ଅମୃତସର,୧୪।୨: ଆସନ୍ତା ଫେବୃୟାରୀ ୨୦ରେ ପଞ୍ଜାବରେ ବିଧାନସଭା ପାଇଁ ଭୋଟ ଅନୁଷ୍ଠିତ ହେବ। ଏଥିପାଇଁ ଆମ ଆଦମୀ ପାର୍ଟି ସୁପ୍ରିମୋ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ଜିୱାଲ ଜୋରସୋରରେ ପ୍ରଚାର କରୁଛନ୍ତି। ସୋମବାର ଅମୃତସରରେ ଆୟୋଜିତ ଏକ ଖବରଦାତା ସମ୍ମିଳନୀରେ କେଜ୍ଜିୱାଲ କହିଛନ୍ତି, ସବୁ ଦଳର ନେତାମାନେ ଦିନରାତି ମୋତେ ଗାଳି କରୁଛନ୍ତି, ମୋର ଦୋଷ କ’ଣ, ମୁଁ କେବଳ ଲୋକଙ୍କ ବିକାଶ ବିଷୟରେ କହିଛି। ପଞ୍ଜାବର ଅଗ୍ରଗତି ଏବଂ ଶିଶୁ ଶିକ୍ଷାର ଅଗ୍ରଗତି ବିଷୟରେ କହିଛି ବୋଲି ସେ କହିଛନ୍ତି।
କେଜ୍ଜିୱାଲ ଆହୁରି ମଧ୍ୟ କହିଛନ୍ତି, ସବୁ ଦଳ ମୋତେ ଏବଂ ଆମର ମୁଖ୍ୟମନ୍ତ୍ରୀ ପ୍ରାର୍ଥୀ ଭଗବନ୍ତ ମାନଙ୍କୁ ଗାଳି କରୁଛନ୍ତି। ଗତକାଲି ଅମିତ ଶାହା, ପ୍ରିୟଙ୍କା ଗାନ୍ଧୀ ମୋତେ ଦୁର୍ବ୍ୟବହାର କରିଥିଲେ। ଆମର ଦୋଷ କ’ଣ? ଆମେ ପଞ୍ଜାବରେ ଭଲ ବିଦ୍ୟାଳୟ କରିବା ବିଷୟରେ କହୁଛୁ। ଏହି ଦଳଗୁଡିକ ଆମ ଆଦମୀ ପାର୍ଟି ସରକାର ଗଠନ ହେବାକୁ ଚାହୁଁନାହାଁନ୍ତି। ମୁଁ ପଞ୍ଜାବ ମୁଖ୍ୟମନ୍ତ୍ରୀ ଚରଣଜିତ୍ ସିଂ ଚାନ୍ନି ସାହେବଙ୍କ ସ୍ବପ୍ନରେ ଆସିବା ଆରମ୍ଭ କରିଛି, ସେ ରାତିରେ ଭୟଭୀତ ହୋଇ ଉଠୁଛନ୍ତି। ଧୀରେ ଧୀରେ କଂଗ୍ରେସ ଶେଷ ହେବ ବୋଲି ସେମାନେ କାନ୍ଦୁଛନ୍ତି। ଆଜିକାଲି ଚାନ୍ନି ଶୋଇପାରୁ ନାହାଁନ୍ତି, ଆଖି ବନ୍ଦ କରିବା ମାତ୍ରେ ମୁଁ ତାଙ୍କ ସ୍ବପ୍ନରେ ଭୂତ ପରି ଆସୁଛି। କେବଳଏତିକି ନୁହେଁ,ମୁଁ ଏ ପର୍ଯ୍ୟନ୍ତ ପଞ୍ଜାବକୁ ଲୁଟ କରୁଥିବା ସମସ୍ତ ଲୋକଙ୍କ ସ୍ବପ୍ନରେ ଆସୁଛି ବୋଲି କେଜ୍ଜିୱାଲ କହିଛନ୍ତି।
