ଭୁବନେଶ୍ୱର, ୧୫।୨(ବ୍ୟୁରୋ):ଚିଲିକା ମଙ୍ଗଳାଯୋଡ଼ିରେ ଏକ ବିରଳ ଧଳା ରଙ୍ଗର ଟେମ୍ନିକ୍ସ ଷ୍ଟିଣ୍ଟ୍ ପକ୍ଷୀ ଦେଖିବାକୁ ମିଳିଛି। ସୋମବାର ସକାଳୁ ପର୍ଯ୍ୟଟକଙ୍କୁ ଡଙ୍ଗାରେ ବୁଲାଇବାବେଳେ ବାର୍ଡ ଗାଇଡ୍ ତଥା ମଙ୍ଗଳାଯୋଡ଼ି କଞ୍ଜରଭେଶନ ଟ୍ରଷ୍ଟର ଟ୍ରଷ୍ଟି ମଧୁ ବେହେରା ଏହି ପକ୍ଷୀଟିକୁ ଠାବ କରିଥିଲେ। ପକ୍ଷୀଟିର ପୂରା ଦେହର ରଙ୍ଗ ଧଳା ହୋଇଥିବାବେଳେ ଦୁଇପଟ ଡେଣାରେ ଦୁଇଟି ଲେଖାଏ ଛୋଟ କଳା ପ୍ୟାଚ୍ ଦେଖା ଯାଉଛି। ତେବେ ଗୋଡ଼ର ରଙ୍ଗ ଅନ୍ୟ ଟେମ୍ନିକସ୍ ଷ୍ଟିଣ୍ଟଙ୍କ ଭଳି ହଳଦିଆ। ଏହି ବିରଳ ପ୍ରଜାତିର ଧଳା ଟେମନିକସ୍ ଷ୍ଟିଣ୍ଟକୁ ମଙ୍ଗଳାଯୋଡିର ବାଲିଆଯୋରି ନାଳ ନିକଟରେ ଖାଦ୍ୟ ଅନ୍ବେଷଣ କରୁଥିବାର ମଧୁ ଦେଖିବାକୁ ପାଇଥିଲେ। ତେବେ ଏହି ପକ୍ଷୀଟି ଏକ ଲିୟୁସିଷ୍ଟିକ ଟେମ୍ନିକ୍ସ ଷ୍ଟିଣ୍ଟ୍ ବୋଲି ଖୋର୍ଦ୍ଧା ଜିଲାର ଅବୈତନିକ ବନ୍ୟପ୍ରାଣୀ ତତ୍ତ୍ୱାବଧାରକ ଶୁଭେନ୍ଦୁ ମଲ୍ଲିକ ଚିହ୍ନଟ କରିଛନ୍ତି। ଓଡ଼ିଶାରେ ଏହି ପକ୍ଷୀର ଏଭଳି ମ୍ୟୁଟେଶନ ଦେଖାଯିବା ପ୍ରଥମ ଓ ସାରା ଭାରତରେ ଦ୍ୱିତୀୟ ଘଟଣା ବୋଲି ଶୁଭେନ୍ଦୁ କହିଛନ୍ତି।
ଏହି ପକ୍ଷୀମାନେ ସାଧାରଣତଃ ଉତ୍ତର ୟୁରୋପ ଏବଂ ଏସିଆ ଦେଶଗୁଡ଼ିକରେ ବାସ କରିଥାନ୍ତି। ଦକ୍ଷିଣ ସ୍କାଣ୍ଡିନେଭିଆ, ରୁଷିଆ, ନର୍ୱେ, ଫିନ୍ଲାଣ୍ଡ, ସୁଇଡେନ ଆଦି ଦେଶରେ ଏହି ପକ୍ଷୀମାନେ ପ୍ରଜନନ କରିଥାନ୍ତି। ଭାରତ ତଥା ଓଡ଼ିଶାକୁ କେବଳ ଶୀତ ଦିନରେ ହିଁ ଆସିଥାନ୍ତି। ଶୀତ ସରିବା ପରେ ପୁଣି ନିଜ ଦେଶକୁ ବାହୁଡ଼ି ଯାଇଥାନ୍ତି। ଏଥର କରୋନା କଟକଣା କୋହଳ ହୋଇଥିବାରୁ ଏହି ଲିୟୁସିଷ୍ଟିକ ଟେମନିକ୍ସ ଷ୍ଟିଣ୍ଟ ପକ୍ଷୀକୁ ଦେଖିବାକୁ ଅଧିକ ପର୍ଯ୍ୟଟକ ତଥା ପକ୍ଷୀପ୍ରେମୀ ମଙ୍ଗଳାଯୋଡ଼ିକୁ ଆସିବେ ବୋଲି ମଧୁ ଆଶାବ୍ୟକ୍ତ କରିଛନ୍ତି। ଉଲ୍ଲେଖଯୋଗ୍ୟ, ଗତବର୍ଷ ମଧୁ ମଙ୍ଗଳାଯୋଡ଼ିରେ ଅନ୍ୟ ଦୁଇ ନୂଆ ପ୍ରଜାତି ଲିୟୁସିଷ୍ଟିକ ପକ୍ଷୀ – ଲିୟୁସିଷ୍ଟିକ ନର୍ଦନ୍ ଶୋଭେଲର ଏବଂ ଲିୟୁସିଷ୍ଟିକ କମନ ମୁର ହେନ୍ ପକ୍ଷୀଙ୍କୁ ଠାବ କରିଥିଲେ।
