ଢେଙ୍କାନାଳ ଅଫିସ,୧୭।୧: ଢେଙ୍କାନାଳ ସଦର ବ୍ଲକ ଚାଉଳିଆ ପଞ୍ଚାୟତରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା (ଏମ୍ଜିଏନ୍ଆର୍ଇଜିଏସ୍)ରେ ହୋଇଥିବା ପ୍ରକଳ୍ପ କାର୍ଯ୍ୟରେ ମହାଦୁର୍ନୀତି କରାଯାଇଥିବା ଉଦୟଭାନୁ ଦାସ ଅଭିଯୋଗ ଆଣିଛନ୍ତି। ଏହାର ଉପଯୁକ୍ତ ତଦନ୍ତ କରିବା ସହିତ ଅଭିଯୁକ୍ତଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରିବା ଲାଗି ସେ ଜିଲାପାଳଙ୍କୁ ଲିଖିତ ଭାବେ ଜଣାଇଛନ୍ତି। ଏହାର ନକଲ ମୁଖ୍ୟମନ୍ତ୍ରୀ, ୫-ଟି ସଚିବ, ପଞ୍ଚାୟତିରାଜ ମନ୍ତ୍ରୀ, ଉନ୍ନୟନ କମିଶନର, ଭିଜିଲାନ୍ସ ନିର୍ଦ୍ଦେଶକ, ଭିଜିଲାନ୍ସ ଏସ୍ପି, ଖଣିମନ୍ତ୍ରୀଙ୍କୁ ପ୍ରଦାନ କରିଛନ୍ତି।
ଅଭିଯୋଗ ଅନୁଯାୟୀ, ପଞ୍ଚାୟତର ଖମାର ଶ୍ମଶାନ ପଡ଼ିଆ, ଖମାର ଶ୍ମଶାନ ଘାଟ, ଖମାର କୁଶବଣିଆରେ ୩ଟି ଟ୍ରେଞ୍ଚ୍ ନିର୍ମାଣ ନାମରେ ୫ ଲକ୍ଷ ଟଙ୍କା ଲେଖାଏ ମୋଟ୍ ୧୫ ଲକ୍ଷ ଟଙ୍କାର ଦୁର୍ନୀତି ହୋଇଛି। କାମ ନ କରି ହିତାଧିକାରୀଙ୍କ ନାମରେ ଜିଲା ବାହାର ବ୍ୟାଙ୍କରେ ଆକାଉଣ୍ଟ ଖୋଲି ମିଥ୍ୟା ବିଲ୍ କରାଯାଇ ଟଙ୍କା ଆତ୍ମସାତ୍ କରାଯାଇଛି। କ୍ଷେତ୍ରସ୍ତରରେ ତଦନ୍ତ କରାଗଲେ ପଞ୍ଚାୟତରେ ଏଭଳି ଅନେକ ଦୁର୍ନୀତି ପଦାକୁ ଆସିପାରିବ ବୋଲି ଉଦୟଭାନୁ କହିଛନ୍ତି। ଏ ସଂକ୍ରାନ୍ତରେ ସଦର ବିଡିଓ ସୁଧୀର କୁମାର ନାୟକ କୁହନ୍ତି, ତାଙ୍କ ନିକଟରେ ଏଭଳି କୌଣସି ଅଭିଯୋଗ ହୋଇନାହିଁ। ପିଡି ଡିଆର୍ଡିଏ ସାଫଲ୍ୟ ମଣ୍ଡିତ ପ୍ରଧାନ କୁହନ୍ତି, ଏ ସମ୍ପର୍କରେ ସେ ଜାଣିନାହାନ୍ତି। ବୁଝିବା ପରେ ଯାହା କହିହେବ।
