କେନ୍ଦୁଝର, ୧୨ା୪ ରାଜ୍ୟ ସରକାର କୃଷି ଓ କୃଷକର ବିକାଶ ନିମନ୍ତେ ଯୋଜନା ପରେ ଯୋଜନା ପ୍ରଣୟନ କରି କୋଟି କୋଟି ଟଙ୍କାର ଅର୍ଥ ଖର୍ଚ୍ଚ କରିବାରେ ଲାଗିଛନ୍ତି। ହେଲେ ସଂପୃକ୍ତ ସରକାରୀ କଳର ଇଚ୍ଛାଶକ୍ତିର ଅଭାବ ଯୋଗୁ ଜିଲାରେ କୃଷି କ୍ଷେତ୍ରରେ କାର୍ଯ୍ୟକାରୀ ହେଉଥିବା ଯୋଜନାଗୁଡିକ ଅନେକ ସମୟରେ ଦିଗହରା ହେଉଥିବାବେଳେ କୃଷିବିତମାନଙ୍କ ଲାଭ ହେବା ପରିବର୍ତ୍ତେ କ୍ଷତି ସହୁଥିବା ଅଭିଯୋଗ ହେଉଛି। ସୂର୍ଯ୍ୟମୁଖୀ ଚାଷ ସ୍ବଳ୍ପ ଖର୍ଚ୍ଚରେ ଅଧିକ ଲାଭ ଦେବା ଭଳି ଚାଷ ରୂପେ ପରିଗଣିତ ହେଉଥିବାବେଳେ ସରକାରୀ ପ୍ରୋତ୍ସାହନ ଅଭାବ ଯୋଗୁ ଚାଷୀମାନେ ଅସନ୍ତୋଷ ରହୁଛନ୍ତି।
ସୂଚନା ଅନୁସାରେ, ସଦର ବ୍ଲକ ଅଞ୍ଚଳର ବିଭିନ୍ନ ଗ୍ରାମରେ ସୂର୍ଯ୍ୟମୁଖୀ ଚାଷୀଙ୍କୁ ଆବଶ୍ୟକ ପରିମାଣର ସାର କୃଷି ବିଭାଗ ଯୋଗାଉ ନାହିଁ। ସରକାର ଚାଷୀମାନଙ୍କୁ ଚାଷ ସମ୍ବନ୍ଧୀୟ ପ୍ରଶିକ୍ଷଣ ବ୍ୟବସ୍ଥା କରିଥିଲେ ମଧ୍ୟ ଜିଲା କୃଷି ବିଭାଗ ତରଫରୁ ସେପରି କୌଣସି ଯୋଜନା ଚାଷୀଙ୍କ ନିକଟରେ ପହଞ୍ଚୁ ନାହିଁ। ଏହି ବିଭାଗର ପ୍ରତ୍ୟେକ ପଞ୍ଚାୟତରେ ବିଭାଗୀୟ କର୍ମଚାରୀ ନିଯୁକ୍ତ ହୋଇ ଚାଷୀଙ୍କୁ ଉତ୍ତମମାନର ବିହନ, ସାର ଆଦି ଯୋଗାଇବା ପାଇଁ ସରକାରୀସ୍ତରରେ ବ୍ୟବସ୍ଥା ଅଛି। ମାତ୍ର ଏହି ବିଭାଗର ଅଧିକାରୀମାନେ ଧାନ ଚାଷ ସମୟରେ ଧାନ ବିହନ, ସାର ଆଦି ଯୋଗାଇଲା ପରେ କେଉଁ ଆଡେ ବର୍ଷସାରା ଅନ୍ତର୍ଦ୍ଧାନ ହୋଇଯାଆନ୍ତି ବୋଲି ଚାଷୀମାନେ ଅଭିଯୋଗ କରିଛନ୍ତି। ଚାଷୀମାନେ ବିଭିନ୍ନ ଋତୁରେ ନାନା ପ୍ରକାର ଚାଷ କରିଥାନ୍ତି। କିନ୍ତୁ ବିଭିନ୍ନ ଚାଷ ସମ୍ବନ୍ଧୀୟ ବାବଦରେ ଚାଷୀଙ୍କୁ ଜଣା ନଥିବାରୁ ଉନ୍ନତମାନର ଚାଷରୁ ଲାଭ ପାଇପାରୁ ନାହାନ୍ତି। ସେହିପରି ସୂର୍ଯ୍ୟମୁଖୀ ଚାଷ ପାଇଁ କ’ଣ କ’ଣ ଆବଶ୍ୟକତା ରହିଛି, ତାହା ସୂର୍ଯ୍ୟମୁଖୀ ଚାଷୀଙ୍କୁ ଜଣାନାହିଁ ବୋଲି କହିଛନ୍ତି। ଏସମ୍ପର୍କରେ କେନ୍ଦୁଝର କୃଷି ବିଭାଗର ଜିଲା ଅଧିକାରୀ ବିଜୟ କୁମାର ସ୍ବାଇଁଙ୍କୁ ପ୍ରୋତ୍ସାହନ ନ ଦିଆଯିବା ବିଷୟରେ ପଚାରିବାରୁ ଚଳିତ ବର୍ଷ ସୂର୍ଯ୍ୟମୁଖୀ ମଞ୍ଜିର ଅଭାବ ଯୋଗୁ ଏହା ସମ୍ଭବପର ହେଲା ନାହିଁ ବୋଲି ସେ କହିଛନ୍ତି।
