ମୁମ୍ବାଇ,୩ ।୧: ଉତ୍ତରପ୍ରଦେଶର ମୁରାଦାବାଦରେ ୫ ବର୍ଷ ପୂର୍ବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏକ ଜନସଭାକୁ ସମ୍ବୋଧନ କରିବା ଅବସରରେ ନିଜକୁ ଫକିର ବୋଲି କହିଥିଲେ । ଏବେ ଏହାକୁ ନେଇ ପ୍ରଶ୍ନ ଉଠାଇଛନ୍ତି ଶିବସେନା ନେତା ସଞ୍ଜୟ ରାଉତ । ସଞ୍ଜୟ ସାମନାରେ ସାପ୍ତାହିକ ରୋକ-ଟୋକ କଲମରେ ଲେଖିଛନ୍ତି, ୨୮ ଡିସେମ୍ବରରେ ଦେଶର ଗଣମାଧ୍ୟମ ପ୍ରଧାନମନ୍ତ୍ରୀଙ୍କ ଲାଗି କିଣାଯାଇଥିବା ଗାଡିର ଫଟୋ ଦେଖାଇଥିଲେ । ଯେଉଁ ଗାଡିର ଦାମ ଥିଲା ୧୨ କୋଟି ଟଙ୍କା । ନିଜକୁ ଫକିର କହୁଥିବା ଓ ଦେଶୀ ଜିନିଷ ବ୍ୟବହାର କରିବାକୁ କହୁଥିବା ମୋଦି କିଭଳି ୧୨ କୋଟି ଟଙ୍କାର ବିଦେଶି ଗାଡି ବ୍ୟବହାର କରୁଛନ୍ତି ବୋଲି ସଞ୍ଜୟ ପ୍ରଶ୍ନ ଉଠାଇଛନ୍ତି । ଏବେ ମୋଦି ନିଜକୁ ଫକିର ନ କୁହନ୍ତୁ ବୋଲି ସଞ୍ଜୟ କହିଛନ୍ତି ।
ଗୋଟିଏ ପଟେ ମେକ ଇନ୍ ଇଣ୍ଡିଆ, ଷ୍ଟାର୍ଟଅପ ଇଣ୍ଡିଆ, ସ୍ୱଦେଶୀ ଜିନିଷର ବ୍ୟବହାର କରିବାକୁ ପ୍ରଚାର କରୁଥିବା ମୋଦି ନିଜେ ବିଦେଶୀ ଗାଡି ବ୍ୟବହାର କରୁଛନ୍ତି । ଯାହା ଆଦୌ ଯୁକ୍ତିଯୁକ୍ତ ନୁହେଁ ବୋଲି ସେ କହିଛନ୍ତି । ସଞ୍ଜୟ କହିଛନ୍ତି ପଣ୍ଡିତ ନେହେରୁ , ବାବା ସାହେବ ଆମ୍ବେଦକର ସବୁବେଳେ ଦେଶରେ ନିର୍ମିତ ଗାଡି ବ୍ୟବହାର କରୁଥିଲେ । ଯେତେବେଳେ ଦେଶ ଦୁଇଭାଗ ହୋଇଥିଲା ଓ ଏମାନଙ୍କ ଜୀବନ ପ୍ରତି ବିପଦ ଥିଲା ସେତେବେଳେ ସେମାନେ ଦେଶରେ ନିର୍ମାଣ କରାଯାଇଥିବା ଗାଡି ବ୍ୟବହାର କରୁଥିଲେ । ହେଲେ ଏବେ ନିଜକୁ ଫକିର କହୁଥିବା ମୋଦି ବିଦେଶୀ ଗାଡି ବ୍ୟବହାର କରୁଛନ୍ତି । ଏହାର ଉତ୍ତର ଦେବାକୁ ଅବଶ୍ୟ ଭାରତୀୟ ଜନତା ପାର୍ଟି(ଭାଜପା) ବେଶୀ ବିଳମ୍ବ କରି ନାହିଁ । ମହାରାଷ୍ଟ୍ରର ଭାଜପା ନେତା ଅତୁଲ ଭାତକାଲକର କହିଛନ୍ତି ମର୍ସିଡିଜ ଗାଡିରେ ମୋଦି ନୁହେଁ ବରଂ ଦେଶର ପ୍ରଧାନମନ୍ତ୍ରୀଙ୍କ ସୁରକ୍ଷା ପାଇଁ ବ୍ୟବହାର କରାଯାଉଛି । ଆଉ ଏହା ଏସପିଜିଙ୍କ କହିବା ଅନୁଯାୟୀ କିଣାଯାଇଛି । ଏପଟେ ଭାଜପା କହିଛି ଗାଡିର ଦାମ ୧୨ କୋଟି ନୁହେଁ ୪ କୋଟିରେ ଏହାକୁ କିଣାଯାଇଛି ।
