଟ ଜଣାପଡ଼ିବ ବୋଲି କମ୍ପାନୀ ପକ୍ଷରୁ କୁହାଯାଇଛି। ଅନ୍ୟପଟେ ଶୁକ୍ରବାର ଭାରତୀୟ ଚିକିତ୍ସା ଅନୁସନ୍ଧାନ ପରିଷଦ(ଆଇସିଏମ୍ଆର୍) ଅଧିକାରୀ କହିଛନ୍ତି ଯେ, ଅନ୍ୟ ଦେଶରେ ବଢ଼ୁଥିବା ସଂକ୍ରମଣକୁ ଦୃଷ୍ଟିରେ ରଖି ଭାରତ ପ୍ରସ୍ତୁତ ଅଛି। ତେବେ ଏପର୍ଯ୍ୟନ୍ତ ଭାରତରେ ମଙ୍କିପକ୍ସର କୌଣସି ମାମଲା ରେକର୍ଡ କରାଯାଇନାହିଁ।
