ଜଗତ୍ସିଂହପୁର ଅଫିସ, ୮ା୧: ଚଳିତ ଖରିଫ ଋତୁ ପାଇଁ ଜିଲାର ପ୍ରଥମ ଧାନମଣ୍ଡି ରଘୁନାଥପୁର ବ୍ଲକର ତରିକୁନ୍ଦଠାରେ ଶୁଭାରମ୍ଭ ହୋଇଯାଇଛି। ଜିଲାପାଳ ପାରୁଲ ପଟୱାରୀ ଏହାକୁ ଉଦ୍ଘାଟନ କରିଥିଲେ। ଏହାପରେ ୧୫ରେ ଜଗତ୍ସିଂହପୁର, ନାଉଗାଁ, ବିରିଡ଼ି, ବାଲିକୁଦା, ଏରସମା ଓ କୁଜଙ୍ଗ ବ୍ଲକ ଏବଂ ୨୦ତାରିଖରେ ତିର୍ତ୍ତୋଲ ବ୍ଲକରେ ମଣ୍ଡି ଖୋଲିବ ବୋଲି ସ୍ଥିର କରାଯାଇଛି। ତରିକୁନ୍ଦ ପ୍ରାଥମିକ କୃଷି ସମବାୟ ସମିତି (ପ୍ୟାକ୍ସ) ଆନୁକୂଲ୍ୟରେ ଜଗତ୍ସିଂହପୁର ଜିଲାରେ ଚାଷୀମାନେ ଯେତେବେଳେ ଚାହିଁବେ ଧାନ ଦେଇପାରିବେ। ନିୟନ୍ତ୍ରିତ ବଜାର କମିଟି ତରଫରୁ ଆବଶ୍ୟକ ତାରପୋଲିନ୍ ସମସ୍ତ ପ୍ୟାକ୍ସକୁ ଯୋଗାଇ ଦିଆଯାଇଛି। ଜିଲାରେ ଏ ବର୍ଷ ଚାଷୀମାନଙ୍କଠାରୁ ୧୧,୭୩,୫୨୯.୪୧ କୁଇଣ୍ଟାଲ ଧାନ ସଂଗ୍ରହ ପାଇଁ ଲକ୍ଷ୍ୟ ରଖାଯାଇଛି। ସରକାରଙ୍କ ପକ୍ଷରୁ ସାଧାରଣ ଏଫ୍ଏକ୍ୟୁ ଧାନ କୁଇଣ୍ଟାଲ ପ୍ରତି ୧୯୪୦ ଟଙ୍କା ରଖାଯାଇଥିବାବେଳେ ଗ୍ରେଡ୍-ଏ’ ପାଇଁ ୧୯୬୦ ଟଙ୍କା ଧାର୍ଯ୍ୟ କରାଯାଇଛି। କୋଭିଡ୍ କଟକଣା ଅନୁସାରେ ଧାନ ସଂଗ୍ରହ କରାଯିବ ବୋଲି ଜିଲା ପ୍ରଶାସନ ପକ୍ଷରୁ ନିର୍ଦ୍ଦେଶ ଦିଆଯାଇଛି। ଉଦ୍ଘାଟନୀ ଉତ୍ସବରେ ଉପଜିଲାପାଳ ଧର୍ମେନ୍ଦ୍ର ମଲ୍ଲିକ, ଡିଆର୍ସିଏସ୍ ରୁଦ୍ର ପ୍ରସାଦ ଦାସ, ଏଆର୍ସିଏସ୍ ସୁଭଦ୍ରା ପଟ୍ଟନାୟକ, ଆର୍ଏମ୍ସି ସେକ୍ରେଟାରି ସୂର୍ଯ୍ୟକାନ୍ତ ଦାସ, ମିଲର ଓ ଚାଷୀମାନେ ଉପସ୍ଥିତ ଥିଲେ। ଜିଲା ଯୋଗାଣ ଅଧିକାରିଣୀ ସୁଜାତା ମିଶ୍ର ଯୋଗଦେଇ କହିଥିଲେ, ପ୍ରଥମ ପର୍ଯ୍ୟାୟରେ ରଘୁନାଥପୁର ବ୍ଲକର ୯ଟି ପ୍ରାଥମିକ କୃଷି ସମବାୟ ସମିତି ଯଥା ପୁରୁଣାବସନ୍ତ, ଗୁଆଳିପୁର, ଛପଡ଼ା, ତରିକୁନ୍ଦ, ତାରପୁର, ରାଢ଼ଙ୍ଗ, ଜଗନ୍ନାଥପୁର, ରେଢୁଆ ଓ ଜିରା ମାଧ୍ୟମରେ ୩ ହଜାର କୁଇଣ୍ଟାଲ ଧାନ ସଂଗ୍ରହ ହେବ। କେବଳ ଟୋକନ ଗ୍ରହଣ କରିଥିବା ଚାଷୀ ଧାନ ବିକିପାରିବେ। ଜିଲାରେ ମୋଟ ୧୦୪ଟି ପ୍ରାଥମିକ କୃଷି ସମବାୟ ସମିତି ଜରିଆରେ ଚାଷୀମାନଙ୍କଠାରୁ ଧାନ କ୍ରୟ କରାଯିବ ବୋଲି ମିଶ୍ର ସୂଚନା ଦେଇଥିଲେ। ଏହି ଅବସରରେ ଧାନକ୍ରୟ ସଚେତନତା ପ୍ରଚାର ରଥକୁ ଉପଜିଲାପାଳ ମଲ୍ଲିକ, ଜିଲା ଯୋଗାଣ ଅଧିକାରିଣୀ ମିଶ୍ର ଓ ଏଆର୍ସିଏସ୍ ପଟ୍ଟନାୟକ ଉଦ୍ଘାଟନ କରିଥିଲେ।
