ଢେଙ୍କାନାଳ ଅଫିସ, ୮ା୩ ଢେଙ୍କାନାଳ ପୌର ପରିଷଦ ନିର୍ବାଚନରେ ହାତ ଟେକିଦେଲା କଂଗ୍ରେସ। ୨୦୧୩ରେ ମ୍ୟୁନିସିପାଲିଟିର ମୋଟ ୨୩ ଓ୍ବାର୍ଡ ମଧ୍ୟରୁ ୧୧ ଆସନରେ ବିଜୟୀ ହୋଇ ସର୍ବବୃହତ୍ ଦଳ ପାଲଟିଥିବା ବେଳେ ଚଳିତ ନିର୍ବାଚନରେ କଂଗ୍ରେସକୁ ପ୍ରାର୍ଥୀ ମିଳିଲେ ନାହିଁ। ଫଳରେ ଦେଶର ଏହି ସର୍ବପୁରାତନ ଦଳ ୭ଟି ଓ୍ବାର୍ଡରେ ପ୍ରାର୍ଥୀ ଦେଇପାରିନାହିଁ। ସମ୍ପୃକ୍ତ ୭ ଓ୍ବାର୍ଡକୁ କର ଛଡ଼ା କରି ଦଳ ନିର୍ବାଚନ ପୂର୍ବରୁ ଏକପ୍ରକାର ବ୍ୟାକ୍ଫୁଟ୍କୁ ଚାଲିଯାଇଛି। ତେବେ କଂଗ୍ରେସର ପ୍ରାର୍ଥୀ ନ ଦେବାକୁ ନେଇ ଚର୍ଚ୍ଚାକୁ ଆସିଛି ୬ନଂ. ଓ୍ବାର୍ଡ। କାରଣ ଏହି ଓ୍ବାର୍ଡର ବାସିନ୍ଦା ହେଉଛନ୍ତି ବରିଷ୍ଠ କଂଗ୍ରେସ ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ କେ.ପି ସିଂଦେଓ। ଏଭଳି ଜଣେ ପୁରୁଖା ନେତାଙ୍କ ଉପସ୍ଥିତି ସତ୍ତ୍ୱେ ଉକ୍ତ ଓ୍ବାର୍ଡରୁ ଦଳ ପ୍ରାର୍ଥୀ ଦେଇ ନ ପାରିବାକୁ ନେଇ ସହରରେ ନା ନା ଆଲୋଚନା ହେଉଛି। ଏଭଳି ସ୍ଥିତିରେ ବିଜେଡି ଏବଂ ଭାଜପା ମଧ୍ୟରେ ମୁଖ୍ୟ ପ୍ରତିଦ୍ୱନ୍ଦ୍ୱିତା ହେବ ବୋଲି ସ୍ପଷ୍ଟ ହୋଇଛି।
ଅନ୍ୟପଟେ ଦଳୀୟ ବିଦ୍ରୋହ ଆଶଙ୍କାରେ ନଗରପାଳ ପ୍ରାର୍ଥୀଙ୍କ ନାମ ଝୁଲାଇ ରଖିଥିବା ଶାସକ ବିଜେଡି ନାମାଙ୍କନ ପ୍ରକ୍ରିୟାର ଅନ୍ତିମ ଦିନରେ ଅନିମା ନାୟକଙ୍କୁ ଟିକେଟ ଦେଇଛି। ସେହିପରି ବିଜେଡିରେ ଶତାଧିକ ଆଶାୟୀ ଟିକେଟ୍ ପାଇବାକୁ ଆଶା କରିଥିବାବେଳେ ସେମାନଙ୍କୁ ଶେଷ ମୁହୂର୍ତ୍ତରେ ନିରାଶ ହେବାକୁ ପଡ଼ିଛି। ସେଥିରୁ କେତେଜଣ ଭାଜପାରେ ଯୋଗଦେଇଛନ୍ତି। ନଗର ଯୁବ ବିଜେଡି ସଭାପତି ବିନୋଦ ମହାନ୍ତି ଦଳୀୟ ଟିକେଟରୁ ବଞ୍ଚତ୍ତ ହେବା ପରେ ଭାଜପାରେ ମିଶିଥିଲେ। ତାଙ୍କ ସ୍ତ୍ରୀ ଜୁଲିନା ମହାନ୍ତି ୭ନଂ. ଓ୍ବାର୍ଡରୁ ଭାଜପା କାଉନ୍ସିଲର ପ୍ରାର୍ଥୀ ହୋଇଛନ୍ତି। ଅନୁରୂପ ଭାବେ ବିଜେଡିର ବରିଷ୍ଠ କର୍ମକର୍ତ୍ତା ତଥା ପୂର୍ବତନ କାଉନ୍ସିଲର ଜ୍ଞାନଚାନ୍ଦ ମିଶ୍ର ମଧ୍ୟ ଟିକେଟ ନ ପାଇ ୩ନଂ. ଓ୍ବାର୍ଡରୁ ଭାଜପା କାଉନ୍ସିଲର ଭାବେ ନାମାଙ୍କନ ଦାଖଲ କରିଛନ୍ତି।
କଂଗ୍ରେସ ପକ୍ଷରୁ ଅତି ତରବରିଆ ଭାବେ ପ୍ରାର୍ଥୀ ଚୂଡ଼ାନ୍ତ କରାଯାଇଥିଲା। ସବୁ ଓ୍ବାର୍ଡ ପାଇଁ ପ୍ରାର୍ଥୀ ଯୋଗାଡ଼ ମଧ୍ୟ କଷ୍ଟକର ହୋଇପଡ଼ିଲା। ଏଥିଲାଗି ଦଳୀୟ କର୍ମକର୍ତ୍ତାମାନେ ଶାସକ ଦଳକୁ ଦାୟୀ କରିଛନ୍ତି। ଶାସକ ଦଳ ଅର୍ଥବଳ ଓ ବାହୁବଳ ଲଗାଇ ନିର୍ବାଚନକୁ ପ୍ରଭାବିତ କରୁଛି। ଦଳୀୟ ପ୍ରାର୍ଥୀଙ୍କୁ ଧମକଚମକ ଦେଇ ବସାଇ ଦିଆଯାଇଛି ବୋଲି କଂଗ୍ରେସ ପକ୍ଷରୁ ଅଭିଯୋଗ କରାଯାଇଛି।
